LUKE 24 - Kathara Bible (BSI)

Ringkhalui

¹ Haptāwui kharethang ngathorthakva̱ sha̱naobing china ngarān kahai nganamkaphā thaoyur bing chi khuiphungda chikhurpamli vai.

² Athumna chikhurwui lungsham khalangshokhairakasā chi thei.

³ Kha chikhurli zangkhayang eina angun maleisāmana.

⁴ Ningreikhasut eina leilakha hānshi kahai kachon khangavai mi khani athumwui ngalemli nganingsai.

⁵ Athumna ngacheenāhaida ngaleili mashunkazang eina anina hānga, “Khisāda kathewui ngachaili kharingali phākhala?

⁶ A hili maleimana kha ringshokhaira. Galileeli leilakha ana nathumli kathada hāngmihaikhala kaji chi phaningunglu:

⁷ ‘Miwui Naomayarali morei kaphungbingwui pāngli horsangmida krushtungli shaothatra kala kakathumathang ringluira.’”

⁸ Chieina sha̱naobing china hāngkahai tui chi phaningunga,

⁹ kala chikhurwui eina hanungda tui saikora chi tharāda akha eina chili leikasābing saikorali unghānga.

¹⁰ Paokazatbingli ungkahāngbing chiya Mary Magdalene, Joanna, Jameswui ava̱ Mary kala athumli ngayurkasā sha̱nao khangateila zanga.

¹¹ Kha tui chi hangphāphā kajina da sākhangatha̱bingna makhuisangmana.

¹² Kha Peterna ngakarthuida chikhurli ngasamvāda khayang chitharan khamanaka kachon chimāng leisai, kala kathāhaokhala da matakhak eina shimli latunghaowa.

Emmausli Khavā

¹³ Chithang Jishuli kashura mi khani, Jerusalemwui eina Kilometre tharā sha̱kha katā Emmaus kaho kha̱ akhali vākida zatlakha,

¹⁴ shokkahai maram saikora anina ngazekzatsai.

¹⁵ Anina ngazekzatmamānda leilakha Jishuna rānganaida anili ngasozata.

¹⁶ Kha anina ali mamachutrarthuwa.

¹⁷ Chieina ana, “Nani khi ngazekazatkhala?” da ngahāna. Wukkhananglak eina ani khani nganingshakhaowa.

¹⁸ Aniwui ngachaili Cleopas kaho china ngahānkai, “Aruihon Jerusalemli khi shokmameikhala kaji makathei namānga, na kachiwui eina kharākhala?”

¹⁹ “Khi sāthukhala?” da ana ngahāna. “Nazarethwui Jishuli shokkahai maramna. Mipā hi Varewui mangalila, miwui mangalila kala otsak, tuimatui saikorali pangshap khaleia marān akhana” da anina ngahānkai.

²⁰ “Ithumwui pāngmon akhokabing, kala kathānabingna ali kathiwui tandi mikhavai horsangmida krushtungli shaothathaowa.

²¹ Israelli ngatangmiki kaje chi alaka da ithumna chihānsai. Chili lāngda otshot hi shokta ajana kathumthanghaira.

²² Matakhak kahaipāva, ithumwui ngachaili sha̱nao kaikhana unghānga, kaja athumna ngathorthakva̱ chikhurpamli vai,

²³ laga awui angun maleisathu-iji, kazingrao khani leisāda Jishu ringhaira da anina hānga ji.

²⁴ Ithumwui ngasotnao kaikhana chikhurli ayanga kala sha̱naobingna kahāng chi tākam eina leisai, kha aliva matheithuwa.”

²⁵ Chieina Jishuna anili hānga, “O mangkhama̱ khani! Marānbingna hāngkahai saikora chili mashitkasang!

²⁶ Awui tekhamateili zangkhavai Khristana kachotkachāng phungphalungki kaji maningmalā?”

²⁷ Moseswui eina thuilaga marān saikorana awui maramli kapihaikasā katonga chi Jishuna anili khalatmisera.

²⁸ Anina vāki kaji kha̱ chi nganaiuwa, kha Jishuna tāmei vāki kaji thada kathei eina,

²⁹ anina khāmda hānga, “Ara, kazing yingda taiura, nala hili pisanghaosa” kaji eina ala mayāda pamsanghaowa.

³⁰ Phazāuki kaji eina ana khamui khuida seihā sālaga serkhaida ngayarmi,

³¹ kala aniwui mik mathingmida a khipākhala kaji theingasakhaowa. Kha aniwui eina shimānhaowa.

³² “Shongfali zatmamānda ana chān khangazek kala Varewui tui pheikachithei tharan ningli meikachui mathāmalā?” da ani akha eina akha ngazek ngaroka.

³³ Anina ngalāngda ngakarthuida Jerusalemli latunga; chitharan tharāda akha kala athumli khangasobing chi kazipkha sāda leikasā chi ungthei,

³⁴ kala hithada hānga, “Proho kachangkhat ringluihaira, Simonli rāchitheihaira!”

³⁵ Chiwui thili anina shongfali khi shokmameikhala kaji kala khamui serkakhaili anina kathada theikhuikhala kaji saikora meisā eina hāngchithei.

Sākhangatha̱bingli Rāsamkaphang

³⁶ Anina hāngchithei mahungda leilakha Jishuna athumwui alungli rānganingda hānga, “Nathumli chingrihairanu.”

³⁷ Kashuirakhaida athumna kathi manglākā da phaninglaga ngacheelakhaowa.

³⁸ Kha ana hānga, “Khisāda ngacheeda ningli chukmaja̱phāphākhala?

³⁹ Hi ilaka kaji theikhavai iphei, ipāng rāyanglu ili singyanglu, khikhalajila nathumna ili kathei thada kathi manglāva asā eina ara̱kui mangavāmana.”

⁴⁰ Hi hānglaga apāng eina aphei athumli chithei.

⁴¹ Athumna ringphanāhaida mashitsangrarmada matakhak eina leilakha ana hānglui, “Nathumwuili khikhakha shaikhavai leilā?”

⁴² Chieina athumna hangkahai khaih akha khuimi,

⁴³ ana chi khuida athumwui miktāli shai.

⁴⁴ Chiwui thili ana athumli hānga, “Hi ina nathumli ngasopamlakha hāngkahai, matui kahai saikora china, kaja marānbingwui lairikli, Moseswui ningkhami lairikli, Laa lairikli kapi kahai saikora chi ungshungphalungra.”

⁴⁵ Chiwui thili Katharatui chi theishingkhui khavai athumwui ning mathing ngasakta hānga,

⁴⁶ “Hithada kapihaili, kaja Messiahna kachotkachāng phungphalungra kala kakathumathang kathiwui eina ringluira.

⁴⁷ Kala awui ming singda nathumna Jerusalem eina thuida miyur saikorali ningngateida morei pheokhavai pao hāshokra.

⁴⁸ Nathumna ot saikora hiwui shākhina.

⁴⁹ Kala yanglu, ina iwui Avāwui ngashit kahai chi nathumli shirātra, kha atungshongwui eina nathumli pangshap chi mamiranglakha keinung hili honpamsālu.”

Kazingramli Khuikakā

⁵⁰ Chiwui thili keinung eina thānshoklaga athumli Bethany eina tangda thānvai kala apāng khangkāda athumli somi.

⁵¹ Ana somimamānda leilakha athumwui eina pakthuida kazingramli khuikāhaowa.

⁵² Athumna mathānthup eina Jerusalemli latunghaowa,

⁵³ kala thangkachida khorumshimli kāda athumna Vareli sochikatchinga.