MATTHEW 25 - Kathara Bible (BSI)

Ngalā Tharāwui Chānjam

¹ “Kazing wungram chiya thaomei singlaga mākakhāmali samphang khavai khavā ngalā tharāli ngaheopai.

² Phangāva mangma̱ya kala phangāna thangmei.

³ Kaja mangkhama̱bing china thaomei khuiphunga, kha thaora̱ makhuiphungmana,

⁴ kha thangkhameibing china athumwui thaomeiwui vang thaokhong pemda thaora̱ khuiphunga.

⁵ Mākakhāma china kharā huihaoda athum chi singutphokuwa kala piphuphaowa.

⁶ Kha ngayā sailungphup atamli ‘Yanglu, mākakhāmali! Ali samphang khavai rālu!’ da vaowa.

⁷ Chieina ngalā tharā china ngakarthuida athumwui thaomei shara.

⁸ Kala mangkhama̱bing china thangkhameibing chili hānga, ‘Ithumli nathumwui thaora̱ khangayarmilu, ithumwui thaomei mitki jihaira.’

⁹ Kha thangkhameibing china ngahānkai, ‘Ithumwui vangla nathumwui vangla mangachangmaraomana. Thaora̱ khayorpamli vālaga nathum khalatta alokhuitha̱lu.’

¹⁰ Athumna thaora̱ lokhavai thuikahai tharan ma̱kakha̱ma chi rāhaowa kala ngarānping kahai ngalāva̱bing china ali ngasoda shakazāwui zātkhāngli azanguwa, kala khamong shunghaowa.

¹¹ “Khaleilaga khangatei ngalāva̱bing chila rāda, ‘Amei, Amei, ithumlila kashomilu’ da hānga.

¹² Kha ana hānga, ‘Kachangkhat ina nathumli kahāngna, nathumli I matheimana.’

¹³ “Chiwui vang eina rimpamlu, khikhalajila nathumna zimiksho kala pung chi matheimana.

Rao Kathumwui Chānjam

¹⁴ “Kaja mi akha kha̱ram vauki kaji eina awui raobingli hokhuilaga awui khalalei lan athumwui pāngli horsangmi kahai kathāna;

¹⁵ akhali ana talent phangā mi, khangatei akhali khani mi kala khangatei akhali akha mi, ava̱va̱li awui sākashap athishurda mi. Chiwui thili zatthuihaowa.

¹⁶ Talent phangā samkaphanga china ngalāngda leih vāsālaga talent phangā tongkhui.

¹⁷ Hithada sāda talent khani samkaphanga mi chinala talent khani tongkhui.

¹⁸ Kha talent akha samkaphanga china ngaleikhur achuilaga ana samkaphang chi chili chuiphumhaowa.

¹⁹ Ara atam kasangkhawui thili raobingwui akhavā chi hanunglaga athumli ngasoda talentwui hishap sai.

²⁰ Chieina talent phangā samkaphangpā china khangatei phangā mataida khuirāda hānga, ‘Amei, nana ili talent phangā mi, hili ina khangatei talent phangā tongkhuihaira.’

²¹ Awui akhavā china ali hānga, ‘Phālakhaira, kaphā kala shitsangkapaiya rao, nana ot kateowa hi ningtonglak eina shikachinwui vang ina nali ot tarākhawuitungli akhavā sāngasakra; nawui akhavāwui khamathānli zanglu.’

²² “Talent khani samkaphangpā chinala khangatei khani mataida khuirāda hānga, ‘Amei, nana ili talent khani mi, ina khangatei talent khani tongkhuihaira.’

²³ Awui akhavā china hānga, ‘Phālakhaira, kaphā kala shitsang kapaiya rao! Nana kateowa ot hi ningtongda kasawui vang nali chungkhameiwuitungli akhavā sāngasakra. Nawui akhavāwui khamathānli zanglu.’

