MATTHEW 24 - Kathara Bible (BSI)

Khorumshim Shimanki kaji Hāngkhami

¹ Jishuna khorumshim chiwui eina thuiuki kaji eina awui sākhangatha̱bingna khorumshimwui shimbingwui pongli hānga.

² Kha Jishuna athumli ngahānkai, “Nathumna saikora hi katheina, maningmala? Ina kachangkhat nathumli kahāngna, mahorkathānhaila ngalung akhawuitungli ngalung akha leiki kaji akhala maleimara.”

Kakhanang Kachot kala Rekkakharek

³ Jishuna Olive kaphungli pamlakha, sākhangatha̱bingna ngathumda ali rāngahāna, “Hi katharān shokrakhala, ithumli hāngmilu kala nana rāki kaji eina okathui ngachangki kajiwui machut khirakhala?”

⁴ Chieina Jishuna ngahānkai, “Nathumli mathānngui khavai ning ngasharlu.

⁵ Kaja mi kachungkhana iwui ming singda rālaga ‘Khrista chi ina’ da hāngra kala mi kachungkhali thannguira.

⁶ Nathumna katā khanaiwui raipao kashā tharan malung matātunghaialu, hikathā hi shokphalungra kha china khangachang atam maningmana.

⁷ Yur akhana yur akhawuitungli, wungram akhana wungram akhawuitungli rai sāra. Apam ngatateidali chāmrei kala neina̱ kakhanuk shokra.

⁸ Ot saikora hi nao pharātwui naokhara̱ haokaphok kathāna.

⁹ “Chiwui thili nathumli tukkhuida tandi mikhavai kala shaothat khavai misangra. Yur saikorana iwui vang eina nathumli yangkharingra.

¹⁰ Kala chiwui thili kachungkhana yāmhaora, kala akha eina akha yansai ngarokra kala yangkharing ngarokra.

¹¹ Kala minama marān tarākha shokta mi kachungkhali thānnguira.

¹² kala makaphā-makhayā mataisanghaoda mi kachungkhawui leikashi suitāngasakra.

¹³ Kha khanao eina tangda khāngkashap mi chili huikhuira.

¹⁴ Kala wungramwui paokaphā hi miyur hupta shākhi mikhavai okathui peida hāshokra, kala chiwui thili khangachang chi rāra.

Khangachee Khangachā Otshot

¹⁵ “Masai khangasak ningkakachai ot da marān Danielna hānghaikasa china katharapamli khanganing chi nathumna kathei tharan (pākakhuia china bhap tākhuiranu),

¹⁶ Judeali leikasābingna phungreibingli yāmvāranu;

¹⁷ shimtungli leikasaa china tunglaga shimlungli khalei thongthāng mazangkhuiluiaranu,

¹⁸ luili leikasāpā china kachon ungkhui khavai malatungaranu.

¹⁹ Iyāvo, atam chitharan nao vaikasābing eina na̱ shimankasābing!

²⁰ Nathumwui khayām chi sikachāng lah Sabbaththang mashok khavai seihā sālu.

²¹ Kaja chitharan shokki kaji kakhanang kachot chi haokaphokwui eina thuilaga aja rāshungda mashoklakranga, kala mashokluilakmara.

²² Kala zimikshobing chi masha̱sang ngasakakha, mikumo akhala mahuikhuimara; kha kapangkhui kahai mibingwui vang eina zimikshobing chi sha̱sang ngasakra.

²³ Chiwui thili kachikathāna nali, ‘Yanglu, Khrista chi hili lei!’ lah ‘Chili leili’ da hānglala mashitsangalu.

²⁴ Kaja minama Khrista kala minama marānbing shokta, shapakha kapangkhui kahaibingli eina tangda thānngui khavai khudamla kala matakhak kahai otsakla kachungkha chitheira.

²⁵ Yanglu, ina nathumli sāngngarānda hāngkahaina.

²⁶ Chieina kachikathāna nathumli ‘Yanglu, a lamhāngli leili’ da hānglala mavāalu; lah ‘Yanglu, a shimlungli leili’ da hānglala mashitsangalu.

