MISHĀN 1 - Kathara Bible (BSI)

Mishān Khare

¹ Egypt ngaleiwui eina athumna shokta kakhane kum, kachāng kakhanewui kharethang, Sinai lamhāngli leilakha kazip khavai kachonshimwui alungli Prohona Mosesli hānga,

² “Israelnao ashangva̱ shang-shang eina, shimkhur eina, aming mashing athihshurda mayarnao kachiva̱wui mishān khuilu;

³ kum maga̱ eina thuida chiwui atung, Israelwui alungli khalei raili vākashap saikora Aaron nanina shang-shangwui athishurda shānkhuilu.

⁴ Kala nanili ngachon khavai shang ava̱va̱wui eina khararnao ava̱va̱ ngasora.

⁵ Kala nanili ngachonki kaji mibing chiwui amingbing chi hina: Reubenshiwui eina Shedeurwui naomayara Elizur;

⁶ Simeonshiwui eina Zurishaddaiwui naomayara Shelumi-el;

⁷ Judahshiwui eina Amminadabwui naomayara Nahshon;

⁸ Issacharshiwui eina Zuarwui naomayara Nethanel;

⁹ Zebulunshiwui eina Helonwui naomayara Eliab;

¹⁰ Josephwui naongarābing, Ephraimwui eina Ammihudwui naomayara Elishama, kala Manassehwui eina Pedahzurwui naomayara Gamaliel;

¹¹ Benjaminshiwui eina Gideoniwui naomayara Abidan;

¹² Danshiwui eina Ammishaddaiwui naomayara Ahi-ezer;

¹³ Ashershiwui eina Okhranwui naomayara Pagiel;

¹⁴ Gadshiwui eina Deuelwui naomayara Eliahsaph;

¹⁵ Naphtalishiwui eina Enanwui naomayara Ahira.”

¹⁶ Hi Israel shang-shangwui kathānabing khararthot shimkhur ararbing ashangva̱wui eina kapangkakhuibingna.

¹⁷ Aming eina hāngkahai mibing hili Moses eina Aaronna hokhui,

¹⁸ kala kachāng kakhanewui kharethang, kum maga̱ eina thuida chiwui atungbingwui mashing athishurda, shangbing eina shimkhurbing athishurda athum khalatta ming chankahai yarui ashangva̱li ngarumda athum kazipa.

¹⁹ Prohona Mosesli kakaso athishurda, ana Sinai lamhāngli athumwui aming chankhui.

²⁰ Israelwui naochizai Reubenwui mibing, athumwui naothotbing, athumwui shimkhur athishurda, avāva̱ ngarāwui shimlak athishurda, miwui aming mashing athishurda, mi ava̱va̱, kum maga̱ kākahai kala chiwui atungbing raili vākashapa mayarnao saikora:

²¹ Reuben shangwui mi mashing thing hangmatida tharuk shāphangāna.

²² Simeonwui mibing, athumwui naothotbing, athumwui shimkhur athishurda, avāva̱ ngarāwui shimlak athishurda, miwui aming mashing athishurda, mi ava̱va̱, kum maga̱ kākahai kala chiwui atungbing raili vākashapa mayarnao saikora:

²³ Simeon shangwui mi mashing thing hangphangāda chiko shākathuma.

²⁴ Gadwui ara̱-azā, athumwui naothotbing, athumwui shimkhur athishurda, avāva̱ ngarāwui shimlak athishurda, miwui aming mashing athishurda, kum maga̱ kākahai kala chiwui atungbing raili vākashapa mayarnao saikora:

²⁵ Gad shangwui mi mashing thing hangmatida phangā shātharuk kala hangphangāna.

²⁶ Judahwui mibing, athumwui naothotbing, athumwui shimkhur athishurda, avāva̱ ngarāwui shimlak athishurda, miwui aming mashing athishurda, mi ava̱va̱, kum maga̱ kākahai kala chiwui atungbing raili vākashapa mayarnao saikora:

²⁷ Judah shangwui mi mashing thing hangshinida mati shātharuka.

²⁸ Issacharwui mibing, athumwui naothotbing, athumwui shimkhur athishurda, avāva̱ ngarāwui shimlak athishurda, miwui aming mashing athishurda, mi ava̱va̱, kum maga̱ kākahai kala chiwui atungbing raili vākashapa mayarnao saikora:

²⁹ Issachar shangwui mi mashing thing hangphangāda mati shāmatina.

