MATTHEW 16 - Kathara Bible (BSI)

Machut Ningkachāng

¹ Phariseebing eina Sadduceebing rāda ali chāng tamyang khavai kazingramwui eina machut akha chitheilu da poi.

² Ana athumli ngahānkai, “Zingyinlam zingko shokhaiakha, ‘Zingyat mathāhaora, zingko shokhaira’ da nathumna hānga.

³ Kala ngathorshong kazing kahungla hung, tangkhamangla tangmangakha ‘Aja siphan zingrot ngasha̱ra’ da nathumna hānga. Nathumna kazingwui maong yanglaga marānshapa, kha nathum atamwui machutbing chi makhalatrarmana.

⁴ Makaphā makhayā kala phophāt thot hina machutmāng phāzata. Kha Johnawui machut chi maningla machut khangatei nathumli mamimara.” Chieina ana athumli chihohailaga zatthuihaowa.

Phariseebing eina Sadduceebingwui Khawok

⁵ Sākhangatha̱bing china lākhavāk kākashung tharan athumna khuiphungki kaji khamui chi malaihaowa.

⁶ Jishuna athumli hānga, “Phariseebing eina Sadduceebingwui khawok chili ningngasharlu.”

⁷ Kala athum khalatta hi ngazekta hāng ngaroka, “Ithumna khamui makhuikaphungthura.”

⁸ Kha Jishuna chi theihaoda hānga, “He shitkasang kateobing, khamui makhuikaphungwui vang nathum khisāda ngazek ngarokhala?

⁹ Nathum aruila bhap matāranglā? Ina khamui phangā serkhailaga mi thingphangāli mizālaga nathumna luk kayākha kazipkhuikhala kaji maphaningungmala?

¹⁰ Lha khamui shini eina mi thingmatili yaoshaihailaga luk kayākha kazipkhuikhala kajila malaihairalā?

¹¹ Ina khamuiwui vang khamatui maningmana kaji hi nathumna kathada matheikhuirarthukhala? Phariseebing eina Sadduceebingwui khawok chili ningngasharlu.”

¹² Chieina Jishuna khamuiwui khawokli kahāng maningla Phariseebing eina Sadduceebingwui tamkachitheili ningngasharlu da kahāngna kaji sākhangatha̱bingna bhap katā samphanga.

Peterna Khrista Hāngkaphat

¹³ Jishuna Caesarea Philippiwui ngaleili vākazang tharan awui sākhangatha̱bingli ngahānna, “Miwui Naomayarali mibingna khipāna da hāngkhala?”

¹⁴ Athumna ngahānkai, “Kaikhana Ra̱hikme Johnna ji, kaikhana Elijahna ji, kala khangatei kaikhana Jeremiah maningakha marānbingwui ngachaili akhara da hānga”.

¹⁵ Ana athumli hānga, “Kha nathumna I khipāna da hāngkhala?”

¹⁶ Simon Peterna ngahānkai, “Na Khrista, kharinga Varivarawui Naomayara china.”

¹⁷ Chieina Jishuna ali ngahānkai, “Johnwui naomayara Simon, na ka̱lā mahai! Kaja nali asā khavaiya kala ashee kazangana phongkhami maningmana, kha kazingramli khalei iwui Avāna phongkhamina.

¹⁸ Kala ina nali kahāngna, na Peterna kala lunghār hiwuitungli ina iwui church sākara, kala kathiwui pangshapna chili mayuirarmara.

¹⁹ Ina nali kazing wungramwui sho chi mira, kala nana okathuili khalap kahai chi kazingramlila khalaphaira, kala nana okathuili khalākhami chi kazingramlila khalāmira.”

²⁰ Chiwui thili sākhangatha̱bingli A hi Khrista china kaji chi khipalikhala mahānglakalu da ningmi.

Jishuna Awui Kachotkachang kala Kathi Hāngkhamarān

²¹ Atam chiwui eina thuida Jishuna awui sākhangatha̱bingli, ana Jerusalemli vālaga ararnaobing, pāngmon akhokabing kala ain kathembingwui eina kachotkachāng tarākha samphangra kala shaothathaora kha kathumthangwui thili ringshokluishitra kaji chitheiphokhaowa.”

²² Kala Peterna ali hokhuilaga kaharphokta hānga, “Varena mamayāmana, Proho! Nali chithada mashoklakmara.”

²³ Kha ana ngareivāda Peterli hānga, “Iwui khanukshong unghaolu, Satan! na ili sheikakhautana; kaja na Varewuishong maningla mikumowuishong lei.”

²⁴ Chiwui thili Jishuna awui sākhangatha̱bingli hānga, “Kachikathāna ithi shurga jiakha, khalattali malaihailaga, awui krush phungda ithi shurranu.

²⁵ Khikhalajila, awui mirin ngatangkhuira kaje a chi shimānra; kala kachikathāna iwui vang eina awui mirin shimānmiakha ana chi samphangra.

²⁶ Kaja mi akhana okathui tongda samphanglaga awui mirin shimānhaiakha awui tongkaza khi leikhala? Lha mi akhana awui mirin eina ngatha̱khuikapai khi leikhala?

²⁷ Khikhalajila miwui Naomayarana awui kazingraobingli ngasoda Avāwui tekhamatei eina rāki kajina, kala chiwui thili mi kachiva̱li kachichāna sākahai chiwui athishurda ana runmira.

²⁸ Ina nathumli kachangkhat kahāngna, miwui Naomayarana awui wungramli kharā matheiranglakha kathi mamazapki kaji mi kaikha hili nganingda lei.”