MATTHEW 13 - Kathara Bible (BSI)

Athā Khayaowui Chānjam

¹ Chithang Jishuna shim chiwui eina shoklaga ngayipheili apama.

² Kala mi kachungkhana ali puiruikhama, chieina ana marikong akhali kātonga kala yaruiva ngayipheili nganinga.

³ Ana apong tarākha chānjam eina tamchitheida hānga: “Athā khayaoa akhana athā yakhavai vai.

⁴ Kala ana khayao eina athā kaikhana shongfapheili tātunga, chi vānaobingna rāngamuizāhaowa.

⁵ Athā kaikhana ngalei tarākha makhalei lungguipamli tāzangda thaklāk eina kharshoka kaja ngalei chi mathukmana,

⁶ kha zimik kashok eina zinghām kaprorda alungbing chi angayung thukta makhalei wui vang ngahuihaowa.

⁷ Kaikhana ka̱shātbingwui ngachaili tāzangda ka̱shātrongbing hakkasang eina shangthathaowa.

⁸ Kaikhana ngalei katumpamli tāzangda athei mathei, thingrong kaikhali athei shāshā kala khangateili hangtharuruk thumrārā mathei.

⁹ Shākhavai khanā kakā a china shākhuiranu.”

Chānjambingwui Kharin

¹⁰ Chiwui thili sākhangatha̱bingna ali unghānga, “Khiwuivang eina nana athumli chānjam eina tamchitheikhala?”

¹¹ Chieina ana athumli ngahānkai. “Nathumli kazing wungramwui ngathum kahai chi thei khavai mihaira, kha athumli chi mamimana.

¹² Kaja khalei a chili mataimeida mirorra, chieina ana chungmeikhar leihaora. Kha makhaleia a chiwui eina kateokha khalei chila khuishokhaora.

¹³ Chiwui vang eina ina nathumli chānjam eina tamkachitheina, khiwui vangkhala kaja athumna yanglala matheimana, nganālala mashāmana kala theishingkakhuila maleimana.

¹⁴ Marān Isaiahna hāngmarān kahai chi athumli ungshunga, chi hithada hānghai: ‘Nathumna shākachangra kha bhap matāmara, kala nathumna theikachangra kha mamachukmara.

¹⁵ Kaja mibing hiwui ning tangmanghaira, khanāla mashāpaithura, athumwui mikla mikpihaira, chi mathāsāsi kaje athumwui mik eina theira, kala khanā eina shāra, athumwui ning eina bhap tāshapra, kala athumli raimi khavai ili ngareirāra.’

¹⁶ “Kha nathumwui mik kala khanā sokhami ngasaranu, kaja mikna thei, kala khanāna shai.

¹⁷ Ina nathumli kachangkhat kahāngna, marān kala khangaronga mi kachungkhana nathumna kathei thada theingailaksai; kha matheirarthuwa, kala nathumna kashā chi shāngaisai, kha chi mashāthuwa.

Athā Khayao Chānjamwui Kakhalat

¹⁸ “Chieina athā khayaoawui chānjam hi nganākhuilu.

¹⁹ Kachikathā akhana wungramwui tui shālaga bhap makatā tharan nawui wuklungli yaosang kahai athā chi chipee china rāyonthuiya; chi shongfapheili yaosang kahai kathāna.

²⁰ Ngalei makhalei lunggui tungli yaokahai athā chiya shākhaleoda heng sāda khamathān eina khuikasangpā chikathāna;

²¹ thalala awuili angayung maleithuwa, kha kasha̱nakhawui vang khānglaga tui chiwui vang kakhanang kachot nilala, rekakharek nilala kharā eina ngalāngda sana̱unghaowa.

²² Ka̱shātronglungli yaosang kahai athā chiya tui chi shālala mirinwui vang malungkharing kala lanli leikashina tui chi shangthathaowa kala atheila mamatheithuwa.

²³ Ngalei katumpamli yaokahai kathā chiya tui chi shālaga bhap tākhuida atheila mathei, kaikhana shāshā, hangthararuk kala kaikhana thumrārā mathei.”

Rāmanbingwui Chānjam

²⁴ Khangatei chānjam akhala athumli hāngchithei; “Kazing wungram hiya mi akhana awui luili athā khamathā yaosang kahai eina chānjam sāpai,

²⁵ kha mibingna piphup eina leilakha awui yangkashena mā ngachaili rāman rāyaosangmihailaga thuihaowa.

²⁶ Mārongbing chi haksangda māmazan shokkaphok tharan rāmanbing chila thuiuwa.

²⁷ Chieina shimva̱ chiwui raobingna ali unghānga, ‘Amei, nana nawui luili athā khamathā mayaosangmalā? Chithākha kathada rāman zanghaokhala?’

²⁸ Ana ngahānkai. ‘Yangkashe akhana sākāhaira.’ Raobing china ali ngahāna, ‘Thakha rāmanbing chi ithumli aphurshokhaolu kajila?’

²⁹ Kha ana ngahānkai, ‘Maningmana, nathumna rāmanbing chi phurkashokli mārongla phurshoknarhaipaishina.

³⁰ Māhā marāranglakha eina tangda khanini chi phorrumsāranu; māhā atamli kahātbingli rāmanbing chi meili riktā khavai rida hātlaga vamvam eina tankhuilu kha mā chiya iwui chumli hailu’ da ina hāngnaora.”

