MISHĀN 13 - Kathara Bible (BSI)

Canaan Ara̱yang khavai Chihokhavā

¹ Prohona Mosesli hānga,

² “Ina Israelwui mibingli miki kaji ngalei chi vāra̱yang khavai mi chihovālu; avāva̱ ngarāwui shang-shang eina kathāna ava̱va̱ chiholu.”

³ Chieina Mosesna Prohowui kakaso athishurda Israel mibingwui kathānabingli Paran lamhāngwui eina chihovai.

⁴ Kala hi athumwui amingbingna: Reuben shangwui eina Zaccurwui naomayara Shammu-a;

⁵ Simeon shangwui eina Horiwui naomayara Shaphat;

⁶ Judah shangwui eina Jephunnehwui naomayara Caleb;

⁷ Issachar shangwui eina Josephwui naomayara Igal;

⁸ Ephraim shangwui eina Nunwui naomayara Hoshea;

⁹ Benjamin shangwui eina Raphuwui naomayara Palti;

¹⁰ Zebulun shangwui eina Sodiwui naomayara Gaddiel;

¹¹ Josephwui (chiya Manassehwui shang eina) shangwui eina Susiwui naomayara Gaddi;

¹² Dan shangwui eina Gemalliwui naomayara Ammiel;

¹³ Asher shangwui eina Michaelwui naomayara Sethur;

¹⁴ Naphtali shangwui eina Vophsiwui naomayara Nahbi;

¹⁵ Gad shangwui eina Machiwui naomayara Geuel;

¹⁶ Hibing hi Mosesna ngalei chili vāra̱yang khavai chihokashoka mibingwui amingbingna: kala Mosesna Nunwui naomayara Hosheali Joshua da aming ngacheimihaowa.

¹⁷ Canaan ngalei ara̱yangkhui khavai Mosesna athumli chihoda hānga, “Negeb kānshanglu kala phungrei ram chili kālu,

¹⁸ kala ngalei chi kathakhala kaji vāyanglu, mibing chi pangda leika, ngazanda lei; chungka teo,

¹⁹ kala athumna somda khalei ngalei chi mathāka, zakshi, kala keinung chi rāmrahka, raipankhala,

²⁰ lah ngalei chi chāmka, shāng, kala chili ngahong leika, lah ngalei tumka kathakhala kaji ayanglu. Malungpinglu, kala ngalei chiwui athei kakhuiunglu.” Chitharan atamli drakhāthei minphokkhare atam sāsai.

²¹ Athumna vāda Zinwui lamhāng eina thuilaga Hamath zangkhavai ngalemli khalei Rehob vāshungda ara̱yangkhui.

²² Athumna Negeb shanglaga Hebronli vai; kala Anakwui ara̱-azā kapam Ahiman, Sheshai, Talmai, chili leisai. (Hebron hiya Egyptwui Zoanli zingkum shini rida sakā kahaina).

²³ Chiwui thili athumna Eshcolwui tampākli ungda drakhāthei aphāng akhali kakā asur akha shātkhui, kala thingphān sangda mi khanina ngava̱zata; kala kabothei eina khaorātheila khuiya.

²⁴ Chiwui vang eina apam chili Eshcolwui tampāk da phokmi, kaja drakhāthei asur akha chi Israelwui mibingna chili shātkhui.

²⁵ Zimiksho hangmatithang kākashung eina athumna latunga.

²⁶ Kala athumna Moses, Aaron kala Kadeshli khalei Paran lamhāngli pamkasā Israelwui ashangva̱wuili ungnga. Athumna yarui ashangva̱li pao chi unghānga, kala ngalei chiwui atheila ungchithei.

²⁷ Kala athumna Mosesli hānga, “Nana ithumli kachiho ngalei chili vai; ngalei chi seina̱ eina khuira̱ longa, kala hi chiwui atheina.

²⁸ Chithālala ngalei chili kasombing chi panga, kala keinung chi raipan sāda hakmahālaka; chili lāngda ithumna Anakwui ara̱-azāla chili thei.

²⁹ Amaleknaobingna Negebwui ngaleili somda lei; Hitnaobing, Jebusnaobing kala Amornaobing phungreiramli pama, kala Canaannaobingna shamadrushong kala Jordan ngaheivāk pamdalei.”

³⁰ Kha Calebna Moseswui mangāli khalei mibingli chingrihai ngasakta hānga, “Ithum arui ngalāngda vāusa kala angapaikhuisa; kaja ithumna yuishaphalungra.”

³¹ Chieina ali ngasokhavā mi akhana hānga, “Ithum mibing chili mangasungrarmara, kaja athum ithumli pangmei.”

³² Chiwui vang eina athumna akhayang ngalei chiwui pao Israel mibingli kapikta unghānga, “Ithumna akhayang ngalei chiya mi mapānkapai ramna, chiwui mibingwui asho-arep kahak hāngkhavai maleimana.

³³ Kala apam chili Nephilnao, kaja Anakwui ara̱-azā kachungkha pamda lei; athumwui mangāli ithum khaoh kathāna, kala athumnala ithumli khaoh thāda theida leira.”