MARK 8 - Kathara Bible (BSI)

Jishuna Mi Thingmatili Mikazā

¹ Chitharan mi kachungkha rakazipluishitta athum zākhavai makhalei tharan Jishuna awui sākhangatha̱bingli hokhuida hānga,

² “Mibing hili lumashanlaka, kaja athumna ili ngasokapam hi zimiksho kathumthang kaura kala athum ara zākhavaila maleithura;

³ ina athumli kakhum eina shimli shiunhaiakha, athum shongfali vānhaora kaja kaikhava katava̱wui eina kharāna.”

⁴ Kala awui sākhangatha̱bingna ngahānkai, “Siwuk hili kachiwui khamui vākhuida mi hiyakhali phāchizatpaira?”

⁵ Jishuna athumli ngahāna, “Nathumwuili khamui kayākha leikhala?” Athumna ngahānkai, “Shini lei.”

⁶ Chieina Jishuna mi saikora chili pamzanglu da kasoi, kala khamui shini chi khuida Vareli ningkashi mi kala serkhailaga yaruili yaokhavai awui sākhangatha̱bingli mi; athumna yaruili yaowa.

⁷ Athumwuili khaihla kateokha leisai; Jishuna chiwui vang Vareli ningkashi milaga yaruili yaokhavai mi.

⁸ Athumna chi shailaga tholakhaowa kala athumwui shaitai luk shini pemda kazipkhui.

⁹ Kala chili mi thingmati sha̱kha leisai.

¹⁰ Kala Jishuna mibing chili shiunhaowa; kala ana hengsāda marikhong kātonglaga awui sākhangatha̱bingli ngasoda Dalmanutha ngaleivāk vāhaowa.

Machut Ningkachāng

¹¹ Chiwui thili Phariseebingna Jishuli rangaphata kala khayon tukkhuikida kazingramwui eina machut chithei khavai hānga.

¹² Kha ana khananglak eina ngahuida hānga, “Mithot hina khisāda machut kaphākhala? Ina nathumli kachangkhat eina kahāngna, mithot hili machut khikhala machitheimara.”

¹³ Ana athumli nothāhailaga marikhong tongda lākhavāk kānkāhaowa.

Pharisee eina Herodwui Khawok

¹⁴ Sakhangatha̱bingna athumwui khamui malaihaida makhuiphungthuwa; marikhong chili athum khamuihāng akhamāng leisai.

¹⁵ Jishuna athumli “Ning ngasharda khuiphunglu, Pharisee eina Herodwui khawok chili ngasharlu kala mangarumhaialu.” da hānga.

¹⁶ Athum akha eina akha ngazek ngarokta “Ithum khamui maleimana” da hānga.

¹⁷ Chi theihaoda, Jishuna athumli hānga, “Khamui makhuikaphungwui vang khisāda nathum ngazek ngarokhala? Nathum aruila mamachukrang kala bhap matārangla? Nathumwui ning makanghaola?

¹⁸ Mik kālaga matheirarmala, khanā kalaga mashārarmala? Kala nathum maphaningungmala?

¹⁹ Ina mi thingphangāwui vang khamui phangā serkhailaga mizāthang nathumna shaitai luk kayākha kaziphuikhala?” Athumna “Tharada khanina” da ngahānkai.

²⁰ “Kala mi thingmatiwui vang ina khamui shini serkhaida mishaithang shaitai luk kayākha nathumna kazipkhuikhala?” da Jishuna ngahānna. Athumna “Shinina” da hānga.

²¹ Ana athumli “Arui eina tangda bhap matārangla?” ji.

Bethsaidali Khangapeo akhali Raikhami

²² Chiwui thili athumna Bethsaidali vai. Mi kaikhana khangapeo mi akha Jishuwuili khuirada awuitungli kasāza̱mi khavai poi.

²³ Jishuna khangapeoa chili thara̱khuilaga kha̱wui ayarvāk thānshoka; ana mipa chiwui mikli machora̱ mashorrorhailaga awuitungli pāng parrorda, “Khikhikha matheilikhala?” da ngahāna.

²⁴ Ana yangkāda, “Mi theili, kha thingrong kazat thai.”

²⁵ Jishuna mipa chiwui mikli apāng saza̱luishita; ana panglāk eina kharak tharan saikora mathingrik eina theihaowa.

²⁶ Jishuna ali, “Kha̱lunglila mazangluialu” da kasolaga shimli shiunhaowa.

Peterna Jishuli Hāngkaphat

²⁷ Chiwui thili Jishuna awui sākhangatha̱bingli ngasoda Caesarea Philippiwui kha̱bingli vai kala shongfali “Ili mibingna khipāna jikhala?” da athumli ngahāna.

²⁸ Chieina athumna, “Mi kaikhana Ra̱hikme Johnna ji, kaikhana Elijahna ji, khangatei kaikhana marānbingwui ngachaili akhara ji” da ngahānkai.

²⁹ “Kha nathumna ili khipāna da phaningkhala?” da ngahāna. Peterna “Na Khrista china” da ngahānkai.

³⁰ Kala Jishuna athumli awui maramli khipālikha mahāngalu da ningmi.

Jishuna Awui Kachotkachang kala Kathiwuipongli Kahāng

³¹ Kala ana awui sākhangatha̱bingli, miwui Naomayarana apong kachungkhali kakhanang kachot samphangra kala kathānabing, pāngmon akhokabing kala ain kathemabingna mamayāmada ali shaothatra, kha kathumthangwui thili ringluira da tamchitheiphokuwa.

³² Kala ana chi shenglak eina hāngmi. Kala Peterna ali hokhuilaga kaharphoka.

³³ Kha Jishuna ngareiungda sākhangatha̱bingli yanglaga Peterli kaharda hānga, “Ikhanukshong unghaolu, Satan! Na Varewuishong maningla mikumowuishong lei.”

³⁴ Kala ana yarui chi awui sākhangatha̱bingli ngasoda hokhuida hānga, “Kachikathā mina ithi shurga jiakha, a khalattawui ningkachāng horhailaga awui krush phungda ithi shurranu.

³⁵ Kaja khalatta awui mirin huikhuiki kaje a chi awui mirin shimānra; kala iwui vang kala paokaphāwui vang mirin shimankhame a china ringra.

³⁶ Mi akhana okathui katonga samphanglala awui mirin shimānhaiakha awui tongkazā khi leikhala?

³⁷ Mi akhana awui mirin chi khi eina ngatha̱khuishapkhala?

³⁸ Vareli makathei makaphā thot hili kachikathāna iwui kala iwui tuiwui vang khayakakha, miwui Naomayarana Avāwui tekhamatei eina kazingraobingli ngasoda kharā tharan awui vangla khayakhaora.”