MARK 3 - Kathara Bible (BSI)

Pāng Sheikasha̱ Akhali Raikhami

¹ Chiwui thili ana synagogueli vāzanga, kala chili pāng sheisha̱ kahai mi akha leisai.

² Kala Jishuli khayon phenkhavai Sabbaththang kazāt maraiminikhala da mi kaikhana ra̱yanga.

³ Chieina Jishuna pāng sheikasha̱a chili, “Hili rālu” da hoi:

⁴ Kala ana athumli, “Sabbaththang kaphā kasā lah zakkashi kasā; mirin kankakhui lah shaokathat, ainna kachipā mayākhala?” da hānga. Kha athum vari eina pamhaowa.

⁵ Athumwui ning khamakang chi theilaga wukkakhanang eina malungkhavāt ngasoda ana athumli yanglaga kakazā mipa chili “Napāng katinglu” da kasoi, ana katingkashok eina khangachā apāng thāhaowa.

⁶ Chieina Phariseebingna synagoguewui eina shoklaga hengsāda Herodwui mijangbingli asamphanga kala kathada ali shaothatsikhala da ngasan ngaroka.

Ngayipheili Yarui Kakazip

⁷ Jishuna awui sākhangatha̱bingli ngasoda shamadruvāk vai kala Galilee kala Judea

⁸ kala Jerusalem eina Idumea kala Jordan vāklaida khalei kala Tyre eina Sidonwui ruinganaili khalei mi kachungkhala, ana kasā saikora shāda athi shurrai.

⁹ Chieina mibingna ali masāza̱ khavai awui vang marikhong akha ngarānmilu da sākhangatha̱bingli kasoi;

¹⁰ kaja ana mi kachungkhali kazāt raimi kahaiwui vang kakazānao katongana ali sāza̱khui khavai ngaheirai.

¹¹ Kala makathar manglā kazangbingna ali kathathei apam kachida apheizingli ngakhumzangda “Na Varewui Naomayarana” da vaowa.

¹² Chieina Jishuna athumli a khipākhala da khipālikha mahāng khavai kasoi.

Sākhangatha̱ Tharāda Khani Kakapang

¹³ Ana phungreili kai kala ana ngayurzatkhangaibingli hokhui; kala athumna awuili rai.

¹⁴ Ana tharāda khani kapangkhui, chiya ali ngayurzat khavai kala paokaphā hāshok khavai chiho khavai

¹⁵ kala kameoli kashamshok khavaiwui pangshap leikhavai:

¹⁶ ana Peter da phokkhame Simon;

¹⁷ Zebedeewui naomayara James eina Jameswui agato John, Jishuna Boanerges, kaja kazing khangashumwui naomayarabing da phokkhame;

¹⁸ Andrew, eina Philip, kala Bartholomew, kala Matthew, kala Thomas, kala Alphaeuswui naomayara James, kala Thaddaeus, kala yurli leikashe Simon,

¹⁹ kala Jishuli yankasaia Judas Iscariot.

Jishu eina Beelzebul

²⁰ Chiwui thili ana shimli unghaowa; kala mi chungnā rākazipluihaida Jishuna awui sākhangatha̱bingli phazārum khavai atamla masamphangrarthuwa.

²¹ Ashi shimkhurna pao chi kashā eina ahokhui khavai vai, kachiwui vangkhala kaja mibingna “A pāhaira” da ngazekhaowa.

²² Jerusalemwui eina katā ain kathemabingna “Ali Beelzebulna ngasoda lei, kala kameo wungnaowui pangshap eina ana kameobingli kashamkashokna” da hānga.

²³ Chieina Jishuna athumli hokhuida chānjam tui eina hānga, “Kathada Satanna satanli kashamshokpaira?

²⁴ Wungram chi ngakai ngarokta mijang leingarokhaiakha chikathā wungram chi mapānpaimara.

²⁵ Shimkhur hi ngakaikazamhaiakha manganingpaimara.

²⁶ Satanna a khalatta yangshi ngarokta ngakaikazamhaiakha masangleila shimānhaora.

²⁷ Kapanga shimva̱ chili aphei apāng makhalapranglakha mi khipānakhala awui shimli zangda awui ot mangaponkhuirarmana; kha khalaphaiakha ngapaikhuipai.

²⁸ “Kachangkhat eina ina nathumli kahānga, miwui naomayarabingli morei saikora kala kachipat tui khamatui saikora pheomipaisera;

²⁹ kha Manglā Katharali kachipat mi chi pheokhami masamphanglakmara; kha chi katang makhavai morei khayona”—

³⁰ kaja athumna “Awuili makathar mangla zanga” da hānghairasai.

Jishuwui Ava̱ eina Agatongarā

³¹ Chiwui thili ava̱ eina agato ngarā rai; ayarli nganinglaga ali aho khavai mi chihovai.

³² Ali mi kachungkhana kuinam pamda leilakha athumna ali, “Nava̱ eina nagato ngarāna nali phāda ayarli nganingda lei da” hānga.

³³ Kala ana ngahānkai, “Khipāna ishava̱ kala igato ngarākhala?”

³⁴ Ana ali kuimareida pamda khaleibingli yangvāda, “Yanglu, hili ishava̱ kala igato ngarā leili!

³⁵ Varewui kaphaning kasā mi kachiva̱ igato, izarvā, kala ishava̱na.”