LUKE 15 - Kathara Bible (BSI)

Shiman kahai Yaonaowui Chānjam

¹ Ara khāshinā khalokbing eina morei kaphungbingna Jishuwui tui nganākida rāsera.

² Phariseebing eina ain kathembingna kapupkaseoda hānga, “Mipā hina morei kaphungbingli samphanglaga phakazāla phazārumli.”

³ Chiwui vang ana athumli chānjam hi hāngchithei:

⁴ “Nathumwui alungli khipana yao shākha leilaga, akha shimānhaiakha yao hangchikoda chiko chi lamhāngli haihailaga shimān kahai yao akha chi masamphangranglakha eina tangda maphāmarakhala?

⁵ Ana chi samkaphang tharan mathanthathup awui yartuili khāngkākhui.

⁶ Ana shimli khaung eina awui ngasotnaobing kala khongnainaobingli hokhuilaga hānga, ‘Ithum ringphārumsa kaja iwui shimān kahai yaonao chi samphanghaira.’

⁷ Chithada sāda ina nathumli kahāngna, ning ngatei khavai makhalei khamashung khangaronga mi hangchikoda chikoli ngasokapamliva morei kaphunga mi akhana ning khangatei china kazingramli mathānmeikharra.

Shiman kahai Lupāwui Chānjam

⁸ “Lha sha̱nao khipana lupāsā tharā leilaga akha shimānhaiakha ana thaomei sharkāda shim pha̱da masamphangranglakha eina tangda ningkachāng eina maphamarakhala?

⁹ Ana chi samkaphang eina khongnainaobingli hokhuilaga hānga, ‘Ithum ringphārumsa kaja shimān kahai lupā chi samphanghaira.’

¹⁰ Chithada sāda ina nathumli kahāngna, morei kaphunga akhana ning khangatei chitharan Varewui kazingraobingna ringphā mathāna.”

Shiman kahai Naomayarawui Chānjam

¹¹ Kala ana hānga, “Mi akhawui naomayara khani leisai.

¹² Agato china avāva̱li hānga, ‘Ava, iwui shimluiyar milu.’ Chieina avāva̱na awui khalalei lan saikora ani chinaonili ngayarmi.

¹³ Zimiksho khani kathumthangwui thili ana awui shimluiyar yorkhuiserhailaga pheisā chi khuiphungda ngalei katāva̱ akhali thuihaowa. Apam chili sopmasaplak eina okthuilaga awui lan saikora sākasakserhaowa.

¹⁴ Ana awui khalalei saikora sākasakser kahaiwui thili apam chili chāmrei rāda zākhavaila maleithuwa.

¹⁵ Chieina ngalei chiwui ruichumnao akhawuili ot asai kala ali awui hok homkhavai luili chihovai.

¹⁶ Ana thainā kahai eina hokzāt chila zāngai, chithālala khipānakha ali mamizāmana.

¹⁷ Ning mathingkhaung eina ana hānga, ‘Iwui Avāna masākakhui rao saikora athumwui zāshapli lāngmeida samphanga, kha ina apam hili kathaina thiki jiura!

¹⁸ Ina ngakarthuida ishāvāwuili latungura kala ina ali, Avā, ina Varewui mangalila, nawui mangalila khayon ot sāhaira.

¹⁹ I nawui nao akhana da mahophayoluimana; nawui masākakhui rao akha thada kakhuimilu’ da hāngra.

²⁰ Chieina ana ngakarthuida avāva̱li unga. “Kha ana katāva̱li zatta khalei chi avāva̱na kathei tharan awui wuklungli lukhamashana pemtinghaoda ngasamvālaga angavamkhuida ali maya̱ya.

²¹ Chieina anaomayarana ali ‘Avā, ina Varewui mangālila, nawui mangālila khayon ot sāhaira, I nawui nao akhanada mahophayoluimana’ da hānga.

²² Kha avāva̱na awui raobingli kasoi, ‘Thakta mathāmeikap kaje kachon khuirāda ali rāngavaimilu. Apāngli khutop rāsangmilu kala pheihop ngahopmilu;

²³ kala asakakā seinao akha ashimenkhuilaga taithatlu, ithum phāshak phazāda ringphārumsa;

²⁴ kaja inaomayara hi thihairasai, kha ringluihaira; shimānhairasai, kha ara samphangluihaira.’ Chi eina athumna shaohāhā mana̱da ringkaphā eina phāshak phazāruma.

²⁵ “Chithada leilakha naomayara khararra chi luili leisai. Ana ungmamānda shim ungkhanganai eina laa kasā kala pheichak kasākhon shai.

²⁶ Chieina ana rao akhali hokhuida, ‘Khi kasākhala’ da ngahāna.

²⁷ Rao china hānga, ‘Nagato unghaira kala ka̱lākashi maleila samphangluishit kajiwui vang navāna asākakā seinao taithatmi.’

²⁸ Chi kashā eina ama chi malungvātnāhaida shimlungli makāngaiga jihaowa. Chieina avāva̱na shoksuiya.

²⁹ Kha ana avāva̱li hānga, ‘Yanglu, ina nali kum hirankha otram ngatha̱mihaira kala nawui kahāng makailakranga; chithālala nana ili iwui ngasotnaobingli ngasoda ringphārum khavai menao akhala mataithatmilakranga.

³⁰ Kha nawui naomayarapā hina sopkhamasap sha̱naobingli ngasoda nawui lan sāmakanmihailaga hankhaung tharan nana awui vang asākakā seinao taithatmilamā!’

³¹ Chieina avāva̱na ali hānga, ‘Inao, nava ili ngasopamching kajina kala iwui khalalei saikora hi nawuisera.

³² Kha hiya mathānda ringphārum ngayilak kahaina, kaja nagato hi thihairasai, ringluihaira; shimānhairasai, kha samphangluishithaira.’”