LAA 94 - Kathara Bible (BSI)

Saikorawui Bicharwo Vare

¹ O Proho, athut kakhuia Vare, athut kakhuia Vare, horlu!

² Ngakarthuilu, O okathuiwui bicharwo; langkasobingli athumwui samphangkhangayi chi hāngsangmilu.

³ O Proho, makhayā athumna, makhayā athumna karankha mathānfarakhala?

⁴ Athumna langsolak kahai tuimatui, makaphā kasā saikorana langsoi.

⁵ Athumna nawui mibingli ngataikachupa, O Proho, kala nawui shimluikatli chotchāng ngasaka.

⁶ Athumna ra̱meinao eina ramkazatali shaothata, avāva̱ makhaleiyali sāthata;

⁷ kala athumna, “Prohona matheimana, Jacobwui Varena matheirarmana” da hānga.

⁸ Theikhuilu, mangma̱meikap kajebing! mangkhama̱bing, nathum katharan thangmeinaorakhala?

⁹ Khanā shomkhame china mashāmala? Mik wutkhame china matheimala?

¹⁰ Miyurli hāngkhamachina china mamachinmala? Mili theithangkhamei tamkachitha,

¹¹ Prohona miwui kaphaning thei, chiya athum khaksuikha kathāna.

¹² O Proho, nana hāngkhamachin, kala nawui ainwui eina tamkachitheia mi chi sokhamina

¹³ kaja makaphābingwui vang chom machuikhuiranglakha, ali kakhanang atamwui eina ngasāmkhui ngasaka.

¹⁴ Kaja Prohona awui mibingli mahorhaimara; ana awui shimluikatli machihohaimara;

¹⁵ kaja mashun china khangarongabingli hanungra, kala ning khangatarbingna chili shurra.

¹⁶ Makhayāwui eina iwui vang khipāna nganingmi? Makaphā kasaali iwui vang khipāna nganingmi?

¹⁷ Prohona iwui ngachonkhame maningsāsi kaja akhon akhak makashāpamli imanglā pamhairara.

¹⁸ “Iphei nganaithuihaira” da ina kaphaning tharan O Proho, nawui makhangachei leikashina khāngkhuimi.

¹⁹ Iningli kakhanang kachungkha khalei tharan, nawui ninglumkhamina imanglā ringphāngasaka.

²⁰ Makaphā khamungabingna makhamashung ain sākakhui chili nana sakrumpairala?

²¹ Khangarongawui mirinli mamayāmada athumna ngarumda khuma, khalāng makhalei mili thikhavai khayon mi.

²² Kha Prohona iwui ngavei ngasāhaira, kala iwui Varena iwui ngayin khavai lunghārna.

²³ Ana athumwui khangui khalāng athumli hanmiluira, makaphā kasāwui vang yaituphaora; ithumwui Proho Varena athumli yaitupmihaora.