LAA 98 - Kathara Bible (BSI)

Okathui Khamunga Vare

¹ O Proholi laa kadhar sālu, kaja ana matakhak kahai ot sāmihaira! Awui yāpāng kala kathara pāngthei eina ali rai yuingasakhaira.

² Prohona awui khayui chi chitheimihaira, ana athut kakhui yur saikorawui mikyanli phongmihaira.

³ Israel shimkhurli awui makhangachei leikashi, kala ningkatong phaningungmihaira. Ithumwui Varena khayui okathui akatang saikorana theihaira.

⁴ Okathui saikora Proholi mathānda vaolu; khamathān laa sāphokulu kala masotlaa sālu!

⁵ Tingteilā eina Proholi masotlaa sālu, tingteilā kala nimshimri kahai khon eina!

⁶ Talla̱ kala angajikhon eina Proho Awungawui mangāli ringkaphākhon vaolu.

⁷ Yirei kala chili khalei saikorala solu; apuk-apaga kala chili kharing saikorala!

⁸ Tara̱ kaphongnala pāng kapheranu; kaphungbingnala ringkaphā laa sārumranu

⁹ Prohowui mangāli, kaja ana okathuli bichar sākhavai rai. Ana apuk-apagali khamashung khangarong eina bichar sāra, kala mibingli mashun eina bichar sāra.