MATTHEW 17 - Kathara Bible (BSI)

Azak Khaon

¹ Kala zimiksho tharuk thangwui thili Jishuna Peter eina James kala agato Johnli thānphungda phungrei kajuiva̱ akhali kāda athummang apama.

² Kala athumwui miktāli Jishu azak onhaowa: amai zimik thada horra kala awui kashankachonla kahor thada charshihai.

³ Kala yanglu, Moses eina Elijahna Jishuli chān khangazek chi athumna thei.

⁴ Kala Peterna Jishuli hānga, “Proho, ithum hili leikasā hi phālakhaira. Nana mayāmiakha nawui vang akha, Moseswui vang akha kala Elijahwui vang akha da ina rāmnao kathum sāmiga.”

⁵ Ana matuimahunglakha, yanglu, horchamri kahai muiyāna athumli ngapuikhamhaowa kala muiyālungwui eina akhon akha vaorada, “Hi iwui khaluma Naomayarana, ali Ina ningyāng unglaka, awui kahāng nganālu.”

⁶ Sākhangatha̱bingna chi kashā eina ngacheenāhaida ngakhumzangsera kala khakshingakhaowa.

⁷ Kha Jishuna athumli rāsaza̱da hānga, “Ngakarthuilu, mangacheealu.”

⁸ Chieina athumna yangkakā tharan Jishu maningla khipākha maleisāthuwa.

⁹ Athumna phungreiwui eina katā tharan Jishuna athumli, “Miwui Naomayarana kathiwui eina maringshokranglakha eina tangda khamahā hi khipālikha mahāngalu” da ningmi.

¹⁰ Chieina awui sākhangatha̱bingna ngahāna, “Chithākha khi sāda Elijahna rāriphalungra da ain kathembingna hāngkhala?”

¹¹ Jishuna ngahānkai, “Elijahna rālaga ot saikora ngarānpinghaisāra.

¹² Kha ina nathumli kahāngna, Elijah rāhaira, kha mibingna ali mamachuthuwa kala ali athumna sākhangangai sai. Chi tākam eina miwui Naomayarala athumwui pāngli kachotkachāng samphangra.”

¹³ Chiwui thili Jishuna Ra̱hikme Johnwui pongli khamatuina kaji hi sākhangatha̱bingna bhap tāhaowa.

Kameo Kazanga Naoshinao akhali Raikhami

¹⁴ Athumna yaruili latkhaung tharan kachikathā mi akhana awui mangāli rākhuktizangda hānga,

¹⁵ “Ojā, inaomayarali khalumashanmilu, kaja a zingmeirai kakazā mina kala zakshilak eina kazāda meilila, tara̱lila tāzangzang jichinghaowa.

¹⁶ Ina ali nawui sākhangatha̱bingwuili khuirai kha athum maraimirarthuwa.”

¹⁷ Chieina Jishuna ngahānkai, “He shitkasang makhaleia ngakaikashe thot, ina nathumli karankha ngasopamfara? Ina nathumli karankha ja̱mifarakhala? Ali iwuili khuirālu.”

¹⁸ Jishuna kameo chili kakaso eina kameo chi shokhaowa kala naoshinaopā chi ngalāngda raihaowa.

¹⁹ Chiwui thili sākhangatha̱bing china Jishumang khalei atamli rāda hānga, “Kachiwui vang eina ithumna kameo chi makashamshokrarthukhala?”

²⁰ Jishuna ngahānkai, “Marama nathumwui shitkasang vātkahaiwui vangna. Ina nathumli kahāngna, nathumna shitkasang kayānghanthā rikha leiakha, phungrei hili nathumna ‘Hiwui eina araa chili vālu’ jilala vāra. Nathumna khikha masākharar maleimara.”

²¹ “Kha hikathā hiya seihā kasā kala kakhum eina maningla kalikha mashokrarmana.

Jishuna Awui Thiki kaji Hāngkhamarān

²² Athumna Galileeli kazipta leilakha Jishuna athumli hānga, “Miwui Naomayarali mibingwui pāngli horsangmihaora,

²³ athumna ali shaothatra; kha kathumthangwui thili ringshokluishitra.” Chieina sākhangatha̱bing wukhananglakhaowa.

Khorumshimwui Khājanā Kashān

²⁴ Athumna Capernaumli ungkazang tharan khorumshimwui khāshinā khangashaibingna Peterli rāngahāna, “Nathumwui ojā khāshinā chi mamimalā?”

²⁵ “Miya” da ngahānkai. Kala ana shimlung kazang eina Jishuna rimeikapta ali ngahāna, “Simon, nawui kaphaning khikhala? Okathuiwui awungabingna khāshinā kala shai hi khipāwui eina khuikhala? Naomayara ngarāwui eina khuikā, khangateiwui eina khuikhala?”

²⁶ Kala ana, “Khangateibingwui einana” da kahāng eina Jishuna ali hānga, “Chithākha naomayara ngarāva khalemna.

²⁷ Chithālala athum malungmavāt khavai shamadruli vālaga khaisui akha ahorsanglu, nana samphangkhare khai chi khuilaga khamor phākkhayang tharan shekel akha samphangra; chi khuilaga iwui eina nawui chi shānmihaolu.”