LAA 96 - Kathara Bible (BSI)

Reikhamataia Awunga Vare

¹ Proholi laa kadhar sālu, okathui hupta Proholi laa sālu!

² Proholi laa sālu, amingli solu; awui huikhami thangkachida hānglu.

³ Awui tekhamatei miyur saikorawui alungli hāngmilu, awui matakhak kahai otsak mi saikorali phongmilu.

⁴ Kaja Prohohi reikhamataiana, kala hakmahālak eina masot mikhangayiana, vare kateibingli lāngda ali khayāshiki kajina.

⁵ Kaja mibingwui vare saikora meoma̱sera; kha Prohona kazingram sai.

⁶ Ngam kala khayākakā awui mangāli lei; yāng eina khamathā awui kathara shimli lei.

⁷ O yurbingwui shimkhurbing Proholi solu, tekhamatei kala pangshap Proholi milu.

⁸ Amingli masot mikhangayi tekhamatei chi Proholi milu; kachigat khuirālu, kala awui shimli zanglu.

⁹ Kathara sāri sāda Proholi khorumlu; okathui saikora, awui mangāli ngacheelu.

¹⁰ Yurbingwui alungli, “Prohona munga! Mha, apuk-apaga sakāhaira, mangacheiluilakmara; ana yurbingli mashun eina bichar sāmira” da hānglu.

¹¹ Kazingramna mathānranu, kala okathuina ringpharanu, shamadruna ngaphaoranu, kala chili khalei saikorala;

¹² luila, chili khalalei huptala mathānranu! Chieina ngahongli khalei thing saikora

¹³ Prohowui mangāli khamathān laa sāra, kaja ana okathuili bichar sākhavai rai. Ana khamashung khangarong eina ngasoda apuk-apagali kala mibinglila khamashung eina bichar sāra.