LUKE 9 - Kathara Bible (BSI)

Tharāda Khanili Kachiho

¹ Chiwui thili Jishuna tharāda khani chili hokhuida kameo kashamshok khavai kala kazātyur saikora raimi khavai sāshapla pangshapla mi.

² Ana athumli Vare wungramwui pao hāshok khavai kala kazāt raimi khavai shivāta.

³ Chieina athumli hānga, “Nathumwui shongzāli khāmshuila, paidula, zātromla, lupāla makhuiphunglakalu; kala phahonla khani makhuiphungalu.

⁴ Nathumna vākazang shim chili thada pamlu, kala chiwui eina zatphoklu.

⁵ Kha nathumli marāzang ngasak khangaiya ram kachiva̱ chiwui eina zatphokuki kaji tharan athumli makhamayāwui shākhi kachithei sāda nathumwui pheili kakā chifa chi kathangtāhaolu.”

⁶ Chieina athumna zatuwa kala khavāvā kha̱ kachiva̱li paokaphāla hāshoka kala kakazāla raimi.

Herodwui Pa̱khangapā

⁷ Chitharan kashokshok saikora chi Galileeli khamunga Herodna shālaga ning pa̱ngapālakhaowa, khiwui vang jiakha mi kaikhana John kathiwui eina ringshokhaira da hānghaowa;

⁸ kaikhana Elijah rāluihaira, kala khangatei kaikhana achālakhawui marānbing ngachaiwui eina akha ringluihaira.

⁹ Herodna hānga, “Johnli ina kui ranghaira kha ina hithada shāda khalei mipā hi khipākhala?” Chieina Herodna Jishuli samphang khavai phai.

Mi Thing Phangāli Mikazā

¹⁰ Paokazatabingna latkhaung eina athumna sākahai saikora ali unghānga. Kala Jishuna athumli thānphungda Bethsaida kaho keinung chili angasāma.

¹¹ Kala chi shālaga mi kachungkha athi shurrai; kala ana athumli mathānthathup samphangda Vare wungramwui pongli tamchithei kala kazāt raimi ngasak khangaibingli raimi.

¹² Chitharan kazingla yinguki jihaoda tharāda khani china ali rāhānga, “Yarui hili chihohaolu; chithākha athumna kha̱kha̱li kala chiwui luinganaili vāda athumwui kashakazā, kapi-kapam angarānpaira, kaja hili khikha maleimana.”

¹³ Kha Jishuna athumli hānga, “Athumli zākhavai milu.” Athumna ngahānkai, “Ithumwui pāngli khamui phangā kala khaih khani hi leili. Mi hiyakhawui zākhavai ithumli vālokhuilu kajila?”

¹⁴ Chili mayarnao thingphangā sha̱kha leisai. Chieina ana awui sākhangatha̱bingli hānga, “Athumli hangphangānga ngaher eina pamngasaklu.”

¹⁵ Chieina kahāng chi tākam eina athumli pamngasaka,

¹⁶ kala khamui phangā khaih khani chi ana singkhuilaga kazingramli yangkāda sokhami pomi kala khamui chi serkhaida yaovā khavai sākhangatha̱bingli mi.

¹⁷ Chieina mi saikorana shailaga penlakhaowa kala athumna shaineng luk tharāda khani kazipkhui.

Jishuwui pongli Peterna Hāngkaphat

¹⁸ Thang zimikshoka Jishuna amāng seihā sāda leilakha sākhangatha̱bingla awui ngalemli leisai, kala ana athumli ngahāna, “Ili mibingna khipāna jikhala?”

¹⁹ Chieina athumna. “Mi kaikhana John Ra̱hikmena ji, kha kaikhana Elijahna ji kala khangatei kaikhana achālakhawui marānbingwui ngachaiwui eina akha ringkashokna ji” da ngahānkai.

²⁰ Ana athumli ngahānluishita, “Kha ili nathumna khipāna da phaningkhala?” Chieina Peterna, “Varewui Khrista china” da ngahānkai.

