MATTHEW 18 - Kathara Bible (BSI)

Khipā Hakmeikapkhala?

¹ Atam chili sākhangatha̱bingna Jishuli rangahāna, “Kazingramli khipā hakmeikapkhala?”

² Chieina ana naoshinao kateowa akhali hokhuida athumwui ngachaili nganing ngasakta

³ hānga, “Kachangkhat eina ina nathumli kahāngna, nathumna ningngateida naoshinao thada mathaakha kazing wungramli mazangrarlakmara.

⁴ Kachikathā khalatta naoshinao thada malungkhanima a china kazing wungramli hakmeikap kajena.

⁵ Hikathā naoshinao akhali iwui mingwui vang khuikasanga a chi ili khuikasangna.

Moreili Suikasang

⁶ “Kha kachikathāna ili shitkasanga kateowa naoshinao akhali morei sāngasakakha chikathā mili lungriham kahaka akha akahungli hokthangmihailaga kathuka shamadruli hikthat ngasak kahaina phāmei.

⁷ Morei sākhavai kasuiwui vang okathuili kakhanang ngasaranu! Kaja kasui hi rāphalungra, kha kasui rākhangasaka mi chi kakhanang ngasaranu!

⁸ “Kala napāngna lah napheina nali morei sangasakakha, chi katatkhuilaga horhaolu; pāng khani, phei khani kālaga katang makhavai meifali zangki kajile sheisha̱laga lah phei teklaga katang makhavai kharingli kazang phāmei.

⁹ Kala nawui mikna nali morei sangasakakha, chi latshokkhuilaga horhaolu; mik khani kālaga makhamita meifali zangki kajile mik akhamāng kālaga katang makhavai kharingli kazang phāmei.

Yaonao Shimān kahaiwui Chānjam

¹⁰ “Naoshinao kateowa akhalila ningachai kahai masaalu, khikhalajila nathumli kahāng hina kaja athumwui kazingraobingna kazingramli khaleia Ishāvawui mai theichingda lei.

¹¹

¹² Nathumna khi phaningli? Mi akhana yao shākha leilaga akha pākthuihaiakha ana hangchikoda chiko chi phungreili haisālaga pākthui kahaia chili maphāmarala?

¹³ Kala ana chi samphanghaiakha, kachangkhat ina kahāngna, mapākthuilak kaje hangchikoda chiko chili mataimeikharda ana pākthui kahaia yao akha chiwui vang ringphameikharra.

¹⁴ Chieina kateowa hibingwui ngachaili akha shiman ngasaki kaji hi kazingramli khaleia iwui Avāwui ningkachāng maningmana.

Morei Kasā Achinā akha

¹⁵ “Nachināna nawuitungli khayon sāhaiakha, ali vālaga nanimāng ngasopamlaga awui khayon chi hāngmilu, ana mayākha nana nachināli yuikhuihaira.

¹⁶ Kha ana nali mahengsangakha, mi akha lah khani ngasophungda vālu. Chithākha tui kachiva̱ hilaka mi khani lah kathumwui shākhi chieina khuipaira.

¹⁷ Ana athumlila mahengsangakha churchli hāngchitheilu; kala ana churchlila mahengsangakha nathumwui vanga a hi Gentile kala khāshinā kakhuia kathāna da khuilu.”

Kakhalap kala Kachiho

¹⁸ “Ina nathumli kachangkhat eina kahāngna, kachikathāli nathumna okathuili khalap kahahai chi kazingramlila khalapra, kala nathumna okathuili khalāmi kahai chi kazingramlila khalāmira.

¹⁹ Ina nathumli hāngluishitli, nathumwui ngachaili mi khanina kachikatha akha kapo chi okathuili mayā ngarokakha, kapo chi kazingramli khalei iwui Avāna mira.

²⁰ Khikhalajila iwui mingli khani lah kathum kazipakha, athumwui chili I zangda lei.”

Mapheokhame Rao akhawui Chānjam

²¹ Chiwui thili Peterna ali rāhānga, “Proho, ichināna iwuitungli kayākhashida khayon sāpaira, kala ina pheomipairakhala? Shini shira̱lā?”

²² Jishuna ali hānga, “Ina nali shini shira da mahāngmana, kha hangshini shini shida kajina.

²³ Chiwui vang eina kazing wungram hiya awunga akhana awui raobingwui hishap tharkhuikhangai chili ngaheopai.

²⁴ Ana hishap sāphokcham kaji tharan lupā thingthara kashuka mi chili awuili khuirai;

²⁵ kala ana chi marunrarthuda, chi runkhavai apreiva̱la, anaongarāla kala awui khalalei ot saikorala yorserhaolu da akhava china hukhum mi.

²⁶ Chieina rao china khuktizangda ‘Amei, ili khangaraimilu, ina runsera’ da poi.

²⁷ Kala ali lukhamashanwui vang eina rao chiwui akhavā china ali chihomihaowa kala leimanla kokmihaowa.

²⁸ Kha raopā chi kayāng kashok eina awui lupā shākha shuk kahaiya rao sakharuma akha samphanga, kala ali kharokli singkhuida hānga, ‘Iwui leiman chi milu.’

²⁹ Chieina awui ngasota raopā china ngakhumzangda, ‘Ili khangaraimilu, Ina runmira’ da poi.

³⁰ Ana mamayāthuda mipā chili leiman chi marunranglakha eina tangda phātopli sanghaowa.

³¹ Awui rao ngasotnao kateibingna chi kathei eina wukkhananglakhaowa, kala athumna athumwui akhavāli shokkahai saikora chi ahānga.

³² Chieina awui akhavā china raopā chili hokhuilaga hānga, ‘Makaphā rao, nana ili kapowui vang ina nawui leiman saikora kokmihaira;

³³ ina nali lumashankhami chithada nanala nawui ngasota raopā chili malumashanmipaimala?’

³⁴ Akhavā china malungvāt eina awui leiman saikora marunranglakha eina tangda phātopli sangkhavai kashinabingwui pāngli horsangmihaowa.

³⁵ Chithada sāda nathumna nachinā ngarāwui khayon khamāng chi wuklung eina mapheomiakha kazingramli khaleia iwui Avā chinala nathum kachiva̱li chithada sāra.”