MARK 9 - Kathara Bible (BSI)

¹ Ana athumli hānga, “Kachangkhat eina ina nathumli kahāngna, Varewui wungram china pangshap eina ngasoda kharā matheiranglakha kathi mamazapki kaji mi kaikha hili nganingda lei.”

Azak Khaon

² Tharukthangwui thili Jishuna Peter, James kala John athumngli hophungda phungrei kajuiva̱ akhali thankai, kala athumwui miktāchangli azak onhaowa,

³ kala awui kachon hānshi eina charshihai kala okathuili kachon khangasa̱ minala chithada ngasa̱khuikapai maningmana.

⁴ Elijah eina Moses apam chili rāda Jishuli chan tākhangazek athumna thei.

⁵ Chieina Peterna Jishuli hānga, “Ojā, ithum hili leikasā phālakhaira, ithumna nawui vang akha, Moseswui vang akha kala Elijahwui vang akha da rāmnao kathum sakhuisa.”

⁶ Kaja athum ngacheenahaida a khi hāngsikhala da matheithuya.

⁷ Chiwui thili muiyā ngapuiungda athumli rommithaowa kala muiyālungwui eina akhon akha vaorai, “Hi iwui khaluma Naomayarana, awui tui nganālu.”

⁸ Athumna kashuirak eina hengsāda kapeikhayang tharan Jishu maningla athumli khipākha ngasopamkasa matheimana.

⁹ Athum kaphungwui eina tāmamānlakha Jishuna athumli kasoi, “Miwui Naomayarana kathiwui eina maringshokranglakha eina tangda nathumna theikahai chi mi khipālikha mahānglakalu.”

¹⁰ Chieina athumna “Kathiwui eina ringshokra kajiwui kakhalat khikhala,” da ngazek ngarokphokuwa, kha shokkahai otshot chiya athum khalattawui ningli thumhai.

¹¹ Chieina athumna Jishuli ngahānna, “Khiwui vang eina ain kathemabingna Elijahna rārira da hānghaokhala?”

¹² Jishuna, “Elijahna ot saikora hankhuiluishit khavai rida rai; kala miwui Naomayarawui pongli kakhanang kala mana̱kashi kachungkha samphangrada Kathara Lairikli kathada kapihailikhala?

¹³ Kha ina nathumli kachangkhat eina kahāngna, Elijah rāhaira kala awui pongli kapi kahai thada ali athumwui ningyāng khaung sakhuihaira.”

Kameo Kazang Naoshinao akhali Raikhami

¹⁴ Athumna sākhangatha̱ kateibingwuili hankhaung tharan mi kachungkhana athumli kuinamlaga ain kathemabingna ngayatkasā thei.

¹⁵ Hengsāda athum katongana Jishuli theida matakhakhai kala athumna ngasamvāda ali vāngarokkhui.

¹⁶ Chieina ana athumli ngahāna, “Nathum athumli khi khangayatkhala?”

¹⁷ Yarui ngachaiwui eina mi akhana ngahānkai, “Ojā, inaomayarali khak khangasha̱wui kameo zanghaida nali khuikharāna;

¹⁸ kameo china nganurhaiakha nao chi ngaleili saosangda aporhop tarārā shoklaga ahāla kajetta phasāla mararshaphaowa; chiwui vang nawui sākhangatha̱bingli kashamshokmi khavai kahāng tharan athum masāmirarthuwa.”

¹⁹ Chieina ana athumli ngahānkai, “O shitkasang makhalei thot, ina nathumli karankha ngasopamfarakhala kala samifarakhala? Iwuili khuirālu.”

²⁰ Athumna nao chi awuili khuirai; kala kameo china Jishuli theikhaleoda naoshinaopā chili nganurkazama kala ngaleili saosangda ngaleokazamlaga khamorli aporhop hiyaya shoka.

²¹ “Hithada kakazā hi karankhahaira?” da Jishuna avāva̱ chili ngahānna. “Nganuilakhawui eina kazāphalunga.

²² Kameo china ali shimān khavai kala thikhavai meilunglila, tara̱lunglila tarākhashida horsanghaira, khikhikha sāmipaiakha lumashanmida ishili khangachonmilu.”

²³ Jishuna ali hānga, “Samipaiakha kajila? Shitkasanga awui vanga ot saikora sapaisera.”

²⁴ Avāva̱ china hengsāda chapta hānga, “Ina shitsanga, iwui mashitsangkasangwui vang ngachonmilu.”

