LUKE 5 - Kathara Bible (BSI)

Jishuna Hokhuikhare Sākhangatha̱bing

¹ Mibingna Varewui tui nganākida awui ngalemli kharā tharan a Gennesaretwui ngayipheili a nganingda leisai.

² Ana ngayipheili marikhong khani thei; kha khaih kaphābinga marikhongwui eina thuihaida khaihlan apheohairasai.

³ Chieina Jishuna marikhong khaniwui ngachaili Simonwui marikhongli kātonglaga ngayipheiwui eina kateokha huivā khavai poi. Kala ana marikhongli pamda mibing chili tamchithei.

⁴ Ana tamchitheikup kahai eina Simonli hānga, “Kathukvāk huivāda khaih phākhui khavai nawui khaihlan horsanglu.”

⁵ Chieina Simonna ngahānkai, “Amei, ithumna ngayā pongda phāhaira, kha khikhala masamphangmana. Chithālala nawui kakaso athishurda ina horsangluiga.”

⁶ Athumna khaihlan horkasang tharan khaih sorkhangasai horkhuiya kala khaihlanla kākki jihaoda,

⁷ athumna marikhong khangateili katonga ngasotnaobingli rāngachonmi khavai apāng yapvai. Chieina athumna rāda marikhong khanini chi khaihna pemhaida ritnā kahaiwui vang marikhong chi ngaphumki jihaowa.

⁸ Kha Simon Peterna chi kathei eina Jishuwui pheizingli ngakhumzangda hānga, “He Proho, iwui eina kathuimihaolu; kaja I morei kaphunga mina.”

⁹ Athum khaih sorkhangasai horkakhui chi theilaga ala kala ali khangaso saikorala matakhakhaowa.

¹⁰ Chithada sāda Simonwui ngasotnaobing, Zebedeewui naomayara James eina Johnla matakhakhaowa. Chieina Jishuna Simonli hānga, “Mangacheealu, hiwui eina thuida ara na mi kapha ngasāhaora.”

¹¹ Athumna marikhong khani chi ngayipheili khuishokhailaga athumwui khalalei saikora horhaiphungda athi shurthuwa.

Phārrei Kakazā Mi Akhali Raikhami

¹² Thangkha ana keinung akhali pamlakha phārrei ngapharhok kahai mi akha rārāsai. Ana Jishuli theida awui mangāli ngakhumzangda poi, “Proho, nana phaningmiakha ili tharngasakshapa.”

¹³ Chieina Jishuna awui pāng katingvāda saza̱da hānga, “Ina sāmilakra, tharchaohaolu.” Ngalangda phārrei kakazā chi raichaohaowa.

¹⁴ Ana “Mi khipālikha mahānglakalu, kha vālu, na khalattana naphasā pāngmonli achitheilu kala Mosesna kaso kahai athishurda nali tharmihaira kaji mibingna machutkhui khavai pha̱kaphayā achigatlu.” da hānga.

¹⁵ Jishuwui pongli mataimeikharda pao ngayaovāhaoda awui tui nganā khavai kala athumwui kakazā raikhui khavai mi kachungkha rākazipa.

¹⁶ Kha ana lamhāngli vāda seihā vāsāthuihaowa.

Sheikasha̱ Mi Akhali Raikhami

¹⁷ Thang zimikshokha ana tamchitheida leilakha Galilee, Judea kala Jerusalemwui kha̱ kachiva̱wui eina kharā Phariseebing eina ain kathemabing awui ngalemli pamsai kala kazāt raimi khavai Prohowui pangshap chi ali ngasosai.

¹⁸ Kala yanglu, kachikathā kaikhana sheikasha̱ mi akhali pet eina ngava̱rai kala ali shimlungli khuizangda Jishuwui mangāli haikhavai hotnai;

¹⁹ kha mi chungnahaida khuizang khavai apong maleithuda athumna shimtungli kai, kala chi rānphutta ali pet eina ngasoda yarui pamda khalei alungthungli Jishuwui mangāli chihotai.

