LUKE 6 - Kathara Bible (BSI)

Sabbathwui pongli Khangahān

¹ Sabbaththang Jishuna luisai akhali khavā chitharan awui sākhangatha̱bingna mā mazokhuida manuishai.

² Kha Pharisee kaikhana hānga, “Khisāda sabbaththang ain kakai ot sākhala?”

³ Chieina Jishuna ngahānkai, “David eina ali khangasobingna thaikahai tharan khisakhala kaji nathum mapākhuimala?

⁴ Kathada ana khorumshimli zanglaga pāngmon maningla khangatei khipānakha mashaikapai Ngasokhamiwui khamui shaihao kala ali khangasobinglila mishaihao!”

⁵ Ana athumli hānglui, “Miwui Naomayarana sabbathwui akhavāna.”

Pāng Sheikasha̱ Akhali Raikhami

⁶ Khangatei sabbath zimiksho akhali ana synagogueli zangda tamkachithei tharan yāpang sheisha̱ kahai mi akha leisai.

⁷ Ain kathembing eina Phariseebingna awuitungli khayon phenpai khavai sabbaththang ana kazat maraiminikhala da yangpama.

⁸ Kha ana athumwui kaphaning chi theihaoda pāng sheikasha̱pā chili hānga, “Hili rānganinglu.” Chieina ana ngakarthuida chili anganinga.

⁹ Chieina Jishuna athumli hānga, “Ina nathumli khangahāna; Sabbath zimiksholi kaphā ot kasā mashungmeikā zakkashi ot kasā mashungmei, manglā huikhuirakā sashimānrakhala?”

¹⁰ Jishuna athum saikorali yangserlaga sheikasha̱pali hānga, “Napāng katingshoklu.” Ana pāng chi katingkashok eina khangachā thada unghaowa.

¹¹ Kha athumna Jishuli malungvātnāhaida khi sāsikhala da akha eina akha ngazek ngaroka.

Tharāda Khanili Kakapang

¹² Chitharan Jishuna seihā sākhavai kaphungli vāda ngayā pongda Vareli seihā sāpama.

¹³ Kazing kathang eina awui sākhangatha̱bingli hokhui kala athumwui eina mi tharāda khani kapangkhuida athumli paokazatbing da phokmi;

¹⁴ chiya, Peterla kaho Simon kala agato Andrew; James eina John, Philip kala Bartholomew,

¹⁵ Mathew, Thomas kala Alphaeuswui naomayara James, Zealotla kaho Simon kala

¹⁶ Jameswui naomayara Judas kala yorkazā ngasā kahaiya Judas Iscariot.

Jishuna Tamkachithei kala Raikhami

¹⁷ Chiwui thili ana athumli ngasoda hamchamri kahai apam akhali tānganinga kala chili sākhangatha̱bingla, Judeawui, Jerusalemwui, kala Tyre eina Sidonwui ngayipheiwui eina kharā mi zangserda mi kachungkha kazipa;

¹⁸ athum awui tui nganā khavai kala kakazā raikhui khavai rai kala makathar manglāna singkakharengbing chila raikakhui samphanga.

¹⁹ Chieina mi saikorana ali saza̱khui khavai sai kaja awui eina pangshap shokta athum saikorali raimi.

Ringkaphā kala Kakhanang

²⁰ Jishuna awui sākhangatha̱bingli yangvāda hānga, “Kachāmbing sokhami ngasāranu, kaja Vare wungram chi nathumwuina.

²¹ Arui kathaibing nathum sokhami ngasāranu, kaja nathumli thongasakra. Arui kachapbing nathum sokhami ngasāranu, kaja nathumna mana̱ra.

²² “Miwui Naomayarawui vang eina nathumli ningkakachai, mahei kahai, kachipat kala nali aming phorphāphāda kazei tharan sokhami ngasāranu!

²³ Chithang ringphālu kala mathānda ngalongkālu, khikhalajila yanglu, kazingramli nathumwui sāman haklaka, kaja athumwui avāva̱ ngarānala marānbingli chithada sai.

²⁴ “Kha kashāngabing nathum kakhanang ringkashi ngasāranu, kaja nathum nathumwui ringkaphā samphanghaira!

²⁵ Arui kathobing, nathum kakhanang ringkashi ngasāranu, kaja nathum thaira. “Arui mana̱da khaleibing, nathum kakhanang ringkashi ngasāranu. kaja nathum chapra!

²⁶ “Mina nathumli sotkhamasao tharan nathum kakhanang ringkashi ngasāranu, kaja athumwui avāva̱ ngarābingnala minama marānbingli chi tākam eina sāsai.

