LAA 93 - Kathara Bible (BSI)

Vare Awunga

¹ Prohona munga; a ngamkharei eina wungsāri shaksai, Prohona pangshap eina shānneira̱ sai. Mha, apuk-apaga sakāhaira; mangatha̱luilakmara;

² nawui wungpamkhong achālakhawui eina sakā kahaina, nava katang makhavaiwui einana.

³ O Proho, tara̱ kaphongnala ngaphaokāhaira, tara̱ kaphongna athumwui akhon juikai, kala ngashum-kakanghai.

⁴ Tara̱ kachungkhawui khangashumli lāngda pangmei, shamadruwui khangaphaoli lāngda pangmei, atungli khalei Proho panglaka.

⁵ Nawui hāngkahai mangapatmana, tharkhamathengna nawui shim pema, O Proho, katang mavaila.