LUKE 23 - Kathara Bible (BSI)

Pilatewui Mangāli Khuikhavā

¹ Chiwui thili athum katonga ngakarthuida Jishuli Pilatewui mangāli

² khuivālaga hithada kasotsanga, “Mipā hina ithumwui yurli mashongachei ngasakta Caesarlila shai mami khavai khāma kala akhalatta Khrista Awunga akhana ji.”

³ Pilatena ali ngahāna, “Na Jihudiwui awungalā?” Ana ali ngahānkāda hānga, “Chi nana hānghaira”

⁴ Chieina Pilatena pāngmon akhokabing eina yarui ashangva̱ chili hānga, “Mipā hiwui khayon khikha masamphangmana.”

⁵ Kha athumna pangmeida hānga, “Awui tamkachithei china Judea ngalei katongali pa̱ngapā ngasakhaira. Hi ana Galileewui eina haophoklaga ara hilila rāshunghaira.”

Herodwuili Chihokhavā

⁶ Pilatena chi kashā eina, “A Galileewui milā” da ngahānna.

⁷ Jishu hi Herodna khamunga ngaleiwui eina kharāna da Pilatena kathei eina ali Herodwuili chihovai, atam chitharan Herodla Jerusalemli leisai.

⁸ Herodna Jishuli kathei eina ringphālakhaowa, kaja awui otsakwui pongli tarākha shahairasāda atam kasāngkhawui vang theingailak eina leisai kala matakhak kahai machut samphangra da chihānsai.

⁹ Chieina ana Jishuli khangahān kachungkha sai, kha ana khikha mangahānkāmana.

¹⁰ Chili nganingkasā pāngmon akhokabing eina ain kathemabingna Jishuwuitungli zakshilāk eina phena.

¹¹ Herod eina awui shipaibingnala zeida mana̱shiya. Chiwui thili wungnao sāri ngavaimilaga Pilatewuili chihovāluishithaowa.

¹² Chithang eina thuida Herod eina Pilate mashithaowa, kaja rida ani khani yangshi ngaroksai.

Jishuli Shaothat khavaiwui Tuitak

¹³ Pilatena pāngmon akhokabing kathānabing kala yaruibingli hokhuiserda hānga,

¹⁴ “Nathumna mipā hili mashongachei khangasaka mina da khuirai, ina nathumwui miktāli khari-kharāda ngahānyanghaira, kha awuitungli kaphen saikora chi khikha khamashung masamphangmana.

¹⁵ Herodnala masamphangmada ithumwuili chihoraluishit kajina. Ana thikhangayi khalāng otsak khikha masāhaimana.

¹⁶ Chiwui vang eina ali hāngmachinlaga chihohaora.”

¹⁷ Makānkhami phanit kachida phātop kazang akhali athumwui vang chihomichinga.

¹⁸ Kha athumna khokkha sāda vaowa, “Mipā hili shaothathaolu! Kala Barabbasli chihomilu”—

¹⁹ keinungli tui shokkhangasakwui vang kala mi shaokathatwui vang Barabbasli phātop sanghaisai.

²⁰ Pilatena Jishuli chihongaihaoda athumli hāngluishita;

²¹ kha athumna, “Krushli shaothathaolu, Krushli shaothathaolu!” da panglāk eina vaowa.

²² Kakathumali ana hānga, “Ana khi khayon sāhaokhala? Ana thikhangayi apong khikha masamphangmana. Chiwui vang eina ina ali hāngmachinlaga chihohaora.”

²³ Kha athumna marmeikharda ali shaothatphalungra da vaohaowa kala athumwui tuina yuihaowa.

²⁴ Chieina athumwui kapo athishurda Pilatena khamayā mihaowa.

²⁵ Chieina mi shaokathata phātopli sanghaikasā Barabbasli chihomihailaga Jishuli athumwui ningkachāng chi sākhavai Pilatena horsangmihaowa.

Krushli Shaokathat

²⁶ Athumna Jishuli thānkazat tharan kha̱ramwui eina kharā Cyrenewui Simon kaho mi akhali tukkhuilaga krush chi chiphunda Jishuwui khanukli shurzat ngasaka.

²⁷ Kala mi kachungkhala shurvai. Chiwui ngachaili Jishuwui vang malungringda chapkhangachā, sikafa sha̱naobingla zanga.