³⁰ Zebulunwui mibing, athumwui naothotbing, athumwui shimkhur athishurda, avāva̱ ngarāwui shimlak athishurda, miwui aming mashing athishurda, mi ava̱va̱, kum maga̱ kākahai kala chiwui atungbing raili vākashapa mayarnao saikora:

³¹ Zebulun shangwui mi mashing thing hangphangāda shini shāmatina.

³² Josephwui mibing, Ephraimwui mibing, athumwui naothotbing, athumwui shimkhur athishurda, avāva̱ ngarāwui shimlak athishurda, miwui aming mashing athishurda, mi ava̱va̱, kum maga̱ kākahai kala chiwui atungbing raili vākashapa mayarnao saikora:

³³ Ephraim shangwui mi mashing thing hangmati shāphangāna.

³⁴ Manassehwui mibing, athumwui naothotbing, athumwui shimkhur athishurda, avāva̱ ngarāwui shimlak athishurda, miwui aming mashing athishurda, mi ava̱va̱, kum maga̱ kākahai raili vākashapa mayarnao saikora kala chiwui atungbing:

³⁵ Manasseh shangwui mi mashing thing thumrāda khani shākhanina.

³⁶ Benjaminwui mibing, athumwui naothotbing, athumwui shimkhur athishurda, avāva̱ ngarāwui shimlak athishurda, miwui aming mashing athishurda, mi ava̱va̱, kum maga̱ kākahai kala chiwui atungbing raili vākashapa mayarnao saikora:

³⁷ Benjamin shangwui mi mashing thing thumrāda phangā shāmatina.

³⁸ Danwui mibing, athumwui naothotbing, athumwui shimkhur athishurda, avāva̱ ngarāwui shimlak athishurda, miwui aming mashing athishurda, mi ava̱va̱, kum maga̱ kākahai kala chiwui atungbing raili vākashapa mayarnao saikora:

³⁹ Dan shangwui mi mashing thing hangtharukta khani shāshinina.

⁴⁰ Asherwui mibing, athumwui naotunbing, athumwui shimkhur athishurda, avāva̱ ngarāwui shimlak athishurda, miwui aming mashing athishurda, mi ava̱va̱, kum maga̱ kākahai kala chiwui atungbing raili vākashapa mayarnao saikora:

⁴¹ Asher shangwui mi mashing thing hangmatida akha shāphangāna.

⁴² Naphtaliwui mibing, athumwui naothotbing, athumwui shimkhur athishurda, avāva̱ ngarāwui shimlak athishurda, miwui aming mashing athishurda, mi ava̱va̱, kum maga̱ kākahai kala chiwui atungbing raili vākashapa mayarnao saikora:

⁴³ Naphtali shangwui mi mashing thing hangphangāda kathum shāmatina.

⁴⁴ Shang kachiva̱wui mathun sāda mi tharāda khani, Israelwui kathānabingna Moses eina Aaronli ngachonda mibing chi shānkhui.

⁴⁵ Chieina Israel saikorawui mibing, avāva̱ ngarāwui shimlak athishurda, athum katonga shimkhur eina, Israelwui alungli raili vākashapa kum maga̱wui eina thuida chiwui atungbing—

⁴⁶ athumwui mi mashing saikora shātharuk kala thing katum shāphangā kala hangphangāna.

⁴⁷ Levi shangva awo-ayiwui thot eina athumli ngarumda mishān makhuimana.

⁴⁸ Kaja Prohona Mosesli hānga,

⁴⁹ “Levishi shangmāng machanalu, kala Israelwui mibingli ngarumda mashānrumalu;

⁵⁰ Kha Levinaobingli ningkhami okowui tabernacle chiwui thongthāngbing kala chili khalei saikora chi yangkhavai kapangsanglu. Ashina tabernacle phungzatra kala chiwui ot saikora ashina yangpamra kala chiwui kuikhamareili ashi pamra.

⁵¹ Zatusa jiakha ashina pheikhuilaga phungzatra; kala vākhangasāmpamli ashina vākhaningkāra. Kala kachikathā ayarwui mina rānganaiakha chipāli shaothatra.

⁵² Khangatei Israelwui mibingna athumwui kachonshim tāngtāng eina khaningkāra kala mi kachiva̱na ichichāwui rāmrah alungli kala philān azingli leira;

⁵³ kha Levibingna ningkhami okowui tabernacle kuimareida pamda athumna mayonra, chithāda sāda mi khipānakha marānganairanu kala chieina Israel yarui ashangva̱wuitungli malungkhavāt maleimara.”

⁵⁴ Chithāda Israelwui mibingna sai; Prohona Mosesli kakaso tākam eina athumna sai.