LAA 91 - Kathara Bible (BSI)

Vare Ithumwui Ngākkhame

¹ Juikhamataiawui ngayin khavaili kapama, Pangshapwui khaya̱li khangasāma china,

² Proholi, “Iwui ngayin khavai kala raipan; ina shitkasanga iwui Vare” da hāngra.

³ Kaja khalen kasangawui eina kala kazātkashi kharāwui eina ana nali kanshokmira.

⁴ Pheimareng eina ana nali farormira, kala angachāng zingli nana ngayin khavai samphangra; awui ningkatong hi chāngvei kala shānneira̱na.

⁵ Nana ngayāwui khangachee khangachāli kala ngashun malā thaikharā chili mangacheemara,

⁶ tangkhamangli kazātkashi yunkazat kala ngashunshong kashimān shoklala mangacheemara.

⁷ Thingkha nawui ngalemli rāpitalapai, thing tharāna nawui yāvāk; kha china nangalemli marāza̱rarmara.

⁸ Nana namik eina yangmara, kala makhayāli athut kakhui chi theira.

⁹ Khikhalajila Proholi nana nawui ngayin khavai sāhaoda, Juikhamataia nawui pam sahaoda,

¹⁰ nawuitungli makaphā marātāmara, shimkhurli kalāshāt maramara.

¹¹ Kaja nawui kazat pam saikorali mayonmi khavai awui kazingraoli kasora.

¹² Ngalungli naphei ngaphokpaishina da athumwui pāng eina nali khāngkāmira.

¹³ Kazingkha̱li, phara̱li, nana naira, kazingkha̱naoli, phara̱li nana napheizingli naikazamra.

¹⁴ Khikhalajila ana ili leishida ngavaphaoda, ina ali kanshokmira, imingli shitkasangwui vang ali ina mayonmira.

¹⁵ Ana ili kaho tharan, ina ngahānkāra; ali kakhanang tharan ina ngasomira, ina ali ngatangkhuida maiyā ngasakra.

¹⁶ Kasangkha okpeida ina ali ningyāng ungngasakra, kala iwui huikhami ali chitheira.