MATTHEW 15 - Kathara Bible (BSI)

Awo-ayibingwui pongli Tamkachithei

¹ Chiwui thili Phariseebing eina ain kathembing kaikhana Jerusalemwui eina rāda Jishuli rāngahāna,

² “Khisāda nawui sākhangatha̱bingna awo-ayibingwui khangachā chonmakānhaokhala? Kaja athumna phakazā atamli pāng mamazikmana.”

³ Ana athumli ngahānkai, “Thākha khiwui vang eina nathumna nathumwui khangachā sākasā chiwui vang eina Varewui ningkhami sākhaihaokhala?

⁴ Kaja Varena kasohai, ‘Nava̱ navāli khayāshilu’ kala ‘Avāva̱li lah ava̱va̱li sui kasa a chili thingasak phalungra.’

⁵ Kha nathumna kahāng, kachikathāna avāva̱ lah ava̱va̱li ngachon khavai leisālala ‘Hi Varewuina’ da hāngakha avāva̱li khayāmashilala phai.

⁶ Chieina nathumwui khangachā sākasā chiwui vang eina Varewui tui chi nathumna makakachanga sāngasakhaowa.

⁷ Phākakhaningbing! Isaiahna nathumwui maramli phongkhamarān chi kayākha mashunghao, ana hānga:

⁸ ‘Mibing hina morchai eina ili khayāshiya, kha athumwui wuklung iwui eina katāva̱li lei;

⁹ arema eina athumna ili khoruma, mikumona semkakhui ain chi iwui ainna da tamchithei.’”

Makhao Khangasaka Ot

¹⁰ Chiwui thili Jishuna yarui chili hokhuida hānga, “Nganākazakhuilu kala theishingkhuilu:

¹¹ khamorli kazang china mili makhao khangasak maningmana, kha khamorwui eina kashok china mili makhao khangasakna.”

¹² Chiwui thili sākhangatha̱bingna ali rāhānga, “Nawui kahāng chi Phariseebing ning sāza̱haowa da na matheikhala?”

¹³ Ana ngahānkai, “Kazingramli khaleia iwui Avāna malingkasang thingrong kachiva̱ phurshokhaora.”

¹⁴ “Athum chithasaranu; athuma mik khangapeo kathānana; khangapeo akhali khangapeo akhana thānakha khanini khorchopli tāzangra.”

¹⁵ Kha Peterna hānga, “Chānjam chi ithumli meichitheilu.”

¹⁶ Chieina Jishuna hānga, “Aruila nathumla matheishingkhuiranglā?

¹⁷ Khamorli kasangsang chi paiphonli tāzanglaga phasāwui eina shokhaowa kaji matheimala?

¹⁸ Kha khamorwui eina kashok chi wuklungwui eina kashokna, china mili makhao ngasaka.

¹⁹ Kaja wuklungwui eina makaphā kaphaning: shaokathat, phokaphā, shāmkasā, khaleekasa̱, makhamashung shākhi khami kala khamashāt shoka.

²⁰ Mili makhao khangasak chi hibing hina kha apāng mamazikla phākazā china mili mamakhao ngasakmana.”

Sha̱nao Akhawui Shitkasang

²¹ Jishuna apam chiwui eina zatthuihailaga Tyre eina Sidonwui ngaleili vāhaowa.

²² Kala yanglu, ngalei chili kapāna Canaanwui sha̱nao akha awuili rāda, “He Amei, Davidwui Naomayara, ili khalumashanmilu; inao ngalāva̱li kameo zanghaida marlak eina kazāda leili.”

²³ Kha Jishuna ali khituikhala mangahānkāmana. Chieina awui sākhangatha̱bingna ali rāhānga, “Sha̱nao hili thuingasakhaolu, ana ithumli ngakaochingda lei.”

²⁴ Jishuna ngahānkai, “Ili shimān kahai Israel shimkhurwui yaonaobingwui vāngmang shirātkharāna.”

²⁵ Kha sha̱naopāva̱ china amangali khuktizangta, “Amei, ili khangachonmiphalunglu” da hānga.

²⁶ Chieina Jishuna ngahānkai, “Naoshinaobingwui zāt khuilaga fali hormi kahai mangachāmana.”

²⁷ Sha̱naopāva̱ china ngahānkai, “Mha, Proho, chithalala fabing eina tangda akhavāwui eina tākatung zatpā chi ngamuizai.”

²⁸ Chieina Jishuna ali ngahānkai, “O sha̱nao, nawui shitkasang haklāka! Nawui ningkachāng chithada shokranu.” Kala anao ngalāva̱ chi pung chichangli raichaohaowa.

Mi Kachungkhali Raikhami

²⁹ Jishuna apam chiwui eina zatlaga Galilee shamadruvāk vai. Kala phungrei chili kāpama.

³⁰ Mi kachungkhana phei katek, mik khangapeo, khak khangasha̱ kala khangatatei kachungkha khuirāda Jishuwui mangāli rāhai kala Jishuna athumli raimi,

³¹ chieina khangasha̱na matuikapai, pāng katekali raikhami, phei katekana kazat kala mik khangapeoana kathei chi mibing china theilaga matakhakhaowa; kala athumna Israelwui Vareli masochikata.

Mi Thingmatili Mikazā

³² Chiwui thili Jishuna awui sākhangatha̱bingli hokhuida hānga, “Ina yarui hili lumashanlakhaira, khiwui vangkhala kaja athumna ili ngasokapam hi kathumthang kāhaira, laga athum zākhavai khikhala maleimana; kala shongfali athum vānhaipaishina da kakhum eina athumli mashiunngaimana.”

³³ Chieina sākhangatha̱bingna ngahānkai, “Yarui hiyākha hili mizā khavai lamhāng hili kashakazā ithumna kali vākhuirakhala?”

³⁴ Chieina Jishuna athumli ngahāna, “Nathumwuili khamui kayākha leilikhala?” Athumna ngahānkai, “Khamui shini kala khai kateokha leili.”

³⁵ Chieina Jishuna yarui chili pamzang khavai kasoi,

³⁶ ana khamui shini kala khai chi khuilaga ningkashi seihā sai kala serkhailaga sākhangatha̱bingli mi, chieina athumna yaruili yaowa.

³⁷ Athum saikorana penlak eina zākhui kala katai chi luk shini kazipkhuiya.

³⁸ Chi kazāli kazang mi mashing chi sha̱nao kala naoshinao mazangla mi thing matina.

³⁹ Chiwui thili Jishuna yarui chili shiunhailaga marikhong akhali tongphungda Magadan ngaleivāk vāhaowa.