MARK 7 - Kathara Bible (BSI)

Awo Ayiwui Tamkachithei

¹ Jerusalemwui eina kharā Phariseebingna ain kathemabing kaikhali akhomkhuilaga Jishuli rāngasokapam tharan,

² awui sākhangatha̱bingna khamakhao pāng, chiya pāng mamazikla phakazā chi thei.

³ (Kaja awo-ayibingwui khangachā mayonda Phariseebing kala Jihudi saikorana pāng mamazikla maphazāmana;

⁴ athumna leihngapha̱wui eina hankhaung tharan mara̱vairanglakha maphazāmana. Chili lāngmeida tengkot, khongphei kala mariham kathā kapheowui khangachāyan athumna khamayon tarākha lei.)

⁵ Chieina Phariseebing eina ain kathemabingna Jishuli ngahāna, “Awo-ayiwui khangachāyan thada masāla khisāda nawui sākhangatha̱bingna pāng mamazikla phazākhala?”

⁶ Ana athumli ngahānkai, “Marān Isaiahna phākakhaning nathumwui pongli mashungda marānmi, kaja hithada kapihaida lei: ‘Mibing hina ili morchai eina khayāshiya, kha athumwui ning iwui eina katava̱li lei;

⁷ aremali athumna ili khoruma, athumna miwui khangachāyan chi Varewui tuina da tamchithei.’

⁸ Nathumna Varewui ningkhami horhailaga, miwui khangachāyanli sakmeikhar mayonhaowa.”

⁹ Kala ana athumli hānga, “Nathumwui khangachāyan mayon khavaiwui vang Varewui ningkhami horhai khavai nathum apong khamathā akha lei!

¹⁰ Kaja Mosesna ningmihai, ‘Nava̱ navāli khayashilu kala avāva̱li lah ava̱va̱li khonkashe mi chi thira’;

¹¹ kha nathumna hānga, mi akhana avāva̱ lah ava̱va̱li, iwui eina nana kānkhanā samphangkapai chi ‘Hi Corbanna’ (kaja Vareli mikahaina) da hānghaiakha,

¹² chiwui thili nana ava̱ avāwui vang khikha masa ngasakluimana,

¹³ chithada sāda nathumna zatkhana hāngkhamaron chiwui vang eina Varewui ningkhami chi khamasai ngasa ngasaka. Nathumna hithada kasā khangatei kachungkha lei.

Makhao Khangasak Ot

¹⁴ Chieina Jishuna mibingli hokhuiluishitlaga athumli, “Nathum saikora nganālu kala theishingkhuilu.

¹⁵ Ayarwui eina kazang china mi chili khikha makhao ngasakrarki kaji maleimana, kha alungwui eina kashok china makhao khangasakna.

¹⁶ Shākhui khavai khanā kakā a china shākhuiranu.”

¹⁷ Ana yaruili nothāhailaga shimlungli kazang tharan awui sākhangatha̱bingna chānjam chiwui pongli ngahāna.

¹⁸ Ana hānga, “Nathumla theishingkakhui maleirangla? Ayarwui eina kazang china mi chili khikha mamakhao ngasakrarmana kaji nathum bhap matāthula?

¹⁹ Khikhalajila chi wuklungli kazang maningla paiphonli kazangna kala chi ayarli shokpapamhaowa.” (hiya kashakazā katonga thara da phongkhamina.)

²⁰ Kala ana hānga, “Alungwui eina kashok china mili makhao khangasakna.

²¹ Kaja miwui wuklungwui eina makaphā ningphanin, shāmkasa, khaleekasa̱, shaokathat, phokaphā,

²² kākharām, mikhanam, makhangatun, yuikashi, ngashimkashi, langkaso, mangkhama̱ hikathāthā shoka.

²³ Saikora hi mi chiwui alung eina kashokna kala makhao khangasakna.”

Sha̱nao Akhawui Shitkasang

²⁴ Apam chiwui eina Jishuna zatphoklaga Tyre kala Sidonwui ruinganaishong vāhaowa, ana mi khipālikha mathei ngasakla shim akhali azanga; chithālala mangathumpaithuwa.

²⁵ Anao ngalāva̱li makathar mangla kazanga preinao akhana Jishu rāhaira da kashā eina hengsāda vālaga awui pheizingli ngakhumshama.

²⁶ Preiva̱ chi Syrophonicianaona. Ana awui naongalāva̱wui eina raih chi kakashamshokmilu da poi.

²⁷ Kala ana sha̱nao chili hānga, “Naoshinaobing rida thofaranu, kaja naoshinaobingwui zāt khuilaga fali hormi kahai mangachāmana.”

²⁸ Kha sha̱nao china ngahānkai, “Mashunga amei, chithālala naoshinaobingwui zātpā tākatung chi tablezingli kapama fala ngamuizai!”

²⁹ Chieina ana ali hānga, “Nana chi kahāngwui vang shimli ungulu. Nanao ngalāva̱wui eina raih chi shokhaira.”

³⁰ Ana shim hankhaung eina nao chi petli pisai kala raih chi awui eina shokkachanghairasai.

Khanā Khangakhok Khak Khangasha̱ Mi akhali Raikhami

³¹ Jishuna chiwui thili Tyre apamwui eina Decapolis apamli ngaruivālaga Sidon angaruishokta Galilee shamadruvāk hanunghaowa.

³² Kala athumna khanā makashā kala khakla makashok akha khuirāda Jishuli awui pāng parzāmi khavai rāpoi.

³³ Chieina Jishuna amāngli thānkhuilaga yaruiwui eina thuihaowa kala akhanāli apāng thara̱sanga kala apāngli machora̱ mashorrorlaga kakazāpawui maleli sāza̱ya;

³⁴ kala ngahuida kazingram yangkāda hānga, “Ephphatha” kaja “Shohaolu” kajina.

³⁵ Kala ngalāngda mipa chiwui khanā shohaowa, amalela khalāmihaoda matuihaowa.

³⁶ Kala ana mi khipālikha mahangalu da athumli ningmi; kha athumna mataimeida vaomalāna.

³⁷ Kala athum matakhaknāhaida, “Ot saikora ana phālak eina sāmihaira; ana khangakhoka kala khangasha̱ali eina tangda shāngasak, kala matui ngasakhaira” da hānga.