MATTHEW 28 - Kathara Bible (BSI)

Ringkhalui

¹ Ara sabbath zimikshowui thili, haptawui kharethang zingthanlam Magdalawui Mary eina Mary akhapāva̱ china chikhur chi yangkida vai.

² Kala yanglu, kashuirak eina neina̱ panglāk eina khanukuwa; kala Prohowui kazingrao akhana kazingramwui eina tālaga lungsham chi khalanghailaga chiwui atungli pama.

³ Awui zakmai chi rikhān khangashei thai kala awui kashankachon chi horām kachar thai.

⁴ Chieina khamayonbing chi ngacheenāhaida kathiririhaowa kala kathi thāhaowa.

⁵ Kha kazingrao china sha̱nao khani chili hānga. “Mangacheealu, khikhalajila nathumna krushtungli shaothat kahaiya Jishuli kaphāna kaji ina thei.

⁶ A hili maleimana, khikhalajila ana hāngkahai athishurda ava ringshokhaira. Ali chipet kahai pam hi rāyanglu.

⁷ Chieina thaklāk eina vāda awui sākhangathabingli ahānglu, ‘A kathiwui eina ringshokhaira, kala ana nathumli rida Galileeli vāura, nathumna ali chili theira!’ Ina nathumli hāngkahai chi phaningunglu.”

⁸ Chieina anina khangcheela thā, khamathānla thā da chikhurpamwui eina katotsisi thuihaowa kala sākhangatha̱bingli ngasamvāhaowa.

⁹ Kashuirak eina Jishuna anili samngarokta, “Nanili chingrihairanu” da hānga. Anina vālaga awui pheili singda ali khoruma.

¹⁰ Jishuna anili hānga, “Mangacheealu, vālaga ichināngarāli Galileeli tākhavai hānglu kala apam chili athumna ili theira.”

¹¹ Sha̱nao khani china shongfali zatlakha chikhur khamayona shipai kaikhana keinungli vālaga pāngmon akhokabingli shokkahai saikora chi hāngchithei.

¹² Pāngmon akhokabingna ararnaobingli ngasoda kaziplaga ngasanrum kahaiwui thili, athumna shipaibingli lupā tarākha mida

¹³ hānga, “Hithada hānglu, ‘Ithum piphup eina leilakha awui sākhangatha̱bingna rālaga awui angun rālithuihaowa,’

¹⁴ kala Governorna shaakha, nathum mayonmana da ithumna nathumwui vang phayetmihaora kala chiwui vang nathumna malung ringkhavai khikha maleimana.”

¹⁵ Chieina athumna lupā chi khuilaga athumli hāngchithei kahai chithada sai. Chiwui vang eina aja rāshungda Jihudibingwui ngachaili khararchān hi ngachānda lei.

Jishuna Sākhangatha̱bingli Rākachithei

¹⁶ Sākhangatha̱ tharāda akha china Jishuna vālu da hāngkahai Galileewui phungrei chili vai.

¹⁷ Athumna ali kathei tharan athumna ali khoruma; kha kaikhana ningmaonga.

¹⁸ Kala Jishuna athumli vānganaimeida hānga, “Kazingram eina okathuili khalei pangshap saikora ili mihaira.

¹⁹ Chiwui vang eina nathumna vāda miyur saikorali iwui sākhangatha̱ sāngasaklu; athumli Avā kala Anaomayara kala Manglā Katharawui ming singda ra̱hikmilu,

²⁰ kala ina nathumli kaso kahai saikora chi mayon khavai athumli tamchitheilu, kala mithot khangachang eina tangda ina nathumli ngasomichingra.”