Kayānghanthāwui Chānjam

³¹ Khangatei chānjam akhala athumli hāngchithei. “Kazing wungram hiya mi akhana kayānghanthā khuilaga awui luili yaosang kahai kathāna.

³² Athābingwui ngachaili hi teomeikapa, kha hi hakkasang eina khawobingwui ngachaili hakmeikap kaje thingrong akha ngasāda khamasaili yongkazata vānaobingna chiwui aphangbingli athip rāsai.”

Kapkachungwui Chānjam

³³ Ana khangatei chānjam akha hāngchithei: “Kazing wungram hiya sha̱nao akhana khawok ari khuilaga mathir luk kathumkhali manātlaga makapchungranglakha eina tangda thumkahai kathāna.”

Jishuna Chānjam Shikachin

³⁴ Saikora hi Jishuna chānjam shichinlaga yaruili hāngchithei; chānjam tui akhala mazangla ana athumli matamchitheimana.

³⁵ Hi marānna hāngkahai chi ungshung khavaiwui vangna: “Ina chānjam shichinda hāngchitheira, okathui haokaphokwui eina thumhaikasā chi ina hāngra.”

Rāmanbingwui Chānjam Khalatkhami

³⁶ Jishuna yarui chili nothāhailaga shimlung kazang eina awui sākhangatha̱bingna ali ngahāna, “Luili kaphor rāmanbingwui chānjam kakhalat chi ithumli hāngchitheilu.”

³⁷ Jishuna ngahānkai, “Athā khamathā khayaoa chi miwui Naomayarana.

³⁸ Lui chi okathui hina kala athā makhamathā chi chipeewui naongarāna.

³⁹ Rāman khayaoa yangkashe chi chipee china. Māhā atam chi okathui khangachang atam china, kala kahātbing chi kazingraobingna.

⁴⁰ Rāmanbing kazipkhuilaga meili thottā kahai thada thot akatanglila chithāpapamra.

⁴¹ Mibingli morei kala makaphā makhayā sakhangasaka athumli wungramwui ayarli kazipkhui khavai miwui Naomayarana awui kazingraobing shivātra,

⁴² kala athumli meifalungli horsanghaora. Chili athum kachapla chapra kala ahāla tarira.

⁴³ Chiwui thili khamashung khangarongbingna athumwui Avāwui wungramli zimik thada horra. Shākhavai khanā kakā a china shākhuiranu!

Ngathum kahai Lanwui Chānjam

⁴⁴ “Kazing wungram chiya lui akhali lan thumhaida khalei mi akhana samphangda yātphum kahai kathana; ana ringphākhaihaoda awui khalalei hupta ungyorserhailaga, lui chi alokhui.

Aman Kasaka Muktawui Chānjam

⁴⁵ “Latluida, kazing wungram chiya leihkasā mi akhana aman kasaka pearl ngalung phākazat kathāna,

⁴⁶ ana aman kasaka pearl ngalung akha leikasā theida awui khalalei hupta ungyorserhailaga pearl chi alokhui.

Khailanwui Chānjam

⁴⁷ “Latluida, kazing wungram chiya shamadruli khaihlan horsanglaga khai ayur kachiva̱ phākakhui kathāna.

⁴⁸ Khailan chi pemkahai eina athumna ngayipheili ngakhunshokta pamzanglaga khaih khamathāthā chi khongsaili sangkhui, kha makhamathābing chi horhaowa.

⁴⁹ Okthot akatangli chithada shokra. Kazingraobingna shokta makaphābing chi khamashung khangarongbingwui eina ngatei ngasakra,

⁵⁰ Kala athumli meifalungli horsanghaora; chili mibingna kachapla chapra kala ahāla tarira.”

Kadhara Akachang kala Kachama

⁵¹ “Nathumna saikora hi bhap tāhairalā?” Athumna “Mha” da ali ngahānkai.

⁵² Chieina ana athumli hānga, “Chiwui vang eina kazing wungramwui vang tamchithei kahaia ain kathema kachiva̱ chiya shimva̱ akha kathāna, ana awui lan kazip kahai kāwui eina kadhara kala kachama lan khuikashok kathāna.”

Nazarethli Jishuli Makhuikasang

⁵³ Kala Jishuna chānjam tui saikora chi pheikupchanghailaga, apam chiwui eina thuihaowa,

⁵⁴ kala aramli hanungda ana athumli synagogueli tamchithei, chi kashā mibing china matakhakhaoda athum akha eina akha ngazek ngaroka, “Mipā hina hikathā awor kala hakkhamahā otsak hi kachiwui eina samphangkhala?

⁵⁵ A mistriwui naomayara chi maningmalā? Ava̱li Mary mahomalā? Kala James, Joseph, Simon kala Judah awui achināngarā maningmalā?

⁵⁶ Azarva̱ngarā ithumli mangasopamalā? Ana saikora hi kachiwui eina tamkakhuikhala?”

⁵⁷ Chieina athumna ali makhuisangthuwa. Kha Jishuna athumli hānga, “Marānliva aramli kala ashi shimkhurli maningla apam khangatei khayāmakashi maleimana.”

⁵⁸ Kala athumna mashitkasangwui vang ana apam chili matakhak kahai ot kachungkha masāmana.