LAA 92 - Kathara Bible (BSI)

Masotkhami Laa

¹ Proholi ningkashi khami kaphāna, namingli masotlaa kasā, O Juikhamataia;

² ngathorshong nawui makhangachei leikashi, kala ngayā nawui ningkatong phongkashok,

³ sipa̱ tingteilāwui laa kasā ningkhamayung laa eina ngasoda.

⁴ Kaja O Proho, nawui otsakna; ili mathān ngasaka, napāngna sāmi kahaiwui vang mathānda ina laa sai.

⁵ O Proho, nawui otsak teokha hakmahāle! Nawui ning thuklaka!

⁶ Mangkhama̱na matheirarmara, mathangkhama̱ mina hi matheikhuirarmana:

⁷ kaja, makhayā mina wonnui thāda shonlala, kala makaphā kasā mina shāngsanglala, athumva shimānchaohaoki kajina,

⁸ kha nava, O Proho, kajuipamli leichingra.

⁹ Kaja yanglu, O Proho, nawui yangkashe, kaja yanglu, nawui yangkashebing shimānhaora, makaphā kasā saikora chaiyānghaora.

¹⁰ Kha nana ramsei ngaji thāda ili pangngasaka, ikuili kadhara thao nana heirormi.

¹¹ Imikna yangkashebingwui kongkhalui theihaira; ikhanāna makaphābingwui kashimān chi shāhaira.

¹² Khangarongana khaneirong thāda mataisanga, kala Lebanonwui cedarthing thāda phora.

¹³ Athumli Prohowui shimli lingsanghai, Varewui kayāngli reisanga.

¹⁴ Athumna rarhailala athei matheichinga, thingra̱ zatta matekchinga,

¹⁵ Vare hi khangarongana da theikhavaina; a iwui lunghārna, kala awuili makhangarong maleilakmana.