²⁸ Kha Jishuna athumli ngareiungda hānga, “Jerusalemwui naongalāva̱bing, iwui vang machapalu, kha nathum khalattawui vang kala nanaongarāwui vang chaplu.

²⁹ Khikhalajila ‘Yanglu, naokashumva̱, nao makapharāva̱, kala na̱ makashimanva̱, athum sokhami ngasāranu’ da hangki kaji atam rārāli.

³⁰ Chitharan athumna kaphungli ‘Ithumli khaminrorlu’ kala ‘Leisumsumli ithumli kakhayinlu’ da hāngra.

³¹ Kala thingna matekta leilakha chithākha thengkahai tharan khi shokrakhala?”

³² Kala Jishuli ngasoda yomnao khanilila shaothat khavai thānvai.

³³ Athumna Mikuira̱ kaho apam chili vākashung eina Jishuli krushli kala yomnao khani chili, akhana yāshong, akhana uishong da shaothata.

³⁴ Jishuna hānga, “Avā, athumli pheomilu, athumna khi kasākhala da matheimana.” Kala awui kashankachon ngayar khavai athumna ka̱lā yanga.

³⁵ Mibing china chiwui ngalemli nganingda ngashānyangda leilakha, Jihudiwui kathānabingna zeida hānga. “Ana mi kateiliva huishapa, A hi Varewui kapangkakhui Khristana jiakha akhalatta huikhuiranu”

³⁶ Shipaibingnala mana̱shida atheira̱ kathur rāmikhaningda

³⁷ hānga, “Na Jihudiwui awungana jiakha nakhalatta huikhuilu.”

³⁸ Kala awui kuishakli. “Hi Jihudiwui Awungana” da kapihai.

³⁹ Yomnao khani chiwui ngachaili akhana, “Na Khristana kaji maningmalā? Nakhalattala kala inilila huikhuilu” da zeida hānga.

⁴⁰ Kha akhapā china hānga, “Nala ngaraikachā shongrān samphangda leilaga Vareli mangacheemalā?

⁴¹ Iniva inina sākahai chiwui athei samkaphangna, kha ava khikha khalāng makhalei mina.”

⁴² Kala ana hānga, “Jishu, nana nawui wungramli kazang tharan ili kaphaningungmilu.”

⁴³ Chieina Jishuna hānga, “Kachangkhat eina ina nali kahāngna, na aja ili ngasoda Paradiseli pamra.”

Jishuwui Kathi

⁴⁴ Ara chi pung katharukawui atamna, kala pung kachiko atam eina tangda apam saikora ngamitinghaowa,

⁴⁵ zimikla mahorthu kala khorumshimwui kachon rānkahai chila khani sāda kākhaowa.

⁴⁶ Chiwui thili Jishuna panglāk eina vaoda, “Avā, nawui pāngli imanglā horsangli!” da hānglaga thihaowa.

⁴⁷ Kashokshok chi theilaga raimi shākhawui akhavā china Vareli sochikatta hānga, “Makahatlakla, mipā hi khamashunga mina.”

⁴⁸ Kashokshok saikora yangkhavai kazipkasā mi saikorana otshot chi theida malungkaphelaga shim hanungserhaowa.

⁴⁹ Awui theikhamasuia saikora kala Galileewui eina athi shurkharā sha̱naobing chila khalāda nganinglaga otsak saikora ngashānyanga.

Jishuli Kachifa

⁵⁰ Chitharan Judeawui keinung Arimatheawui eina kharā Joseph kaho mayarnao akha leisai. A hi hangva̱ akhavāna kala kaphā khamashunga mina.

⁵¹ Athumwui otsak chili a mazangmana kha Vare wungram kharā ngaraikapama mina.

⁵² Mipā hina Pilateli Jishuwui angun apoi.

⁵³ Ana angun chi khuitālaga kachon khamanaka akha eina romhai, kala mi khipālikha machizanlakrang kaji kashokakhui lungkhur chili chizana.

⁵⁴ Chithang khangarān kasā zimiksho ngasāsai kala sabbath haophokki jiurasai.

⁵⁵ Galileewui eina ngasokharā sha̱naobing chi Josephli shurvālaga chikhurla kala kachizanla athei,

⁵⁶ Chiwui thili athumna shimli latunglaga nganamkaphā thao ayur-ayā khangarān sakhui. Sabbaththang ningkhami athishurda athumna ngasāmkhui.