MATTHEW 19 - Kathara Bible (BSI)

Preigahar Kapāngwui pongli Tamkachithei

¹ Jishuna tui hi hāngchitheichamhailaga Galileewui eina thuihaowa kala Jordan kong kānlaga Judea ngaleili vāzanga,

² kala mi kachungkhana awui thi shurrai kala ana athumli apam chili kazāt raimi.

³ Phariseebingna rālaga chāng yangkida, “Mi akhana maram akhawui vang eina apreiva̱li pāngkahai hi ainlā?” da ali ngahāna.

⁴ Jishuna ngahānkai, “Anili kasema china haokaphokwui eina sha̱nao eina mayarnao sai da kapi kahai nathum mapārangla,

⁵ kala Varena hānga, ‘Hiwui vang eina mayara china ava̱ eina avāli chihohailaga preiva̱li ngarumhaora, kala ani khani akha ngasāhaora.’

⁶ Chiwui vang eina ani khani asā khani maningluimana, kha asā akhamānga. Chithākha Varena ngakummi kahai chili mi khipānakha masākhaiaranu.”

⁷ Athumna ngahanlui, “Chithākha mayarana kapāngwui lairik milaga apreiva̱li chihoranu da Mosesna kachiwui vang kakasokhala?”

⁸ Jishuna ngahānkai, “Mosesna nathumwui ning khamararwui vang napreiva̱ ngarāli pāngpaira da mayākhamina, kha haokaphokwui eina chi mathāmana.

⁹ Kha ina nathumli kahāngna, phokaphāwui vang maningla kachikathāna apreiva̱li pānghailaga sha̱nao khangateili khuiakha ana phokaphāna.”

¹⁰ Sākhangatha̱bingna ali hānga, “Preigaharni ngachaili hikathā shokra jiakha ra̱sa makaphā phāmei.”

¹¹ Jishuna ngahānkai, “Mi kachiva̱na tamkachithei hi mayāser kaji maningmana, kha Varena mikahai athum māngna khuikasangna.

¹² Kaja mi kaikhava ahonga sāda kapharā lei kala mi kaikhali mina ahonga sāngasaka kala mi kaikhava kazing wungramwui vang athum khalatta ahonga sākakhui lei. Tamkachithei hi khuisangshapa a china chi sāranu.”

Jishuna Naoshinaobingli Sokhami

¹³ Naoshinaobingli pāng parda seihā sāmi khavai mi kaikhana athumli Jishuwuili khuirai. Chieina sākhangatha̱bingna athumli khararra.

¹⁴ Kha Jishuna hānga, “Naoshinaobingli iwuili rāngasaklu, athumli mahaphaialu, khikhalajila wungram hiya athum kathāwuina.”

¹⁵ Chieina ana athumli somilaga thuihaowa.

Kashānga Yaronnao

¹⁶ Kala yanglu, Jishuwuili mi akhana rāda hānga, “Ojā, ina katang makhavai kharing samphang khavai khi kaphā ot sāphalungrakhala?” da ngahāna.

¹⁷ Chieina Jishuna ngahānkai, “Khiwui vang eina nana ili kaphāwui apongli ngahankhala?” “Kaphā kaho akhamāng lei. Nana kharingli zangngaiakha ningkhamibing chi mayonlu.”

¹⁸ “Kachipā” da ana ngahāna. Jishuna ngahānkai, “Mi mashaothatpaimana, maphophāpaimana, maleepaimana, mikhanam shākhi masāpaimana;

¹⁹ nava̱ navāli khayāshilu, kala nawui khongnainaoli na khalatta leikashi thada leishiphalungra.”

²⁰ “Saikora hi ina mayonserhaira” da yarona china ngahānkai, “Khi khavāt leifakhala?”

²¹ Jishuna ali hānga, “Nana peichaongaiakha, ungulu, laga nawui khalalei saikora yorserhailaga kachāmnaoli mihaolu. Chieina kazingramli nawui lan leira. Chiwui thili rāda ithi shurlu.”

²² Yarona china tui chi kashā eina wukkhananglak eina thuihaowa, khikhalajila a shānglaka.

²³ Chiwui thili Jishuna awui sākhangatha̱bingli hānga, “Ina nathumli kachangkhat eina kahāngna, kashānga akhana kazing wungramli zangki kaji hi saklakra.

²⁴ Kala ina nathumli hāngluishitli, kashānga mi akhana Varewui wungramli zangki kajile utna kapimkhurli ngara̱kashokna paimei.”

²⁵ Sākhangatha̱bingna chi shālaga matakhakhaida hānga, “Chithākha khipāli huimipairakhala?”

²⁶ Kha Jishuna athumli yanglaga hānga, “Mikumowui vanga hi masāpaimana kha Varewui vanga masākapai maleimana.”

²⁷ Chiwui thili Peterna ngahānkāda hānga. “Yanglu, ithumna ot saikora horhaida nathi shurhaira. Chithākha ithumna khi samphangrakhala?”

²⁸ Jishuna athumli hānga, “Kachangkhat eina ina nathumli kahāngna, kadhara oathuili, miwui Naomayarana awui tekhamatei wungpamkhongli kapam tharan, ithi kashura nathumla wungpamkhong tharada khanili pamda Israel shang tharāda khanili bichar sāra.

²⁹ Kala iwui mingwui vang shim lah chinao ngarā, azarva̱ ngarā, ava̱-avā, naongarā kala ram horkahai mi kachiva̱ shākha mataida samphangra kala makashimān kharing mirin mathunkhuira.

³⁰ Kha arui khare kasābing kachunga naothuihaora kala khanaobingna rihaora.