²⁴ “Talent akha samkaphangpā chinala rāhānga, ‘Amei, na ngasakkashe mina da ina thei; nava mayaola hātkakhuiya kala mahamla kazipkakhuia mina;

²⁵ chiwui vang eina I ngacheehaoda nawui talent chi ngaleilungli achuiphumhaowa. Nawui chi na jihaolu.’

²⁶ Kha awui akhavā china ali ngahānkai, ‘Makaphā, ngachāngmakakā rao! Ina mayaola hātkhui kala mahamla kazipkhui kaji nana theilamā?

²⁷ Iwui pheisā hi na pheisā kazipshimli sanghaisa ngayia, chithāsi kaja I hankhaungli atār eina ngasoda ina samphangra.

²⁸ Chieina talent chi awui eina khuilaga talent tharā samkaphanga mipā chili mihaolu,

²⁹ Khikhalajila khaleia mi kachiva̱li chungmeida mirorra, kala ana sorngasaida leira; kha makhaleia mi chiwui eina awui kateokha khalei chila khuithuihaora.

³⁰ Kala makānkhanā rao chili tangkhamang ayar chili horshokhaora; chili mibingna kachapla chapra, ahāla tarira.’

Khanaowa Bichar

³¹ “Miwui naomayarana awui tekhamatei eina kazingraobingli ngasoda kharā tharan, Ishameina awui tekhamatei wungpamkhongli pamra.

³² Awui mangāli miyur saikora kazipkhuira, kala yaokahomana mebingwui eina yaobing chi ngatei phākkakhui thada ana athumli ngatei ngasakhaora,

³³ yaobingli awui yāshong kala mebingli awui uishong haira.

³⁴ Chiwui thili Awungana awui yāshong khaleibing chili hāngra, ‘Rālu, ishāvāna sokhamebing, okathui sākaphokwui eina nathumwui vang ngarān kahai wungram chi mathunkhuilu;

³⁵ khikhalajila I thaisai kala nathumna mizai, I ra̱changsai kala nathumna mimanga; I kha̱mi sasai kala nathuna chizuna,

³⁶ I asāmsai eina leilakha nathumna ngavaimi; I kazālakha nathumna ngahāmi, I phātopli leilakha nathumna rāyangmi.’

³⁷ Chieina khangarongabing china ali ngahānkāra, ‘Proho, na kathai kala ra̱kachang ithumna katharān theida nali mizā lah mimangkhala?

³⁸ Na kha̱mi akha sāda ithumna katharan hosangkhala lah na asāmsai eina leida katharan ngavaimikhala?

³⁹ Na kagazā kala phātopli kazang ithumna katharan theida rāyangmikhala?’

⁴⁰ Chieina Awunga china ngahānkāra, ‘Kachangkhat ina nathumli kahāngna, ichinābingwui ngachaili teomeikap kaje akhali nathumna sāmi kahai chi nathumna ili sākhamina.’

⁴¹ “Chiwui thili awui uishong khaleibing chili ana hāngra, ‘Khonshi kahaibing, nathum iwui eina thuihaolu kala chipee eina awui kazingraobingwui vang ngarān kahai katang makhavai meifa chili vāulu;

⁴² kaja I thaisai kala nathumna mamizāmana, I ra̱changsai kala nathumna mamimangmana,

⁴³ Ina kha̱mi sasai kala nathumna ili mahosangmimana; mahongsai, mangavaimimana; kazāsai kala phātopli leisai, mayangmimana.’

⁴⁴ “Chieina athumnala ngahānkāra, ‘Proho, na kathai lah ra̱kachang lah kha̱mi lah khamahong lah kakazā lah phātop kazang ithumna katharan theida nali sheba masāmithukhala?’

⁴⁵ Chieina ana athumli ngahānkāra, ‘Kachangkhat ina nathumli kahāngna, nathumna teomeikap kaje akhali masākhami chi ili masākhamina.’

⁴⁶ Kala athum katang makhavai tandipamli vāra, kha khamashungbingna katang makhavai kharingpamli vāra.”