LAA 99 - Kathara Bible (BSI)

Reikhamataia Khamunga Vare

¹ Prohona munga, mibingna kathirranu! Ana Cherubtungli pama; okathuina nganukranu!

² Zionli Proho reikhamataiana, miyur saikora vāshungda ali masot chikata.

³ Nawui reikhamatai, khangachee mingli athumna sochikatranu! Kathara chi ana!

⁴ Pangshapa awunga, mashunli leikashe, nana mashun chi sakāmihaira, nana mashun-makhui yangmihaira, kala Jacobli khamashung khangarong chi sakāmi.

⁵ Ithumwui Proho Vareli solu; awui pheizingli khorumlu! Kathara chi ana!

⁶ Moses eina Aaron awui pāngmonbingli zangsai, Samuella awui mingli khangakaoli zangsai. Athumna Proholi ngakaowa, kala ana athumli ngahānkāmi.

⁷ Muiyāwui pākra̱ eina ana athumli ngazekmi; athumna awui hāngkahai, kala ana mikahai shiyan-chikan mayona.

⁸ O ithumwui Proho Vare, nana athumli ngahānkāmi; na athumli pheokhame Vare sāsai, kha athumwui khalāng chili athut kakhuiana.

⁹ Ithumwui Vare Proholi sochikatlu, kala awui kathara phungreili khorumlu, kaja ithumwui Proho Vare katharana.