Jishuna Awui Kathi Hāngkhamarān

²¹ Kha Jishuna athumli tui hi mi khipālikha mahāng khavai kasoi.

²² Ana hānga, “Miwui Naomayarana apong kachungkhali kakhanang kachot samphangra kala ararbing, pāngmon akhokabing, kala ain kathembingna mamayāmada shaothatra kala kakathuma thang ringshokluira.”

²³ Ana saikorali hānglui, “Kachikathā mina iwui thi shurga jiakha akhalattawui ningkachāng horhaida awui krush phungda ithi shurranu.

²⁴ Kaja kachikathana awui mirin kankhuiga jiakha chi shimānra; kala kachikathā iwui vang awui mirin shimānkhame china kankhuira.

²⁵ Kaja mi akhana okathui tongda samphanglala khalattawui mirin shimānhaiakha awui tongkazā khi leikhala?

²⁶ Kachikathā mina iwui vang kala iwui tuiwui vang khayakakha miwui Naomayarana awui tekhamatei kala Avā eina kazingraobingwui tekhamatei eina rāthanghon awui vangla khayakhaora.

²⁷ Kha ina nathumli kachangkhat eina kahāngna, Vare wungram chi matheiranglakha mathifaki kaji mi kaikha hili nganingda lei.”

Azak Khaon

²⁸ Tui hi hānghailaga zimiksho chishatthangwui thili Jishuna Peter, John kala James athumli thānphungda seihā sākhavai phungreili kai.

²⁹ Ana seihā sāmahunglakha awui zakmai onhaowa, kala awui kachonla charshi eina horchamrihai.

³⁰ Kala yanglu, mi khani ali ngasoda chān ngazeka, ani Moses eina Elijahna.

³¹ Anina tekmateilak eina rāda Jishuna Jerusalemli thimihailaga zatthuihaoki kajiwui pongli rāhānga.

³² Chitharan Peter eina ali khangasobingla piphuphairasai kala athumna thuikhamathuk eina Jishuwui tekhamatei kala ali ngasoda nganingkharuma mi khani chila thei.

³³ Mi khani china Jishuwui eina thuikahai eina, Peterna ali hānga, “Amei, ithum hili leikasā phālakhaira; ithumna rāmnao kathum sākhuisa, nawui vang akha, Moseswui vang akha kala Elijahwui vang akha”— Ana khi kahāngkhala kaji matheimana.

³⁴ Ana chi hāngmahunglakha athumli muiyāna rangapuirora; kala muiyā china ngapuiror kahai eina athum ngacheeshunhaowa.

³⁵ Kala muiyālungwui eina akhon akha vaorāda hānga, “Hi iwui Naomayara, iwui Kapangkakhuiana; awui tui nganālu:”

³⁶ Tui chi hāngkup kahaiwui thili Jishumāng nganingsai. Chieina athumna theikahai chi kasaikha thumhaida khipālikha mahānglakmana.

Raih Kazang Naoshinao akhali Raikhami

³⁷ Akhama kathā athumna kaphungwui eina katā tharan mi kachungkha rāsamphang ngaroka.

³⁸ Kala yanglu, mibing chiwui eina mi akhana vaorai, “Ojā, inaoli khayangmilu, kaja a iwui akhamāng kaje naona;

³⁹ kala yanglu, makathar manglāna ali singhaida kashuirak eina vaoshokphaphai; akhamorli aporhop mashokranglakha eina tangda sheikharota kala shireikharotta machihomingaiki ji.

⁴⁰ Kala kashamshokmi khavai nawui sākhangatha̱bingli ina poi, kha athumna masāmirarthuwa.”

⁴¹ Jishuna ngahānkai, “He shitkasang makhaleia kala mashongachei kahai mithot, ina nathumli karankha ngasopamfara kala ja̱mifarakhala? Nawui nao chi hili khuirālu.”