²⁵ Jishuna yarui ashangva̱ chi athumwuili yongkharā chi theida, ana makathar mangla chili khararda hānga, “Khangasha̱a kala khangakhoka manglā, ina kakasona, awui eina shokulu kala ali marāzangluilakalu.”

²⁶ Kala panglak eina chapta ali khanukazamhailaga shokhaowa, kala nao chi kathi angun thāhaowa; chieina athum kachungana, “A thihaira” da hānga.

²⁷ Kha Jishuna awui pāng singkhuida khāngkhamathot eina thuinganingrāsai.

²⁸ Jishuna shimlung zangkahaiwui thili sākhangatha̱bingna ngathumsāda ali ngahāna, “Khiwui vang ithumna makashamshokrarthu kajikhala?”

²⁹ Chieina Jishuna ngahānkai, “Hikatha hiya seihā kasā eina maningla makashamshokrarmana.”

Jishuna Awui Kathi Hāngmarānluishit kaji

³⁰ Athumna chiwui eina zatlaga Galilee akāna. Jishuna mi khipālikha a khaleipam mathei ngasakmana;

³¹ kachiwui vangkhala jilaga chitharan awui sākhangatha̱bingli tamchitheida leisai: “Miwui Naomayarali mibingwui pāngli horsangmida athumna ali shaothathaora kha kathumthangwui thili ringshokluishitra.”

³² Kha athumna awui tamkachithei chi khikhala da bhap matāthuwa kala khangahānla mangahānlengthuwa.

Khipā Reimeikapkhala?

³³ Chiwui thili athum Capernaumli vai kala shimlungli zangkahaiwui thili Jishuna sākhangatha̱bingli ngahāna, “Nathum shongfali khi khangazekhala?”

³⁴ Kha athumna mangahānkāthuwa, khiwui vangkhala jilaga athumna shongfali khipa reimeikapkhala kaji ngazeka.

³⁵ Jishuna pamzangda tharāda khani chili hokhuida hānga, “Khare sāga jiakha saikorali naomeithuira kala saikorawui rao sāra.”

³⁶ Kala ana naoshinao akhali thara̱khuida athumwui alungthungli vamkhuilaga athumli hānga,

³⁷ “Kachikathāna imingwui vang hikathā naoshinaoli khuikasang chi ili khuikasangna; ili khuikasang chi imāngli maningla ili kashirāta alila khuikasangna.”

Ithumli Mangakaikashe chi Ithumwui Mina

³⁸ Johnna ali hānga, “Ojā, mi akhana nawui ming singda kameo kashamkashok ithumna thei, chieina ali ithumna masāluilu da khāmhaowa, khiwui vangkhala kaja a ithumwui mi maningmana.”

³⁹ Kha Jishuna hānga, “Ali makhāmhaialu, khikhalajila iwui ming singda matakhak kahai ot kasā mi khipākha ili mamashātmara.

⁴⁰ Kaja ithumli mangakaikashe a chi ithumwui mina.

⁴¹ Kachangkhat eina ina nathumli kahāngna, nathumna iwui mi kasingwui vang kachikathāna tara̱ tengkotkha mikhamangwui sāman kachilikha mashimānlakmara.”

Morei Sākhavai Kasui

⁴² “Ili shitkasanga kateoa akhali morei sakhangasakpa chili lungriham ngachāmihailaga shamadruli horsang kahaina awui vang phamei.

⁴³ Chiwui vang eina nawui pāngna nali morei sangasakakha, katattāhaolu; nawui vanga pāng khani kālaga kazeiram vāki kajile, pāng makāla katang makhavai kharingli kazang phamei.

⁴⁴ Chile athumwui mathan kathi mavaimana kala meila khamit mavaimana.

^45-46 Napheina nali morei sangasakakha, katattāhaolu; nawui vanga phei khani kālaga kazeiram horsangki kajile phei mareida katang makhavai kharingli kazang phamei.

⁴⁷ Namikna nali morei sangasakakha, latshokhaolu; nawui vanga mik khani kālaga kazeiramli horsangki kajile mik lākhavākmāng kālaga Varewui wungramli kazangna phamei,

⁴⁸ chili athumli kashaia mathan chi kathi mavaimana kala meila khamit mavaimana.

⁴⁹ Kaja mi kachivali mei eina tharngasakra.

⁵⁰ “Machi hi kānālaka, kha machi chi chiwui katum shimānhaiakha khi eina tum ngasakrakhala? “Nathum khalattawui alungli machi leingasaklu kala akha eina akha chingri eina pānrumlu.”