²⁰ Jishuna athumwui shitkasang chi theida hānga, “He mayara, nawui morei pheomihaira.”

²¹ Chieina ain kathembing eina Phariseebingna athum khalatta kapupta hāngngaroka, “Vareli kachipat tui khamatui hi khipākhala? Vare maningla khipāna morei pheomishapkhala?”

²² Jishuna athumwui ngahān khangarok chi theida athumli hānga, “Khisāda nathumwui wuklungli machukphāphākhala?

²³ ‘Nawui morei pheomihaira’ kaji eina ‘Ngakarthuida zatulu’ da kahāng kachipā paimeikhala?

²⁴ Kha okathuili miwui Naomayarana morei pheomi khavai pangshap lei da nathumna theikhavaina.” Chieina ana sheikasha̱ chili hānga, “Ina nali kahāngna, ngakarthuilu, nawui pet khuiphungda shimli ungulu.”

²⁵ Ana athumwui miktāli ngalāngda ngakarthui kala ana pikhavai pet chi ngava̱khuiphungda masot chikatmamānda shimli unghaowa.

²⁶ Chieina athum saikora matakhakhaoda Vareli masochikata; kala khangacheena pemtinghaida “Ithumna matheisālak kaji ot aja theihaira.” da hāngngaroka.

Jishuna Levili Kaho

²⁷ Chiwui thili Jishuna ayar kashok eina khāshinā shānkhavai shimli Levi kaho khāshinā khaloka mi akha pamkasa thei, chieina ali hānga, “Ithi shurlu.”

²⁸ Chieina Levina ot saikora nothāhaiphunglaga ngakarthuida athi shurthuwa.

²⁹ Chiwui thili Levina ashi shimli Jishuwui vang zātkhān kahaka akha sai; phazāt chili khāshinā khalokabing kala khangatateibingla zangda mi kachungkha kazipa.

³⁰ Chieina Pharisee eina ain kathembingna awui sākhangatha̱bingli mamayāngaimada, “Khiwui vang eina nathumna khāshinā khalokabing kala morei kaphungbingli phāshak phazārumkhala?” da hānga.

³¹ Chieina Jishuna athumli ngahānkai, “Kazāt makhaleibingna khanong mahomana, kha kakazābingna kahona;

³² Iva khamashung-khangarongbingli hokhui khavai kharā maningmana, kha morei kaphungbingli ning ngateikhui khavai hokhuikida kharāna.”

Kakhumwui pongli Khangahān

³³ Athumna ali hānga, “Johnwui sākhangatha̱bingna toilak eina khumda seihā sai kala Phariseebingwui sākhangatha̱bingla chithada sai, kha nawui sākhangatha̱bingva phāshak phazāpamli.”

³⁴ Chieina Jishuna athumli hānga, “Khām kahaia china athumli ngasopamlakha shakzātli kharābingli chikhumpairalā?

³⁵ Khām kahaia chili athumwui eina khuikathui atam rārāsāra, chithanghon athum khumnaora.”

³⁶ Ana athumli chānjam akhala hāngchithei; “Mi khipānakha kadhara chonsāwui eina akainao akha serkhuilaga kachama chonsāli mataksangmana; taksangakha kadhara chonsā chila kakhaowa kala kadhara chonsā chi kachama chili machāluimana.

³⁷ Khipānakha drakhāra̱ sangkhavai sāhuikhao kachamli drakhāra̱ kadhar mathaisangmana; thaisangakha kadhara drakhāra̱ china khao chi ngawokkhaida heitha̱haora, khaola shimānhaora.

³⁸ Kha drakhāra̱ kadhar chi sāhuikhao kadharli sangphalungra.

³⁹ Kala khipānakha drakhāra̱ arar mangkahaiwui thili anui mamangngailui mana kaja ‘Arar phāmeiya’ da ana hānga.”