MATTHEW 27 - Kathara Bible (BSI)

Jishuli Pilatewui Mangāli Khuikhavā

¹ Ngathorthakva pāngmon akhokabing eina ararbingna Jishuli shaothat khavai khangarān sai.

² Athumna ali khalaplaga shimenthuihaowa kala Romewui governor Pilateli khuivāmihaowa.

Judas Kathi

³ Jishuli shaothat khavai yonchiphunhaira kaji pao yankakasaia Judasna kashā tharan, ningngateida pāngmon akhokabing eina ararbingli lupā thumrā chi khuivāmiluida,

⁴ hānga, “Khayon makhalei mili shaothat khavai yankasai hi I morei sāhaira.” Athumna ngahānkai, “China ithumli khi sākida? Chiya nawui otna.”

⁵ Ana lupā chi khorumshim chiwui lungli hortāhailaga thuihaowa kala chiwui eina zathailaga angakhākthihaowa.

⁶ Kha pāngmon akhokabing china lupā chi rutkhuilaga hānga, “Hi asheewui lupāna, kala lupāchumli kasang hi ainna mamayāmana.”

⁷ Chieina athum ngazeklaga lupā chieina kha̱mibingwui chikhurpam sākhavai hamkasaawui lui chi lokhui.

⁸ Chiwui vang eina lui chi aja rāshungda “Asheewui Lui” da hoi.

⁹ China marān Jeremiahna hāngkahai chi ungshunghaowa; “Israelnaobingna awui aman sāda mira da mayāngarok kahai lupā thumrā chi athumna khui,

¹⁰ kala Prohona ili kaso kahai thada, athumna ham kasāpawui lui chi lokhavai shichinhaowa.”

Pilatena Jishuli Khangahān

¹¹ Jishuna governorwui mangāli kānganinga kala governorna Jishuli, “Na Jihudiwui awungalā?” da ngahāna. “Chi nana hānghaira” da Jishuna ngahānkai.

¹² Kha pāngmon akhokabing eina ararnaobingna ali kaphen chili ana khikha mangahānkāmana.

¹³ Chieina Pilatena ali hānga, “Athumna nawuitungli kayākha phenda leikhala kaji na mashāmalā?”

¹⁴ Kha Jishuna khikhala mangahānkālakmana, chieina governor chi matakhakhaowa.

Jishuli Shaothat khavai Tuitak Katā

¹⁵ Chitharan phanit kachida yaruina kapo athishurda phātopli narkahai mi akhali Romewui governorna chihokhami khangachāna.

¹⁶ Atam chitharan khangarik-khangarā phātopli zangkasā Barabbas kaho mi akha leisai.

¹⁷ Yarui kakazip tharan Pilatena athumli hānga, “Ili nathumwui vang khipāli chihomilu jikhala? Barabbaslika, Khrista kaho Jishuli khala?”

¹⁸ Kaja Jishuli yuikashiwui vang awui pāngli mikakāna kaji ana thei.

¹⁹ Chili lāngda Pilatena bichar sākhavaipamli leilakha apreiva̱na ali tui akha shirāta, “Khayon makhalei mi chili khikha sākhavai maleimana, khikhalajila arui ngayā iwui mangshong ina awui vang tarākha khananghaira.”

²⁰ Pāngmon akhokabing eina ararnaobingna Barabbasli chihomi khavai kala Jishuli shaothat khavai Pilateli polu da yaruili suiya.

²¹ Governorna yaruili ngahānluishita, “Khani hiwui ngachaili khipāli nathumwui vang chihomilu jikhala?” “Barabbasli” da athumna ngahānkai.

²² “Chithākha Khrista kaho Jishuli ina khi sarakhala?” da Pilatena ngahāna. “Ali krushli shaoshānhaolu” da athum saikorana ngahānkai.

²³ Chieina ana hānga, “Khiwui vang, ana khi khayon sāhaokhala?” Kha athumna pangmeikhar vaoda hānga, “Ali krushli shaoshānhaolu.”

²⁴ Hānglala makannāluimara, khangama̱ khangashao shok khavaina da Pilatena kathei eina, tara̱ khuilaga yaruiwui mangāli apāng mazikta hānga, “Mipā hili thikhangasak hili iwui pāng khikha mazangmana. Hiya nathumna sākakhuina.”

²⁵ Chieina yarui saikora china ngahānkai, “Awui ashee chi ithum eina ithumwui naongarāwuitungli tāranu.”

²⁶ Chiwui thili Pilatena Barabbasli athumwui vang chihomihaowa, kala Jishuli lijei eina ngaphitlaga krushli shaoshān khavai athumli mikāhaowa.

Jishuli Shipaibingna Mana̱kashi

²⁷ Chiwui thili governorwui shipaibingna Jishuli konungli khuizanga, kala shipai chiwui ashang katonga ali kuinamda rākazipa.

²⁸ Kala athumna awui kashankachon raimihailaga hungshi kahai phahon katuma akha ngavaimi,

²⁹ kala ka̱shātwui kuihon akha sākhuilaga athumna ali chi ngahonmi kala khāmshui akha singngasaka. Chiwui thili awui mangāli khuktizangda athumna mana̱shida hānga, “Jihudiwui awungali okpeimeiranu!”

³⁰ Athumna ali machora̱ mashorrora kala khāmshui chila khuimihailaga akuili shaowa.

³¹ Athumna ali mana̱shi kahaiwui thili awui hungshi kahai phahon katuma chi raishokmihailaga awui khangachā phahon chi sangmi, laga ali krushli shaothat khavai khuithuihaowa.

Krushli Shaokathat

³² Athumna zatkhavā tharan Cyrenewui eina Simon kaho mayarnao akha samphanga, chieina shipaibingna ali Jishuwui krush ngava̱ khavai tandi sai.

