MARK 4 - Kathara Bible (BSI)

Athā Khayaoawui Chānjam

¹ Jishuna Galilee shamadrupheili tamchitheiphokluishita. Mi kachungkha rāhaida ana marikhongli kātonglaga alungvāk pama kala yaruina ngayiphei kathengli pama.

² Ana chānjam tui eina apong tarākha athumli tamchithei kala awui tamkachitheili hithada hānga:

³ “Nganālu, athā khayaoa mi akhana athā yaokhavai vai.

⁴ Ana khayao tharan athā kaikha shongfali tatunghaida vānaona ngamuizāhaowa.

⁵ Kaikha ngalei tarākha makhalei, lungguina pemting kahai apamli tāzangda thaklāk eina kharshoka, kachiwui vangkhala kaja ngalei chi mathukmana;

⁶ kala zimik kashok eina alungbing chi angayung thukta makhaleiwui vang phuithathaowa.

⁷ Athā kaikha ka̱shatbingwui ngachaili tāzangda kashatrongbing hakkasang eina shangthathaowa, kala atheila mamatheimana.

⁸ Athā kaikha ngalei katumli tāzanga, kala ashon shonshokta hakkasangla haksanga kala atheila matheiya. Arong kaikhali thumrara, kaikhali hangthararuk kala shāshā matheiya.”

⁹ Kala ana hānga, “Shākhavai khanā kakā a china nganākhuiranu!”

Chānjambingwui Kharin

¹⁰ Amāng kapam tharan, sākhangatha̱ tharāda khani kala athumli ngasoda leikasābingna chānjam chiwui pongli ali ngahāna.

¹¹ Jishuna athumli hānga, “Nathumli Vare wungramwui khangathuma tui chi mikahaina, kha chili makazangbingli chānjam tui eina shākhui khangasakna.

¹² ‘Kaja, Athumna theikachanglala mamachukmara, athumna shākachanglala bhap matāmara; chithasāsi kaja athum Vareli latunghairara, kala ana athumli pheomihairara.”

Jishuna Athā Khayaoawui Chānjam Meikakhai

¹³ Ana athumli hānga, “Chānjam tui hi nathum bhap matāmala? Chithākha nathum khangatei chānjambing kathada bhap tārakhala?

¹⁴ Khayaoa china tui yaosanga,

¹⁵ Tui chi yaoda shongfali tātung kahai athābing chi hibingna; athumna tui chi shāngasha̱da Satanna rālaga athumwui wuklungli yaosang kahai tui chi khuithuihaowa.

¹⁶ Kala chi tākam eina lunggui khaleipamli tātung kahaibing chi hibingna, athumna tui chi shālaga mathānthathup eina khuisanga;

¹⁷ kala khalattawui lungli angayung maleimana, kha kasha̱nakha ringa; kha tui chiwui vang kachotkachāng, rekakharek kharā tharan heng sāda yāmhaowa.

¹⁸ Khangateibing chi ka̱shatlungli yaosang kahaibingna; athumna tui chi shai,

¹⁹ kha okathuiwui malungkharing, kashāng ningkachang, kala khangatatei otli kakahaona yuihaida tui chi shangthathaowa kala atheila mamathei ngasakmana.

²⁰ Kha ngalei katumli tākatungbing chi tui chi shālaga khuikasangbing, atheila thumrāra, hangthararuk, shāshā khamatheibing china.

Luk eina Khum kahai Thaomei

²¹ Ana athumli hānga, “Thaomei sharlaga meishongli mahaila luk eina khumhai lah petzingli haila?

²² Phongsharki kaji maningla thumkahai khikha maleimana, lah kahorli makhuishokmara da ngathum kahaila khikha maleimana.

²³ Shākhavai khanā kakā a china nganākhuiranu.”

²⁴ Ana athumli hānga, “Nathumna shākhui kahai chili hengsanglu; nathumna khami khāntam chi nathumlila mipapamra, chili lāngmeidala mira.

²⁵ Kaja khaleipali chungmei mirorra, kha makhaleipali awui leikasā eina tangda khuithuihaora.”

Athā Reikasangwui Chānjam

²⁶ Kala ana hānga, “Varewui wungram chi mi akhana luili athā yaosang kahai thada,

²⁷ ngayā pi, ngathor thui kala langpongda chithāpamlala athā chi ngachakkhailaga kathada khar kala reisangkhala da ana matheimana.

²⁸ Ngalei khalattana kharngasakta rimeikapta akung shok, chiwui thili amazān kala naoda māthei pemda mathei.

²⁹ Kha minkahai tharan chāngkui eina hātkhui kaja māhā atam rauwa.”

Kayānghanthāwui Chānjam

³⁰ Kala ana hānga, “Ithumna Varewui wungram hi khi eina pantampaira lah khi chānjam eina hāngsikhala?

³¹ Hiya ngaleili yaokasang tharanva okathuili teomeithui kaje kayānghanthā kathāna.

³² thālala lingsang kahai eina haksangda hanthothāp saikorawui ngachaili hakmeikap kaje ngasahaowa; aphāng kahakhakva̱ kachungkha shokta vānaobingna aphāng chiwui khaya̱li athip rāsai.”

³³ Athumna nganākhuikashap eina tangda paokaphā chi Jishuna chānjam tarākha eina hāshoka;

³⁴ chānjam mashichinla ana athumli matamchitheimana, kha sākhangatha̱bingli athumāng khaleili meisā eina saikora meikhaichithei.

Jishuna Siphan Zingrot Kakhām

³⁵ Chithang ngazin ana athumli “Ngayi lākhavāk kānkāusa” da hānga.

³⁶ Chieina athumna yaruibingli nothāhailaga ali khuiphungda marikhong chili kātongda kankāhaowa. Kala khangatei marikhongbingla ali ngasoda kānruma.

³⁷ Chitharan siphan zingrot kashuirak ngasha̱ungda tara̱ ungngaphaosangda marikhong chi pemki jihaowa.

³⁸ Kha Jishuva khanukvāk khamkui sanglaga pisai kala athumna mathotkhuida hānga. “Ojā, ithum thihaoki kaji maningkharikmala?”

³⁹ Chieina Jishuna thuida masi chili khararra, kala shamadruli, “Chingrihaolu! Vihaolu!” da hānga. Masila maphanthuwa, chingri-vārihaowa.

⁴⁰ Ana athumli hānga; “Khisāda nathum ngacheehaokhala? Nathum shitkasang maleimala?”

⁴¹ Athum matakhaknahaida akha eina akha, “Thākha mipa hi khipākhala? Masi kala shamadru eina tangdala awui kahāng nganāli!” da hāngngaroka.