MATTHEW 14 - Kathara Bible (BSI)

John Ra̱hikmewui Kathi

¹ Atam chitharan khamunga Herodna Jishuwui mingzat chi shai;

² kala ana awui raobingli hānga, “Hipā hi Ra̱hikme Johnna, kathiwui eina ringshok kahaina; chiwui vang eina ana matakhak kahai ot sākashap pangshap khaleina.”

³ Kaja Herodna agato Philipwui apreiva̱ Herodiaswui vang eina Johnli tukkhuida khalaphailaga phātopli sanghaisai;

⁴ khikhalajila Johnna, “Nana Herodiasli khangakum hi ain maningmana” da hānghaowa.

⁵ Herodna ali shaothatngaisālala yaruili ngacheehaowa, kaja Johnli marānna da yaruina khui.

⁶ Kha Herodwui kapharā ungshungthang Herodiaswui naongalāva̱na yarui mangāli pheichak sai kala Herod penlakhaowa;

⁷ chieina ana sha̱nao chili ana kapopo chi milākra da tuingashit sai.

⁸ Ava̱va̱wui tui khuilaga, “Ra̱hikme Johnwui kui khongphei akhali sanglaga milu” da ana poi.

⁹ Awunga wukhananglak haowa, kha awui tuingashit kala ngasotnaobingwui vang eina kapo chi mihaolu da kasoi.

¹⁰ Ana mi shivātvāda phātopli Johnwui kui arangkhuingasaka;

¹¹ kala akui chi khongpheili sanglaga khuiungda sha̱naopāva̱ chili mi, kala ana chi ava̱va̱li khuiungmihaowa.

¹² Kala awui sākhangatha̱bingna awui angun chi akhuilaga chizanhaowa kala athumna Jishuli ahānga.

Thingphangāli Mikazā

¹³ Ara Jishuna pao chi kashā eina marikhong akhali tongda thuihaowa, kala ngachakyāng kahai apam akhali vāhaowa. Kha yaruina chi shālaga keinungwui eina phei athi shurvai.

¹⁴ Jishuna ngayipheili kashok eina mi kachungkha chili theilaga lumashanlakhaoda athumwui kazātla raimi.

¹⁵ Zingyinlam awui sākhangatha̱bingna ali rāhānga, “Kazing yinghaira kala apam hi ngachakyāng kahai apamna. Ruinganai kha̱bingli vālaga athum khalattawui kashakazā alozā khavai yarui hi chihohaolu.”

¹⁶ Jishuna hānga, “Athum mathuilala phai, nathumna athumli zākhavai khamilu.”

¹⁷ Athumna ngahānkai, “Ithumwuili khalei hiya khamui phangā kala khaih khanimānga.”

¹⁸ Chieina ana hānga, “Chibing chi iwuili khuirālu.”

¹⁹ Chiwui thili Jishuna yarui saikorali khawotungli pamzang khavai kasoi, kala khamui phangā eina khaih khani chi khuilaga kazingramli yangkāda somi, kala serkhaida khamui chi sākhangatha̱bingli mi, sākhangatha̱bingna yaruili yaowa.

²⁰ Athum saikorana ningyāngunglak eina zākhui kala katai chi sākhangatha̱bingna luk tharāda khani kazipkhui.

²¹ Athum kazābing chi sha̱nao eina naoshinao mazangla mi thingphangā sha̱khaya.

Jishuna Yireitungli Kazat

²² Chiwui thili Jishuna yaruili shiunmahungda leilakha sākhangatha̱bingli marikhongli kātong ngasaklaga ngayi lākhavāk rida vāngasakhaowa.

²³ Ana yaruili shiunkup kahaiwui thili seihā sākhavai kaphungli amāng kāhaowa. Kazing khaying eina tangda chili pama.

²⁴ Kha atam chitharan marikhong hi ngayilungli ngaphongzatta ngalei kathengwui eina tālakhaowa kaja masina phanvāhairasai.

²⁵ Ngayawui pung matimaikhali Jishuna shamadrutungli zatta athumwuivāk rārāsai.

²⁶ Kha ana ngayitungli zatkharā chi sākhangatha̱bingna kathei eina ngacheenahaida, “Hi mika̱lāna” da panglāk eina vaowa.

²⁷ Jishuna heng sāda hānga, “Pingmeilu, ina; mangacheealu.”

²⁸ Chieina Peterna ngahānkai, “Amei, nana jiakha ilila tara̱tungli zatta nawuili rāngasakmilu.”

²⁹ “Rālu” da Jishuna ngahānkai. Chieina Peterna marikhongwui eina shoklaga Jishuwuili vākhavai tara̱tungli zatvai;

³⁰ kha ana masi kaphan chi theida ngacheehaowa kala tara̱li ngaphumamān kaji eina “Amei, ili kakanmilu” da vaowa.

³¹ Jishuna ngalāngda apāng katingvālaga ali yonkhuida hānga, “He shitkasang kateowa mi, khisāda ningmaongkhala?”

³² Ani khani marikhongli kākatong eina masila maphanthuwa.

³³ Kala marikhongli tongkasa mibingna ali khorumda hānga, “Kachangkhat na Varewui Naomayaralaka.”

Gennesaretli Kazāt Raikhami

³⁴ Athumna kānkahawui thili Gennesaret ngaleili vai.

³⁵ Kala apam chiwui mibingna ali Jishuna da kathei eina kuikhamareili khalei kha̱bingwui eina kakazā mi kachungkha khuirai,

³⁶ kala athumna kakazānaobingli awui chontheira̱mānglila sāza̱khui khavai poi kala chili sāza̱kakhui saikora kharai samphanga.