³³ Kala athumna Golgotha, (chiwui kakhalata mikuira̱pam) kaho chi vākashung tharan,

³⁴ athumna kakhā athi khamanāta atheira̱ Jishuli mimanga; kha ana chi mazapyanglaga mamangthuwa.

³⁵ Kala ali krushli shaoshānhailaga athumna ka̱lā yanglaga awui kashankachon chi ngayara,

³⁶ chiwui thili athumna chili pamda ali mayonpama.

³⁷ Kala awui kuitungli athumna ali kaphen tui chi hithada kapihai, “Hi Jihudibingwui awunga Jishu china.”

³⁸ Jishuli ngasoda phama̱kashao yaronnao khani, akhana yāvāk kala akhana uivāk da krushtungli shaothata.

³⁹ Chiwui ngalemli kānung kānkhavābing china kuikhayitta Jishuli zeida hānga:

⁴⁰ “khorumshim shimān ngasakhailaga kathumthangwui alungli sakāluishitra da kahāngapā, nakhalatta huikhuilu! Varewui Naomayarana jiakha krushwui eina tunglu.”

⁴¹ Hithada sāda pāngmon akhokabing, ain kathemabing kala ararnaobingla ali zeida hānga,

⁴² “Ana mi khangateili huimilaga akhalatta mahuikhuirarmana. A Israelwui Awungana; ara ana krushtungwui eina tungranu, chithākha ithumna ali shitsangra.

⁴³ Ana Vareli chihāna, ana ningchāngakha Varena arui ali rākankhuihaoranu, kaja ana ‘I Varewui Naomayarana’ da hānga.

⁴⁴ Kala ali shaothatkharuma phamakashao yaronnao khani chinala chi tākam eina zeiya.

Jishuwui Kathi

⁴⁵ Ara pung katharukawui eina thuida pung kachiko eina tangda ngalei katonga tangmangtinghaowa.

⁴⁶ kala pung kachikomaikhali Jishuna panglāk eina vaoda hānga, “Eli, Eli, lama sabachthani” kaja “Iwui Vare, iwui Vare, nana ili khisāda horhaokhala?”

⁴⁷ Chiwui ngalemli nganingkasā kaikhana chi shāda, “Mipā hiya Elijahli holi” da hānga.

⁴⁸ Athumwui ngachaili akhana hengsāda ngasamvālaga drakhāra̱ kathurli wothop rurkhuilaga thing akhali khalapshānlaga ali mangkhavai mi.

⁴⁹ Kha khangatei kaikhana hānga, “Ngarailu, Elijahna ali huikhavai marānikhala, ithum yangsa.”

⁵⁰ Jishuna panglāk eina ringāluishitta amanglā chihohaowa.

⁵¹ Chiwui thili khorumshimwui kachon rānkahai chi ato eina thuilaga aze tāshungda akai khani sāhaowa. Okathuila nganuka, kala lunghārbingla ngawokkhai,

⁵² chikhurla shohaowa kala thihaira̱kasā Vareli shitkasangabing kachungkhala ringshok ngasaka.

⁵³ Jishuna ringshok kahaiwui thili athumna chikhurwui eina shoklaga kathara keinungli zanga, chi mi kachungkhana theiya.

⁵⁴ Jishuli mayonkapama raimiwui akhavā eina ali khangaso awui shipaibingna neina̱ kakhanuk, kala kashokshok chi kathei eina ngacheekhaihaoda hānga, “Kachangkhat eina hi Varewui naomayarana.”

⁵⁵ Apam chili tālak eina yangpamkasā sha̱nao tarākhala leisai, athum Jishuli Galileewui eina shurkharāna kala ali athumna ngachonmi.

⁵⁶ Athumwui ngachaili Magdalawui Mary, James eina Josephwui ava̱ Mary kala Zebedee preiva̱la leisai.

Jishuli Kachifa

⁵⁷ Zingyinlamshong Arimatheawui eina kharā Joseph kaho kashānga mi akha rai kala ala Jishuwui sākhangatha̱ akha sāsai.

⁵⁸ Ana Pilatewuili vāda Jishuwui angun apoi, chieina Pilatena angun chi Josephli mikhavai kasoi.

⁵⁹ Chieina Josephna angun chi khuilaga khamanaka tharzā kahai kachon akha eina khaluihai,

⁶⁰ kala ana akhalattawui vang lunghārli kashophutlaga ngarān kahai kadhara chikhur chili Jishuwui angun chi chizanhaowa. Chiwui thili ana chikhurwui khamongli lungriham kahaka akha eina shingkhamhailaga zathaowa.

⁶¹ Atam chili Magdalawui Mary kala khangatei Mary chila chikhur chiwui yangkhangasungchangli leisai.

Chikhur Khamayon

⁶² Akhama kathā, chiya Khangarān kasāwui zimikshowui thili pāngmon akhokabing eina Phariseebingna Pilateli vāsamphangda

⁶³ hānga, “Amei, kakapika mayara china ringda leilakha, ‘Zimiksho kathumthangwui alungli ina ringshokra’ da hāngkahai chi ithumna phaningunga.

⁶⁴ Chiwui vang eina zimiksho kakathumathang eina tangda chikhur hili mayon khavai mayāmilu, maningakha awui sākhangatha̱bingna rālithuihailaga mibingli, a kathiwui eina ringshokhaira da hānghaipaishina, kala kharewui kakapikli khanaopāna zakshimeikhārhaora.”

⁶⁵ Pilatena athumli hānga, “Shipai khuida zatulu kala chikhur chi kashap eina tangda chetlak eina mayonlu.”

⁶⁶ Chieina athumna vāda chikhur chiwui lungguitungli mahor namda shantrila hai.