MISHĀN 10 - Kathara Bible (BSI)

Lupāsāwui Talla̱

¹ Prohona Mosesli hānga,

² “Lupāsāwui talla̱ khani sākhuilu; kala chi nathumna yaruili kathongkhui khavai kala ngathān khavai sālu.

³ Khani chi rip sāda kakhong tharan mi katongana kazip khavai kachonshimwui zangkhavaili rākazipra.

⁴ Kha athumna talla̱ akhamāng khongakha kathānabing, Israel shangbingwui akuibing, athum khalatta nawuili rākazipra.

⁵ Nana talla̱ chi ning khangasharkhon kakhong chitharan zingshoshongli khalei rāmrahwui mibingna shokra.

⁶ Kala nana kakhane kakhong chi ning ngashar khavai kakhong tharan azingshongli khalei rāmrahwui mibingna shokra. Atam kachida zatphokura jiakha ningkhangashar khon hi khongra.

⁷ Kha yarui kazip khavai kaho tharan, nana ningkhangasharwui makhongla sāngmeida khongra.

⁸ Pāngmon Aaronwui naomayarabingna talla̱ chi khongra. Talla̱ kakhong chi mathāhaila nathumwui thot kachida ningkhami ngasāra.

⁹ Kala nathumwui ngaleili singkakharengali rai vākasā tharan talla̱khon kala ning ngasharkhavai khongra, kaja Proho nathumwui Varena nathumli phaningungda yangkashibingwui eina nathumli kanmira.

¹⁰ Nathum ringphāthangla, kala nathumwui langchin sākahai phanitlila, changwok phanitlila nathumna rikkatā kachigat kala nathumwui ningyatchigat pha̱kaphayābingwui mangāli talla̱ khongra; china nathum Varewui mangāli phaningung khavai nathumli ngachonmira: Proho nathumwui Vare chi ina.”

Israelnaobingna Rāmrah Pheikatā

¹¹ Zingkum kakhane, kachāng kakhanewui khamaga̱thang, tuingashit oko tabernacletungwui eina muiyā chi lānkāhaowa,

¹² kala Sinai lamhāngwui eina Israelwui mibing shang-shang eina zatphokuwa; kala Paran lamhāngli muiyā china tāngasāmhaowa.

¹³ Hi Prohona Mosesli kakaso athishurda zatphok kharena.

¹⁴ Judah rāmrahwui philān athishurda chiwui tāng chili khalei mibingna athumwui philān eina ngasoda khare sāda zatphoka; Amminadabwui naomayara Nahshonna shangnaowui kathānana.

¹⁵ Kala Issachar shangwui mi ashangva̱ chiwuitungli Zuarwui naomayara Nethanelna kathānana.

¹⁶ Kala Zebulun shangwui mi ashangva̱ chiwuitungli Helonwui naomayara Eliabna kathānana.

¹⁷ Kala tabernacle chi pheitā kahai eina Gershonwui naomayarabing eina Merariwui naomayarabingna tabernacle chi phunglaga zatuwa.

¹⁸ Kala Reuben rāmrahwui philān athishurda tāng chili kapam mibingna athumwui philān eina ngasoda zatuwa; Shedeurwui naomayara Elizurna athum shangnaowui kathānana.

¹⁹ Kala Simeon shangwui mi ashangva̱ chiwuitungli Zurishaddaiwui naomayara Shelumi-elna kathānana.

²⁰ Kala Gad shangwui mi ashangva̱ chiwuitungli Deuelwui naomayara Eliasapahna kathānana.

²¹ Chiwui thili Kohathnaobingna kathara otbing phunglaga zatuwa, kala athum marāshungranglakha tabernacle khaningkāhairasai.

²² Kala Ephraim rāmrahwui philān athishurda tāng chili kapama mibingna athumwui philān eina ngasoda zatuwa; Ammihudwui naomayara Elishamana athum shangnaowui kathānana.

²³ Kala Manasseh shangwui mi ashangva̱ chiwuitungli kathāna chi Pedahzurwui naomayara Gamalielna.

²⁴ Kala Benjamin shangwui mi ashangva̱ chiwuitungli kathāna chi Gideoniwui naomayara Abidanna.

²⁵ Chiwui thili Dan rāmrahwui philān athishurda tāng chili kapama, rāmrah saikorawui rai ngākkhame Danwui mibingna athumwui philān eina ngasoda zatphokuwa. Kala Ammishaddaiwui naomayara Ahiezerna shang chiwui kathānana.

²⁶ Kala Asher shangwui mi ashangva̱ chiwuitungli kathāna chi Okhranwui naomayara Pagielna.

²⁷ Kala Naphtali shangwui mi ashangva̱ chiwuitungli kathāna chi Enanwui naomayara Ahirana.

²⁸ Hithāda Israelwui mibingna shang-shangwui athishurda maron-maron eina zatphokuwa.

²⁹ Kala Mosesna, awova̱ Midianpa, Reuelwui naomayara Hobabli hānga, “Prohona ithumli ‘Ina nathumli ngalei hi mira’ da hāngkahai apam chili vaura; ithumli ngasoda rālu, nawui vang ithumna kaphā chi sāmira; kaja Prohona Israelli kaphā chi ngashitmihaidalei.”

³⁰ Kha ana ngahānkai, “I mavāmara, iram ngaleili kala iwui theisābingli latunghaora.”

³¹ Kala Mosesna hānga, “Ithumwui eina mathuimialu da ina kapona; kaja ithum kathāda lamhāngli rāmrah sāpamrakhala kaji nana katheina, kala nana ithumli thānra.

³² Nana ithumli ngasovaakha Prohona ithumli kaphā sākhami chi nalila ithumna yar sāra.”

Mibing Zatkaphok

³³ Chiwui thili athumna Prohowui phungrei chiwui eina kathumthangwui shongzā zatuwa, kala athumwui ngasām khavaipam phākhui khavai tuingashit oko china rida zata.

³⁴ Kala athumna rāmrahwui eina zatphok kachida Prohowui muiyāna athumli ngashun thānzata.

³⁵ Kala oko china zatphok kajida Mosesna hānga, “Thuilu, O Proho, kala nawui yangkashebing chaiyānghaoranu; kala nali ningkakachaibing nawui mangāli yāmchanghaoranu.”

³⁶ Kala oko china vangasām kajida ana hānga, “Mashānkharar Israelnao thingthingwuili hanunglu, O Proho.”