MATTHEW 23 - Kathara Bible (BSI)

Jishuna Ain Kathembing eina Phariseebingli Makhamayā

¹ Chiwui thili Jishuna yarui eina awui sākhangatha̱bingli hānga,

² “Ain kathembing eina Phariseebingna Moseswui pamli pama,

³ chieina athumna kahahāng hupta otsak eina sālu kala ngalanglu, kha athumna kasā thada masālu, khikhalajila athumna hāshoka kha otsak eina masāmana.

⁴ Athumna ritlak kahai maphungkharar otphun mibingwui yārtuili parmida ngava̱ ngasaka, kha athum khalatta otbing chili athumwui pāngmareng einala masingza̱mana.

⁵ Athumna athumwui kasāsā ot chi mina theikhavai sai; athumwui pāsi eina hār pākta sākhui kala chontheira̱ sānglak eina khanonga,

⁶ Zātkhānli athumna khangamkhareiwui pam kala synagogueli mathāmeikap kaje pam ningchānga,

⁷ kala athumna leihngaphāpamli athumli khayāshilak eina shalam kasā kala ojā da kaho ningchānglaka.

⁸ Kha nathumli ojā mahomara, khikhalajila nathumwui oja akha lei, kala nathum chinaongarāna.

⁹ Kala okathuili mi khipālikha avā mahoalu, khikhalajila nathumwui Avā akhamanga, ava kazingramli lei.

¹⁰ Nathumli akhavā dala maho ngasakalu, khikhalajila nathumwui akhamāng kaje akhavā che Khristana.

¹¹ Nathumwui lungli reimeikap kaje china nathum saikorawui rao sāphalungra;

¹² kachikathā reikhangaiya mi chili teongasakra, kala khalatta kateowana kaje chili reingasakra.

Jishuna Phākakhaningbingli Yonkashinam

¹³ “Ain kathemabing eina Phariseebing, phākakhaningabing! Nathumli kakhanang ringkashi ngasāranu, khikhalajila nathumna kazing wungramli zangki kajibingli shungnamda lei, kala nathum khalattala mazang lah zangki kajebingla mazang ngasakmana.

¹⁴ Ain kathembing eina Phariseebing, phākakhaningabing! nathumli kakhanang ringkashi ngasāranu, khikhalajila nathumna ra̱meinaowui shim ngaponkhui kala mānkhavai seihā sānglak eina sai, chiwui vang eina nathumna shongrān sakmeida samphangra.

¹⁵ Ain kathembing eina Phariseebing, phākakhaningabing! nathumli kakhanang ringkashi ngasāranu, khikhalajila nathumna ning khangachei mi akha samphang khavai ngalei kala shamadru kānda phāzata kala ana ngachei kahai eina nathumna ali khum khani mataida nathum thada kazeiramwui nao ngasā ngasaka.

¹⁶ “Mik khangapeo thānmebing, ‘kachikatha akhana khorumshimwui ming singda shākhi saakha, chiya khikha maningmana; kha kachikathana khorumshimwui sinawui ming eina shākhi saakha, ali awui shākhina khalapa’ da tamkachitheibing, nathum kakhanang ringkashi ngasāranu!

¹⁷ Nathum khangapeoa mangkhama̱bing! Sināna mataimeikā, sināli tharkhangasaka khorumshim mataimeikhala?

¹⁸ Kala nathumna hānga, ‘Kachikathāna hanphutwui ming eina mingzaiakha chi khikha maningmana, kha hanphuttungli khalei ot chiwui ming singda mingzaiakha ali china khalapa.’

¹⁹ Mik khangapeoa mibing! Kachigat ot mataimeikā chili tharkhangasaka hanphut mataimeikhala?

²⁰ Chiwui vang eina hanphutwui ming singda shākhi kasaa china chili kala chiwuitungli khalei otbing saikora chili mingzailaga shākhi kasāna;

²¹ kala khorumshimwui ming singda shākhi kasaa china chili kala chiwui alungli khalei Varewui mingli mingzaida shākhi kasāna.

