LAA 97 - Kathara Bible (BSI)

Reikhamataia Khamunga Vare

¹ Prohona munga, okathuina mathānranu; ngayipheili khalei ngalei kachungkhana ringpharanu.

² Muiyāla kala tangmangting kahai chila awui kuikhamareili lei; khamashung khangarong kala mashunna awui wungpamkhong rungkhavaina.

³ Awui mangāli mei shoka, kala awui ngalemli khalei yangkashebingli chuitāserhaowa.

⁴ Awui rikhān apuk-apagali horvai; okathuina chi thei kala kathira.

⁵ Prohowui mangāli phungreibing khuira̱ thāda menga, okathui saikorawui Prohowui mangāli.

⁶ Kazingramna awui khamashung khangarong phongmi; kala yurbing saikorana awui tekhamatei thei.

⁷ Meoma̱li khokharum saikorali maishi ngasaka, makānkhana meoma̱wui vang langkasobing chili; vare saikorana Prohowui mangāli khoruma.

⁸ Zionna shāda ringphai, kala Judahwui nao ngalāva̱bing mathāna, O Vare, nawui mashun bicharwui vang.

⁹ Kaja na, O Proho, okathui saikorali na juimeikapa; varebing saikorawuitungli nali somataimeikapa.

¹⁰ Makaphāli ningkakachaibingli Prohona leishi; awui katharabingwui manglā ana kanmi; makhayābingwui pāng eina ana kanshokmi.

¹¹ Khamashung khangarongbingwui vang kahor shokngasaka, kala wuklung khangatarbingwui vang ringphāngasaka.

¹² Proholi ringphalu, O khamashungabing, kala awui katharamingli ningshilu.