MICAH 6 - Kathara Bible (BSI)

Israelwuitungli Proho wui Tuingaphun

¹ Prohona hāngda khalei nganālu: Ngakarthuilu, phungreili nawui mashun phayatlu, kala phungrābingna nawui akhon shāranu.

² Nganālu, phungreibing kala katang makhavaia okathuiwui shimphunga nathum Prohowui makhamayā tui nganālu, kaja Prohona awui mibingli makhamayā akha lei, kala ana Israelli ngasungra.

³ “O iwui mibing, ina nali khi sāhaokhala? Kathāda ina nali chotngasakhaokhala? Ili ngahānkālu!

⁴ Kaja ina nali Egyptwui eina khuiunga, kala khalap kahaiwui eina ngatangkhui; nathumwui vang ina Moses, Aaron kala Mariam chihorai.

⁵ O iwui mibing, Moabwui awunga Balakna khiwor sākhala kaji; kala Beorwui naomayara Balaamna ali khi ngahānkā; kala Shittimwui eina Gilgal khavāli khi shokkhala kaji phaningunglu; chieina nathumna Prohowui huikhami otsak chi theipaira.”

⁶ Khi singlaga ina Prohowui mangāli rāda, atungshong khalei Varewui mangāli ikhalatta khorumrakhala? Awui mangāli rikkatā kachigat, kumkhawui seinao singlaga vārala?

⁷ Yaovā thingthing, thao kongrā thingkha miakha, Prohona ningyāng ungrala? Iwui khayonkhamāngwui vang iwui naochizai, imanglāwui moreiwui vang, iwui asāwui athei mirala?

⁸ O mikumo, kaphā chi khikhala; kaji Prohona chitheimihaira kala Prohona nawui eina khi ningkachāngkhala kaji chiya mashun eina kasā, lukhamashanli kakahao, kala ningmazingda Vareli ngasokazat maningmala?

⁹ Keinungli khaleibingli Prohona hānga— kala namingli khangachee chi thangkhameina: “Nganālu, O shangbing kala keinungwui mibing!

¹⁰ Makaphā makhayāwui shimli makaphā makhayā lupāchum kahai, kala khonshi kahai kateizā khavai khāntam chi ina malairarrala?

¹¹ Makaphā makhayāwui khāntam eina ngasoda ina mipa chili pheomirala? kala kazikakazāwui khao eina ngasoda pheomirala?

¹² Nawui kashanga mibing khangashaona pemtinghai; nawui ramli kapambing kakapik tuimang matui, kala athumwui male kakapikana.

¹³ Chieina ina nali pāng parhaira, kala nawui moreiwui vang ramcho sāngasaka.

¹⁴ Nana phazāra, kha mathomara, thaishon thaithaira; nana taihaira, kha makharuikhuimara, kala kharuikhui kahai chi raighai eina shimān ngasakra.

¹⁵ Nana yaora kha mahātkhuimara; nana olive surra, kha nakhalatta khaneo masamphangmara; nana drakhāthei surra, kha khamang masamphangmara.

¹⁶ Kaja nana Omriwui shiyan-chikan, kala Ahab shimkhurwui shiyan-chikan mayonhaira; kala athumwui khamachin athishurda zatra; chieina ina nali macho ngasakra, kala nawui ramli kasikharora ngasāra, chithāda sāda mibingwui khamashāt nana phungra.”