MATTHEW 7 - Kathara Bible (BSI)

Kateili Bichar Kasā

¹ “Bichar masaalu, chithākha nathumlila bichar masāmara.

² Kaja nathumna bichar kasā tākam eina nathumlila bichar sāra, kala nathumna kateili khān katamyākha nathumlila tamra.

³ Khisāda nachināwui mikli khayim kazang chi theilaga namikli thingngumrikha kazang chi matheithukhala?

⁴ Lha namikli thingngumrikkha zanglaga kathada nachināli, namikli khayim kazang chi ina kheimiga da hāngpairakhala?

⁵ He, phākakhaninga! Rimeikapta namikli thingngumrikha kazang khayim chi kheishokhaifalu, chiwui thili nachināwui mikli kazang khayim chi kheishokmi khavai mathingrik eina theira.

⁶ “Kathara ot chi fali mamialu, athumna hanungda makeipaishina; kala khayingmukta chi hokwui mangāli mahorsangalu, athumna naikazazamlaga naiphumhaipaishina.

Polu, Phālu, Shaolu

⁷ “Polu, nali mira; phālu, nana samphangra; shaolu, nali shomira.

⁸ Kaja kapo mi kachiva̱na samphangra kala kaphā mi china samphangra kala kashaoalila shomira.

⁹ Lha nathumwui ngachaili avāva̱ khipāna anaomayarana khamui poakha ngalunggui mikhala?

¹⁰ Kala ana khaih poakha ali phara̱ mida?

¹¹ Nathum maphāsālala nathumwui naongarāli khamathā ot mitheiakha, kazingramli khaleia nathumwui Avāna ali kapobingli kayākha mataimeida mirakhala?

¹² “Chiwui vang eina nathumwui ningkachachāng chi mibingli sāmi ngasakhangai thada nathumnala athumli sāmilu; khikhalajila hi ain eina marāntuina.

Khamasha̱ Ngavei

¹³ “Khamasha̱ ngavei eina zanglu; khikhalajila shimān khavaiwui ngavei chi mashālaka kala shongfa chi zatphālaka, kala chi eina kazang mi chunglaka.

¹⁴ Kharing mirinli thanvā khavai ngavei chiya masha̱laka, kala shongfa chi saklaka kala chi mi kateokhamāngna phākhuiya.

Thingrong kala chiwui Athei

¹⁵ “Minama marānbingli ngasharlu, athumna yaohui ngavaikhaninglaga rai, kha alungle athum sākakathān ramfa kathāna.

¹⁶ Nathumna athumwui kasākhavā eina theikhuira. Ka̱shātrongli drakhāthei kala kuivārongli khaorāthei mamatheingayaomana.

¹⁷ Chithada sāda khamathā thingrong kachiva̱na kaphā athei mathei, kha makaphā thingrongna zakkashi athei mathei.

¹⁸ Khamathā thingrongna zakkashi athei mamatheipaimana, lah zakkashi thingrongna khamathā athei mamatheipaimana.

¹⁹ Khamathā athei makhamathei thingrong kachiva̱ ta̱teklaga meilungli horsanghaora.

²⁰ Chithada sāda athumli nathumna athumwui athei chieina theira.

Nathumli I Matheisālakmana

²¹ “Ili, ‘Proho, Proho’ da khangakaoa mi kachiva̱ kazing wungramli zangki kaji maningmana, kha kazingramli khaleia iwui Avāwui kaphaning kasaa china zangra.

²² Chithanghon mi kachungkhana ili ‘Proho, Proho, ithumna nawui sāshap-pangshap chieina mamarānmala? Kala nawui pangshap eina kameo makashamshokmala? Nawui sāshap-pangshap chiwui alungli ithumna matakhak kahai tarākha masāmala?’ da hāngra.

²³ Chieina ina athumli, ‘Nathumli I matheisālakmana, iwui eina thulu, makaphā kasābing’ da hāngra.

Shim Kasaa Khani

²⁴ “Chieina iwui tuibing hi shākhuilaga kasā mi kachiva̱ lunghārtungli shim sākā kahaia thangkhama mi kathā ngasāra;

²⁵ kazing roda tara̱ phonga kala masinala shim chili panglāk eina ungphanza̱ya, kha shim chi maja̱mana khiwui vangkhala jilaga shim chi lunghārtungli sakā kahaina.

²⁶ Kha iwui tuibing hi shākhuilaga chi makasā mi kachiva̱ chiya awui shim situitungli sākā kahaia mangkhama̱a mi kathāna.

²⁷ Kazing roda tara̱ phonga kala masina shim chili ungphankaza̱ eina shim chi ja̱tāhaowa.”

Jishuwui Sāshap-pangshap

²⁸ Jishuna hibing hi hāngser kahaiwui thili awui tamkachithei chi theilaga yarui saikora matakhakhaowa.

²⁹ Kaja ain kathembingna tamkachithei mathāla ana sāshap-pangshap eina tamchithei.