²⁷ Kaja rikhāna zingshoshong eina shoklaga zingtun ngasheikhavā thada, miwui Naomayarana kharāla chi tākamra.

²⁸ Kathingun khaleipam kachida khalāngbing kazipa.

Miwui Naomayara Kharā

²⁹ “Kachotkachāng atamwui thichangli zimikla tangmanghaora, kachāngla mahorluimara, kazingramwui eina sirābingla tātungra kala kazingramwui pangshapla nganukhaora;

³⁰ chiwui thili kazingramli miwui Naomayarawui machut chi theira; kala okathuili khalei miyur saikorana chapra, kala miwui Naomayarana pangshap kala tekmateilak eina muiyātungli tongda kharā theira;

³¹ kala kapanga talla̱khon eina ngasoda ana awui kazingraobingli chihoshokra kala athumna awui kapangkakhui mibingli achikun matiwui eina, kazingram akatang akhawui eina akatang akhali vāshungda khaleibingli kazipkhuira.

Khaorārongwui eina Theikakhui

³² “Khaorārongwui eina tamkhuilu: aphāngna nuiuda anah shokura̱akha mayo kachāng rāura da nathumna thei.

³³ Chi tākam eina nathumna saikora hi kathei tharan, A nganaihaira, ngaveichingli leihaira da nathumna thei.

³⁴ Kachangkhat ina nathumli kahāngna, ot saikora hi mashokranglakha thot hi makānthuimara.

³⁵ Kazingram kala okathuila shimānhaora, kha iwui tui mashimānlakmara.

Khipānakha Zimiksho eina Pung chi Matheimana

³⁶ “Kha zimiksho eina pung chi khipanakha matheimana, kazingramli khalei kazingraobing eina tangdala, kala Anaomayarala matheimana, Avāmāngna thei.

³⁷ Noahwui atamli kashok thada miwui Naomayarana kharāla chithāpapamra.

³⁸ Chitharan tara̱ maphongranglakha, Noahna marikhongli kākazang atam eina tangda athumna phakashak-phakazā, khamang-kazā, ngalākakhui kala fakathui ot sāsai;

³⁹ tara̱ phongda athumli makheithuiranglakha eina tangda khi shokhaokhala kaji athum matheimana, miwui Naomayarana kharāla chithāpapamra.

⁴⁰ Atam chitharan luili mi khani leisāra, akhali khuithuihaora kala akhali haihaora.

⁴¹ Preinao khanina mā rungsāra, akhali khuithuihaora, akhali haihaora.

⁴² “Ngasharda rimpamsālu, khikhalajila nawui Proho katharan rāra̱khala da nathum matheimana.

⁴³ Kha hi theilu, chiya shimva̱ china khale chi katharan rāra̱khala kaji atam theisāsi kaja ana ngasharda rimpamlaga khale chili awui shim mashaokhaizang ngasakmara.

⁴⁴ Chiwui vang eina nathumla ngaranpinghaisāphalungra, khikhalajila nathumna maphaningsālak kaji pung chili miwui Naomayara china rāra.

Kahāng Khanganā eina Makhanganā Rao

⁴⁵ “Chithākha kahāng khanganā kala thangkhama, shimva̱ china shimkhurwui kashok kazang saikora yangmi khavai kala atam chālak eina khangatei raobingli kashakazā khuimi khavai otsin horsangkhami rao chi khipakhala?

⁴⁶ Akhavāna kharā tharan chithada sāsāda rātheikakhuia rao chi sokhamina.

⁴⁷ Kachangkhat eina ina nathumli kahāngna, akhavāna rao chili awui khalalei lan saikorawuitungli chipamra.

⁴⁸ Kha makaphā rao china a khalatta ‘Iwui akhavā marāfamara’ da phaningda,

⁴⁹ awui rao ngasotnaobingli shaophokurakha kala khamaripbingli zārum mangrumakha,

⁵⁰ rao chiwui akhavā china raona machihānkasa zimiksho kala makathei pung chili hanungda,

⁵¹ ali tandi mira kala phākakhaningbingli ngasoda hairumhaora; chili mibingna kachapla chapra, ahāla tarira.