LAA 90 - Kathara Bible (BSI)

LAIRIK IV ( Laa 90—106 ) Vare eina Mikumowui Apong

¹ Proho, thot saikorali na ithumwui ngasām khavaina,

² Phungreibing masāshokranglakha, okathui kala apuk-apaga eina tangda masāranglakha, katang makhavaiwui eina katang makhavai vāpeida na Varena.

³ Nana mili chifali latung ngasakta “O mibingwui naongarabing, chifali latvālu” da hānga.

⁴ Zingkum thingkha nawui vang thangkha kathāna; athum chiya ayā thāda, thuihaira, lah ngayāwui pung akha kathā thai.

⁵ Mili nana khuithuihaowa; athum chiya mangshong thai; ngathor nganaoungkhalui khawo kathāna:

⁶ Ngathor nganaozao hailuishita; ngazin ngahuida thenghaowa.

⁷ Kaja ithumli nawui malungkhavātna yuihaowa, nawui malung kakangna yuithuihaowa.

⁸ Ithumwui khayonkhamāng namangāli nana haiya, thumkahai ithumwui moreila nawui kahorli thei.

⁹ Kaja ithumwui mirin saikora nawui malungkakang alungli kānthuiya, ithum zingkum khaksuikha thāda kuphaowa.

¹⁰ Ithum mirin kum hangshiniya, lah phasā phāhaoda hangchishat ringpai; chithālala chila chotchānga kala ringshiya; athum thākta thuihaowa, ithumla yongthuihaowa.

¹¹ Nali khangacheewui pangshap chili nawui malungkakangwui khangachee athishurda khipāna machukvākhala?

¹² Chieina ithumwui mirin shankhuithei khavai tamchitheimilu, chieina ithumna aworwui ning samphangra.

¹³ O Proho, ngareiungmilu! Karankharakhala? Naraobingli khalumashanmilu!

¹⁴ Makhangachei leikashi chieina ithumli ngathor ningyāng ungngasakmilu, chieina mirin peida ithumna ringphāda mathānra.

¹⁵ Nana khanang ngasak kahai chirankha, kala makaphā theingasak kahai zingkum chiyākha ringphā ngasakmilu.

¹⁶ Nawui otsak naraobingwuitungli, kala nawui tekhamatei pangshap nanao ngarāwui lungli reisang ngasakranu.

¹⁷ Ithumwui Vare Prohowui ngahānkhangai ithumli tārormiranu, kala ithumwui pāng eina sākahai ithumwuitungli sakāmilu, mha, ithumwui pāngna sākahai ot nana ungshungmiranu.