²² Kala kachikathāna kazingramwui ming singlaga shākhi kasā chi Varewui wungpamkhong kala chiwuitungli kapama ali mingzailaga shākhi kasāna.

²³ “Ain kathemabing eina Phariseebing, phākakhaningabing! Nathumli kakhanang ringkashi ngasāranu, khikhalajila nathumna suirihan, shomri kala sāchikom hikathāthāwui tithe mi, kha ritkhameiya ainwui apong, mashun, lukhamashan kala shitkasang hikathāthāva mamayonmana; nathum hi sahairarāna, kateibing chila masāmara majipaimana.

²⁴ Mik khangapeo thānmebing! Nathumna hāchangnaoliva sishokhailaga utva mayuitai!

²⁵ “Ain kathemabing eina Phariseebing, phakakhaningabing! Nathumli kakhanang ringkashi ngasāranu, khikhalajila nathumna tengkot eina khongpheiwui ayar pheomathai, kha chiwui alungliya takzākakhui eina ngamarkakhui otna pemtinghai.

²⁶ Mik khangapeo Phariseebing! Rida tengkot eina khongpheiwui alung chi pheomathāhaifalu. Chithākha ayarla tharpaira.

²⁷ “Ain kathembing eina Phariseebing! phākakhaningabing! Nathumli kakhanang ringkashi ngasāranu; khikhalajila nathum hi teimachar kahai chikhurbing kathāna. Chiwui vang eina ayarli mathālak eina thei, kha alungliya kathibingwui ara̱kui eina makatharna pemting kahaina.

²⁸ Hi tākam eina ayarli nathumna mibingli mashunglak kahai thada theingasaka, kha alungliva phākakhaning eina moreina pemtinghai.

Tandi Samphangki kaji Jishuna Marānkhami

²⁹ “Ain kathembing eina Phariseebing! phākakhaningabing! Nathumli kakhanang ringkashi ngasāranu, khikhalajila nathumna marānbingwui chikhur sākāmi kala katharabingwui wonrā tekmatei ngasaka,

³⁰ kala nathumna, ‘Ithum awo-ayibingwui thotli okthuisasi kaja athumna kasā thada masāsāmara kala marānbingli shaokathatli mazangsāmara’ da hānga.

³¹ Chithada sāda nathum marānbingli sākathata mibingwui naongarāna kaji hi nathum khalatta kahāng china shākhi khamina.

³² Chieina navā ngarāna haophok kahai chi sākuphaolu.

³³ Phara̱bing, phara̱wui naongarābing, nathumna kazeiram vāki kajiwui eina kathada yāmshokpaira?

³⁴ Chiwui vang eina ina marānbing, thangkhameibing kala ain kathembing nathumwuili chihorai, nathumna kaikhali sāthatra, kaikhali krushtungli khāngkāra kala kaikhali synagogueli lijei eina ngaphitra kala athumli nathumna keinung akhawui eina keinung akhali rekharekra,

³⁵ okathuili khayon makhaleibingwui ashee tākahai saikora; chiya khayon makhalei Abelwui ashee eina thuilaga Barachiahwui naomayara Zechariah eina tangda nathumna kathara khorumshim eina hanphutpamwui ngachaili shaokathat saikora nathumwuitungli tāra.

³⁶ Kachangkhat ina nathumli kahāng hina, saikora hi thot hiwuitungli tāra.

Jerusalemli Jishuwui Leikashi

³⁷ “O Jerusalem! Jerusalem, marānbingli shaothata kala nawuili chihokharābingli lunggui eina horthata! Ina nawui naongarāli harva̱na anaoli angachangzingli kapum thada pumkhami kayākha shirakhala, laga chi nana masā ngasakmana.

³⁸ Yanglu, nawui shim horhaida ngachakyānghaira.

³⁹ Ina nathumli kahāngna, arui hiwui eina thuida nathumna, ‘Prohowui mingli kharā mi chi sokhamina’ da mahāngranglakha eina tangda ili matheiluimara.”