⁴² Naoshinaopā china zatrāmahunglakha kameo china ali ngaleili horkarsanghaowa. Kha Jishuna raih chili shokthui khavai kasoi, chieina naoshinaopā chi raihaoda avāva̱li mihaowa.

⁴³ Varewui tekhamatei sāshap pangshap chi theida mi saikora matakhakhaowa. Kha ana sākahai saikora chi matakhak eina machuklakha Jishuna awui sākhangatha̱bingli hānga,

Jishuna Awui Kathiwui pongli Hāngkhalui

⁴⁴ “Nathumna tui hi nganātitkhuilu, kaja miwui Naomayarali mibingwui pāngli horsangmihaora.”

⁴⁵ Kha sākhangatha̱bingna chiwui kakhalat matheimana. Chi athumwui eina ngathummihaoda athumna bhapla matāthuwa kala khangahānla mangahānlengthuwa.

Khipā Reimeikapkhala?

⁴⁶ Chitharan athumwui ngachaili khipa reimeikapkhala da athum akha eina akha ngayāt ngaroka.

⁴⁷ Kha Jishuna athumwui wuklungli kaphaning chi theihaoda naoshinao akha thara̱khuilaga awui ngalemli nganing ngasaka,

⁴⁸ kala athumli hānga, “Hikathā naoshinaoli iwui mingwui vang khuikasanga china ili khuikasangna kala ili khuikasanga china ili kashirata ali khuikasangna; kaja nathum saikorawui ngachaili teomeikap kaje china reimeikapa.”

Nali Mangakaikashebing Nawui Mina

⁴⁹ Johnna hānga, “Amei, mi akhana nawui ming singda kameo kashamkashok ithumna thei, kala ali ithumna chithada masāluialu da khāmhaowa, khikhalajila a ithumwui mi maningmana.”

⁵⁰ Kha Jishuna ali hānga, “Ali makhāmhaialu; kaja nathumli mangakaikashebing chi nathumwui mina.”

Samaria Kha̱ akhana Jishuli Makhamayā

⁵¹ Jishuli kazingramli khuikāhaoki kaji atam rākhanganai tharan ana Jerusalemli vākhavai mai ngareivāhaowa.

⁵² Chieina ana rida awui paophungmebingli shivātvai, athumna awui vang khangarān sāsā khavai Samariawui kha̱ akhali azanga,

⁵³ kha mibingna ali mazang ngasakngaithuwa, kaja a Jerusalemvāk vāra kaji leipinghairasai.

⁵⁴ Chieina Awui sākhangatha̱ James eina Johnna chi kathei eina anina hānga, “Proho, kazingramwui eina mei tāngasaklaga athumli shimān ngasak khavai kaso ngasakngailā?”

⁵⁵ Kha ana ngareiungda anili kahara.

⁵⁶ Chiwui thili athumna kha̱ khangatei akhali vāluishithaowa.

Jishuwui Thishurki kajibing

⁵⁷ Athumna shongfali zatta leilakha mi akhana ali rāhānga, “Nana kazazatpam kachida ina nali shurra.”

⁵⁸ Chieina Jishuna ali hānga, “Ramfala akhur lei, khamasaili yongkazata vānaobingla athip lei, kha miwui Naomayarava ngayaizangda ngasāmkhui khavaipam akhala maleimana.”

⁵⁹ Khangatei akhali ana hānga, “Ithi shurlu.” Kha ana ngahānkai, “Proho, rida ishāvāli ungchifahaifaga.”

⁶⁰ Kha ana ali hānga, “Kathina athum khalattawui kathili chifaranu; kha nawui vanga, vāda Vare wungram chi vaomalānlu.”

⁶¹ Khangatei akhana hānga, “Proho, I nathi shurlakra, kha shimli kapambingli kapāng tui rida unghānghaifaga.”

⁶² Jishuna ali hānga, “Seiot khuiphokhailaga khanukvāk yangkhaunga mi chi Vare wungramli zangkhavai matik machāmana.”