MATTHEW 8 - Kathara Bible (BSI)

Phārrei Kakazā Mi akhali Raikhami

¹ Jishuna phungreiwui eina katā tharan mi kachungkhana awui thi shura.

² Kala yanglu, phārrei kakazā mi akha rāda awui mangāli khuktizangda hānga, “Proho, nana tharmiga jiakha ili tharmishapa.”

³ Chieina Jishuna awui pāng katingvāda ali saza̱da hānga, “Ina sāmilakra, tharchaohaolu.” Ngalāngda awui khangaphār chi tharhaowa.

⁴ Jishuna ali hānga, “Khipālikha mahāngalu, kha vālu, nawui phasā chi pāngmonli achitheilu, kala mibingna theikhui khavai Mosesna kaso kahai chigatki kaji chi achigatlu.”

Shipai Akhavā akhawui Shitkasang

⁵ Jishuna Capernaumli vākazang tharan shipai shākhawui akhavā akhana awui mangāshong rālaga ali khorumda hānga,

⁶ “Amei, iwui rao akha phasā ngakaida thihailaga marlak eina kazāda shimli pida lei.”

⁷ Chieina Jishuna ali hānga, “Ina rāda raimira.”

⁸ Kha shipai shākhawui akhavā china ali ngahānkai, “Amei, nali iwui shimli chizunki kaji iwui matik maningmana; kha thada tui chimāng hāngmimalu, china iwui rao raihaora,

⁹ kaja ila iwui azingli shipai ngavālaga akhavābingwui azingli ot kasā mina, kala iwui azinglila raimi tarākha lei; kala ina akhali ‘Vālu’ jiakha ana vai, kala khangatei akhali ‘Rālu’ jiakha ana rai kala iwui raoli ‘Hi sālu’ jiakha ana chi sai.”

¹⁰ Jishuna chi kashā eina matakhakhaida athi kashurabingli hānga, “Kachangkhat eina ina nathumli kahāngna, Israelnaobingwui alungli ina hikathā shitkasang masamphanglakmana.

¹¹ Ina nathumli kahāngna, mi kachungkha zingsho zingtunwui eina rāda kazing wungramli Abraham, Isaac kala Jacobli phazārumra,

¹² kha wungramwui naomayarabingli khamayara tangkhamang horshokhaora, apam chili athum kachapla chapra kala ahāla tarira.”

¹³ Jishuna shipai akhavā chili hānga, “Ungulu, kala nawui shitkasang athishurda shokranu.” Kala rao chi pung chichang chili raichaohaowa.

Jishuna Mi Kachungkhali Raikhami

¹⁴ Jishuna Peterwui shimli akazang tharan Petershi aniva̱ kharurda pikasā thei.

¹⁵ Jishuna awui pāngli sākaza̱ eina kakharur chi raihaowa. Chieina ana ngakarthuida otram ngatha̱mi.

¹⁶ Chithang ngazin kameo kazanga mi kachungkha awuili khuirai kala ana tuikhurnao akha eina kameobing chi kashamshokserhaowa, kala kakazā saikora raimisera.

¹⁷ Hi Isaiah marānna “Ana ithumwui kakazā saikora khuithuimiya kala ithumwui kazāt saikora phungmiya” da hāngkahai ungshung khavaina.

Jishuwui Thishurki kajebing

¹⁸ Ara mi kachungkhana ali rākuikhanam chi theida ngayi lākhavāk vāser khavai ana kasoi.

¹⁹ Kala ain kathema akhana ali rāhānga, “Ojā, nana kazazatpam kachida I nathi shurga.”

²⁰ Chieina Jishuna ali hānga, “Ramfawui akhurla lei, khamasaili yongkazata vānaobingwui athipla lei, kha miwui Naomyarawui ngayaizangda ngasāmkhui khavai apam akhala maleimana.”

²¹ Khangatei sākhangatha̱ akhana ali hānga, “Amei, rida ishāvāli ungchifahaifaga.”

²² Kha Jishuna ali hānga, “Ithi shurlu, kathena athum khalattawui kathi chifa khavai haihaolu.”

Jishuna Siphan Zingrot Kakhām

²³ Jishuna marikhong kākatong eina awui sākhangatha̱bingna athi shura.

²⁴ Kala yanglu, shamadruli siphan zingrot panglāk eina ngasha̱ungda marikhong chi tara̱ khangaphaona ngaphumki jihaowa, kha Jishuva piphuphaira̱sai.

²⁵ Chieina athumna ali amathotkhuida hānga, “Amei, ithumli kanmilu, ithum shimānki jiura.”

²⁶ Ana athumli hānga, “Khisāda nathum ngacheehaokhala? He shitkasang makhalei mibing!” Chiwui thili ana ngakarthuida masi eina shamadru chili chingrihai kharara, chieina va̱rihaowa.

²⁷ Mi kachiva̱ matakhakhaida hāngngaroka, “Hi kachikathā mikhala? Masi kala shamdru eina tangda awui kahāng nganāli.”

Jishuna Kameo Kazanga Khanili Raikhami

²⁸ Chiwui thili Jishuna lākhavāk kānkālaga Gadarea kaho ngalei chili vākashung tharan kameo kazanga mi khani chikhurpamwui eina shokta ali rāngaroka. Ani sāshilakhaoda mi khipākha shongfa chili mazatlengmana.

²⁹ Jishuli samphangkhaleoda anina vaoda hānga, “He Varewui Naomayara, inili nana khi sāki kajikhala? Atam maungshungranglakha nana inili rekharek khavai apam hili kharālā?”

³⁰ Atam chitharan athumwui eina katāda hok ashangva̱ akha phāzāzatta leisai.

³¹ Chieina ali kameobing china, “Nana ithumli kashamshokra jiakha hok ashangva̱ chili khavāzang ngasakmilu” da poi.

³² “Thulu” da Jishuna athumli hānga, chieina athumna shoklaga hokshang chili vāzanghaowa. Kala yanglu, hokshangva̱ chi shamadruphei amaitarenli yongkachuptāda tara̱li hikthatserhaowa.

³³ Hok kahombing china keinungli ngasamunglaga kashok otshot saikora kala kameo kazanga khani chili khi shokhaokhala kaji unghāngchithei.

³⁴ Yanglu, keinung chiwui mi katonga Jishuli ngarok khavai shoka; kala athumna ali kathei eina aramwui eina thuimihaolu da athumna rāpoi.