MARK 5 - Kathara Bible (BSI)

Jishuna Raih Kazanga Mi Akhali Raikhami

¹ Chiwui thili athumna shamadru lākhavāk khalei Gerasanaowui ngaleivāk ashoka.

² Jishuna marikhong eina shokkhaleoda makathar mangla kazanga mayarnao akha chikhurshongwui eina rāngaroka,

³ a chikhurli pama kala mi khipānakha ali makhalaphairarmana;

⁴ kaja ali zurthing einala kala marikhānghui einala kachungkha shida narhairasai, kha marikhānghuila sāshathao, zurthingla sākazamserhaida ali tuknarshapa mi khipākha maleisāmana.

⁵ Ngashun ngayā chikhurpamli kala phungreitungli vaoshang vaotāda a khalatta ngaluggui eina aphasali reokazama.

⁶ Ana Jishuli khālada kathei eina yongvāda akhoruma;

⁷ kala panglāk eina vaoda hānga, “Reikhamataiya Varewui Naomayara Jishu, nana ili khi sāki kajikhala? Varewui mingli kapona kaja ili marekharekmialu.”

⁸ Kaja “Makathar manglā, mipa hiwui eina shokulu” da Jishuna hanghairasai.

⁹ Jishuna ali ngahāna, “Nali khipa hokhala?” Ana ngahānkai, “Ili Legion hoi kaja ithum kachungkhaya!”

¹⁰ Mipa china athumli ngalei chiwui eina makashamihaialu da poi.

¹¹ Atam chitharan chiwui ngalem kaphungpheili hok ashangva̱ akha leisai,

¹² kala athumna Jishuli “Ithumli hokbing chili chihovāda azang ngasakmilu” da poi.

¹³ Chieina ana mayāmihao. Kala makathar manglabing china shoklaga hokbing chili azanga. Hok thingkhani sha̱kha leikasā chi amaitarenli yongtāda shamadrulungli tāzangda hikthatserhaowa.

¹⁴ Hok kahombing china kha̱li kala keinungli yongungda pao chi unghānga. Chieina mibingna khi shokhaokhala da ayanga.

¹⁵ Athumna Jishuwuili kharā tharan legion kazanga mipa chi ning mathingungda kashankachon mathāsek eina ngavailaga pamkasa chi theilaga athum ngacheelakhaowa.

¹⁶ Makathar manglā kazangapā eina hokbing chili khi shokmameihaokhala kaji chi katheibingna mi khangateili hāngchithei.

¹⁷ Chieina athumna Jishuli aramwui eina zatthuimihai khavai poi.

¹⁸ Ana marikhongli kākatong eina makathar manglā zangkasapa china “I nali shurraga” da poi.

¹⁹ Kha Jishuna mamayathuwa, kala ali “Nashi shimli ungulu kala Prohona nawui vang kayākha sāmihaira kala kayākha lumashanmikhala kaji athumli unghāngchitheilu” da hānga.

²⁰ Chieina ana Decapolisli hanungda Jishuna awui vang kayākha samikhala kaji pheichithei kala kashā mi saikora matakhakhaowa.

Jairuswui Naongalāva̱ eina Chontheira̱li Sākaza̱ Sha̱nao

²¹ Jishuna marikhong tongda lakhashong huikāluishita, chitharan mi kachungkhana ali ngayipheili kuinamlaga rakazipa, kala ana shamadru ngalemli pama.

²² Chitharan Synagoguewui akhava Jairusna apam chili rai kala Jishuli kathei eina awui pheizingli ngakhumzangta

²³ ana “Inao ngalāva̱ kathi mayuk eina pida lei. Nana awuitungli napāng kharāsazāmilu. Chithākha a mathimara” da panglāk eina poi.

²⁴ Chieina Jishuna ali ngasovai kala mi kachungkhala shurvada ali puiruizata.

²⁵ Apam chili zingkum tharāda khani ashee ngayā kahai sha̱nao akha leisai.

²⁶ Khanong kachungkhali yangngasakhailala marsangmeihaowa.

²⁷ Ana Jishuwui maramli mi khangateibingna khangazek shāhairasai. Chieina ana yarui kakazip khanukshong vālaga,

²⁸ “Ina awui kachonli thada saza̱khuisi kaja railakra” da a khalatta machuka.

²⁹ Ana awui kachonli saza̱ya kala ashee khangaya̱ chi ngalāngda thenghaowa, kala awui kakazā chila raichaohaowa.

³⁰ Hengsāda Jishuna awui eina pangshap shokhaira kaji theida yarui ashangva̱ chili kapeiunglaga hānga, “Iwui kachonli khipāna saza̱khala?”

³¹ Awui sākhangatha̱bingna ngahānkai; “Nali mi hiyākhana kuinamda leilaga kathada ili khipāna saza̱khala da hangli?”

³² Kha khipāna saza̱khala da yangkhui khavai ana kuimareida yanga.

³³ Kha sha̱naopava̱ china ali shokkahai chi theilaga ngacheerarang, kathirriri eina rāda ngakhumshām shokkahai otshot saikora rahānga.

³⁴ Kala ana ali hānga, “Inao ngalāva̱, nawui shitkasang china nali phāngasakhaira, chingri eina ungulu, kala nawui kazāt raihaoranu.”

³⁵ Ana matuimahungda leilakha Jairuswui shim eina kachikathā mi akhana rāda ali rahānga, “Nanao ngalāva̱ aruicham thihaira. Khisāda ojāli sheikhautluisara?”

³⁶ Kha Jishuna manganāsangmila synagoguewui akhavā chili hānga, “Mangacheealu, thada shitsangmalu.”

³⁷ Chiwui thili ana Peter, James kala agato John maningla mi khipālikha mashurra ngasakmana.

³⁸ Athumna synagogue akhavāwui shimli vākashung tharan ngaunlop mibingna akhon panglāk eina chapngachāda leikasā chi Jishuna athei.

³⁹ Ana shimlungli zanglaga athumli hānga; “Khisāda ngaunlop chapkhangachākhala? Nao hi kathi maningmana kha kapina!”

⁴⁰ Athumna ali mana̱shiya, chi eina ana athum saikorali kayāngli kashamshokserhailaga nao chiwui ava̱ avā kala awui sākhangatha̱ kathum chili hokhuiphungda nao chili chipethaida khaleishong zanga.

⁴¹ Jishuna apāng singkhuida, “Talitha, cumi,” chiwui kakhalata “Kateowa sha̱nao, Ina nali kahāngna, ngakarthuilu” kajina.

⁴² Chieina ana ngalāngda ngakarthuilaga zatphokuwa (A zingkum tharāda khani kāhairasai). Hi kashok eina athum matakhakhaowa.

⁴³ Kala Jishuna athumli mi khipālikha mahāngpailakmara da kasoi kala “Ali shaikhavai khuimilu” da hānga.