MATTHEW 4 - Kathara Bible (BSI)

Jishuli Kasui

¹ Chiwui thili Manglāna Jishuli chipeena suikhavai lamhāngli thānvai.

² Kala ana ngashun ngayā hangmatithang khumpama, chiwui thili A thaihaowa.

³ Chieina chipeena ali rāsuida hānga, “Na Varewui Naomayarana jiakha ngalunggui hi khamui onkhavai kasolu.”

⁴ Kha Jishuna ngahānkai, “Hithada kapihaida lei, ‘Mina khamuimāng eina maringpaimana, kha Varewui khamor eina kashok tui kachiva̱ china ringki kajina.’”

⁵ Chiwui thili chipee china kathara keinung chili khuivāda ali khorumshimwui khamato atonli kānganing ngasaka,

⁶ kala ali hānga, “Na Varewui Naomayarana jiakha nakhalatta ngawoktālu; kaja hithada kapihaida lei; ‘Nali yangmi khavai Varena awui kazingraobingli kasora, athumwui pāng eina nali khāngkhuira. Chithada napheila lungguili masāza̱khuimara.’”

⁷ Jishuna ngahānkai, “Hithadala kapihaida lei, ‘Nana Proho nawui Vareli masuiphalungmara.’”

⁸ Chipee china ali kaphung kajuiva̱ akhali khuikāluishita kala okathuili khalei wungram saikora chitheida chiwui tekhamatei ngashānyang ngasaka;

⁹ kala ali hānga, “Nana ili ngakhumshāmda khorumhaiakha nali ina saikora hi mira.”

¹⁰ Chieina Jishuna ali hānga, “Thulu, Satan! Kaja hithada kapihaida lei, ‘Nana Proho nawui Vareli khorumphalungra, kala amāngli otram ngatha̱ki kajina.’”

¹¹ Chieina chipee chi awui eina thuihaowa kala yanglu, kazingraobingna ali otram rāngatha̱mi.

Galileeli Ot Sākaphok

¹² Chiwui thili Johnli tukthuihaira kaji Jishuna kashā eina Galileevāk vāhaowa.

¹³ Ana Nazarethli mapamluila Zebulun eina Nephtaliwui leiretlungli kazanga shamadrupheili khalei Capernaumli vāpama.

¹⁴ Hi Isaiah marānna hāngkahai chi ungshung khavaina:

¹⁵ “Zebulun ngalei kala Nephtali ngalei, Jordan kankāda shamadru vākhavai shong, Gentilewui Galilee—

¹⁶ Tangkhamanglungli pamda khaleibingna kahor kahaka akha thei. kala leiret chili kapambing eina kathi khaya̱li khaleibingwuitungli kahor china hormihaira.”

¹⁷ Atam chiwui eina thuida Jishuna pao hāshokphokta hānga, “Ningngateilu, kaja kazing wungram nganaishunhaira.”

Khaih Kaphā Mi Matili Hokakhui

¹⁸ Jishuna Galilee shamadru ngalemli zatta leilakha Simonla kaho Peter kala agato Andrew ani chinaoni ngayili khaihlan horsangkasa thei; kaja ani khaihkaphā mina.

¹⁹ Ana anili “Ithi shurlu, ina nanili mi kaphā mi sāngasakra” da hānga.

²⁰ Chieina ngalāngda aniwui khaihlan hortāhailaga ali shurthuwa.

²¹ Chiwui eina zatmamānlaga khangatei chinaoni Zebedeewui naomayara James eina agato Johnla avāva̱ Zeebedeeli ngasoda athumwui marikhonglungli athumwui khaihlan khopkasā theida anilila hoi.

²² Hengsāda avāva̱ eina marikhong chi nothāhailaga shurthuwa.

Jishuna Tamkachithei, Pao Hākashok kala Raikhami

²³ Jishuna Galileewui apam saikorali vāda athumwui synagogueli tamchithei, wungramwui Paokaphā hāshoka kala mibingwui kazāt ayāyāva̱ raimi.

²⁴ Chithada sāda Syria ngalei saikorali awui mingzat chi ngayaovāserhaowa. Chieina athumna kazātyur ayāyāva̱ eina kakazā kala kazāda chotchāng kahai mibing, kameo kazangbing, zingmeirai kakazābing kala sheikasha̱bing awuili khuirai kala ana raimisera.

²⁵ Galilee, Decapolis, Jerusalem, Judea kala Jordan kānkāda kapāna mi kachungkha china ali shurzata.