LAA 9 - Kathara Bible (BSI)

Mashun Otsakwui vang Vareli Ningkashi

¹ Ining tongchaoda, ina Proholi ningshira; nawui matakhak kahai otsak saikora ina pheira.

² Nawui mangāli ina mathānra kala ringphāra; namingli Ina masotlaa sāra, O Juikhamataiya!

³ Iwui yangkashebingna ngalankathui tharān; athumwui phei ngaphokta nawui mangāli shimāna.

⁴ Kaja iwui mashunwui vang nana nganingmihaira; nana wungpamkhongli pamda khamashung bichar samidalei.

⁵ Nana yurbingli hāngmachinhaira, makhayābingli sāshimānmihaira, katang mavaila athumwui ming nana shimitmihaira.

⁶ Yangkashebing katang makhavai khangayānglungli shimānhaira, athumwui keinungla nana phurshokmihaira; athumli phaningkhaung eina tangdala shimān ngasakhaira.

⁷ Kha Prohova katang mavaila wungpamkhongli pama; bichar sākhavai ana wungpamkhong ngarānhaira;

⁸ kala ana apuk-apagva̱̱li khamashung-khangarong eina bichar sāmi, yurbingli ngaraichā eina bichar sāmi.

⁹ Prohova rekharek kahaiyabingwui ngayin khavaina, kakhanang atamli ngayin khavaipamna.

¹⁰ Kala nawui ming kathei athum china nali ning horsanga, kaja O Proho, nali kaphā athumli nana mahorhaimana.

¹¹ Zionli kapama Proho chili masotlaa sālu! Awui otsak yurbingwui alungli hāngmilu!

¹² Kaja asheewui vang athut kakhuiya Ishameina kachotbingwui vang phaningtita, kakhananga athumwui khavao chi ana mamalaimana.

¹³ Ili khalumashanmilu, O Proho! Yanglu, ili yangkakharingabingwui pāngli ina kathāda khanangli, kathi ngaveiwui eina kanshokmilu, O Proho!

¹⁴ Chithāda ina nawui masot saikora shānkhuiluira, kala Zion naongalāva̱wui ngaveibingli, nawui kankhamilungli ina mathānra.

¹⁵ Yurbing athumna sākahai chom chili tāzanghaira; athumna ngathumda sangkahai khalen chili athumwui phei khalatta manhaira.

¹⁶ Prohona akhalatta chitheimihaira, awui bichar sākuphaira, makaphā makhayābing china athumwui pāng eina sākahai khalen chili mana.

¹⁷ Makaphābing, Vareli malai kahai yur saikora Kazeiramli vara.

¹⁸ Kaja khavātabingli atam kachida mamalaimara; kala kachāmabingwui kachihān mashimānchaomara.

¹⁹ Ngakarthuilu, O Proho! mikumona mayuiaranu; miyurbingli nawui mangāli bichar sāranu!

²⁰ Athumli ngachee ngasaklu, O Proho! miyur saikora athum khalatta mikumona da theikhuiranu.