Yangkasheli Leikashi

²⁷ “Kha nganāda khalei nathumli ina kahāngna; Nathumwui yangkashebingli leishilu, nathumli ningkakachaia athumli kaphā sāmilu.

²⁸ Nathumli khonkashe athumli somilu, nathumli sāshida kasā athumwui vang seihā sāmilu,

²⁹ Nawui maisorli kakaphe a chili lākhavākla ngareimilu; coat ngapaikakhuia a chili phahonla minarhaolu.

³⁰ Nathumli kapo mi kachiva̱li milu. Nathumwui ot khuithui kahai chi mapokhuiluialu.

³¹ Nali sami ngasakkhangai chi tākam eina kateibinglila sāmilu.

³² “Nathumli leikashebingmāngli leishiakha china nathumli khi tongkazā leikhala? Kaja morei kaphungbingla athumli leikashebingli leishi.

³³ Nathumli kaphā sākhamebingmāngli kaphā sāmiakha china nathumli khi tongkazā leikhala? Kaja morei kaphungbingnala chithada sai.

³⁴ Nathumna samphangra da kachihānbing māngli chishutakha china nathumli khi tongkazā leikhala? Morei kaphungbingnala morei kaphungbingli athumna chishut kahai chiyākha samphang khavai chishuta.

³⁵ Kha nathumwui yangkashebingli leishilu, kapha sāmilu, kala khikhala samphangluira da machihānlakla chishutlu. Chithākha nathumwui sāman haklakra kala Juikhamataiya Varewui naongarā ngasāra. Kaja maningshikatheia kala makaphā athumlila ana lumashanmi.

³⁶ Nathumwui Avāva̱na lumashankathei thada nathumla lumashantheilu.

Khangateili Bichar Kasā

³⁷ “Bichar masaalu chithākha nathumlila bichar masāmara; khayon mamialu chithākha nathumlila khayon mamimara; pheomilu chithākha nathumlila pheomira;

³⁸ milu, chithākha nathumlila mira; sailamlak eina katukla tukta, kakhanukla khanukta pemtha̱da nathumwui sa̱sāli chipemmira. Kaja nathumna tamsangkhami tākam eina nathumlila tamsangmira.”

³⁹ Jishuna athumli chānjam akhala hāngchithei, “Mikpeoana mikpeoali shongfa thanshaplā? Ani khanini khorjopli matāzangmaralā?

⁴⁰ Katamnaona Ojāli mareimeimana, kha kāshunglak eina tamchithei kahaiwui thili mi kachiva̱ awui ojā eina ngaraichāpapamhaora.

⁴¹ “Khisāda nawui mikli thingngumrikha kazang chi matheilaga nachināwui mikli khayim kazang chi thei jikhala?

⁴² Namikli thingngumrikha kazang chi matheirarlaga kathada nachināli, ‘Itao, namikli khayim kazang chi ina kheimiga’ da hāngpairakhala? He phākakhaninga, namikli thingngumrikha kazang chi rida kheishokhaifalu, chiwui thili nachināwui mikli khayim kazang chi kheishokmi khavai mathingrik eina theira.

Thingrong kala Chiwui Athei

⁴³ “Kaphā thingrongna makaphā athei mamatheimana, kala makaphā thingrongna kaphā athei mamatheimana.

⁴⁴ Kaja thingrong kachiva̱ hi athei eina thei. Kashātrongwui eina khaorāthei maphākhuimana, kala kara̱theirongwui eina drakhāthei maphākhuimana.

⁴⁵ Kaphā mina wuklungli kaphā phari kahai chiwui eina kaphā sāshoka, kala makaphā mina wuklungli makaphā phari kahai chiwui eina makaphā sāshoka. Kaja wuklungli pemting eina khalei chi khamorna matuishoka.

Shim Kasā Khani

⁴⁶ “Ina nathumli kakasopā masālaga khisāda ili ‘Proho, Proho’ da kahokhala?

⁴⁷ Iwuili kharā kala iwui tui shālaga chiwui athishurda kasā mi kachiva̱ chi kachikathā mikhala da ina nathumli chitheira.

⁴⁸ Chikathā mi chiya thuklak eina chuizanglaga lunghārtungli shimphunga heihailaga shim sākakā kathāna. Tara̱ kaphong tharan shim chili ungpharza̱lala mangatha̱ ngasakrarmana; khiwui vangkhala kaja chi ngaziplak eina sakā kahaina.

⁴⁹ Kha shālaga makasā mi chiya ngalei machuizangla ngaleitungli shimphunga heihailaga sākakā kathāna. Tara̱ phongda ungpharkaza̱ tharan ngalāngda ja̱phup tāhaowa kala shim chiwui kashimān chi hakmahālaka.”