LAA 88 - Kathara Bible (BSI)

Ngachonmi khavai Khangakao

¹ O Proho, iwui Vare, ngachonmi khavai ngashunshong ina ngakaowa, nawui mangāli ina ngayāla ngakaowa.

² Iwui seihā kasā nawui mangāli kāshungranu, iwui khavao nāshungda nganāmilu!

³ Kaja iwui ning kakhanangna pema, kala imanglā Kathewui ramli vānganaimamānhaira.

⁴ Chomli khavābingwui alungli ilila shānsanga; Iva yāng makhalei mina,

⁵ kathiwui ngachaili horkahaiya kathāna, shaothatta chikhurli chizan kahai kathāna, nana maphaningungluilak kaji kathāna, kaja athum napāngwui eina katatchao kahaina.

⁶ Nana ili Chomwui kathukali sanghaira, tangkhamang kathuka apamli.

⁷ Iwuitungli nawui malungkhavāt ritlak eina lei, kala nana nawui ra̱phongbing china ili ngaphaoror ngasaka.

⁸ Iwui ngasotnaobingna ili nothahai khavai nana sāmihaira; I hi athumwui vang ngachee-ngachā khavai sāmihaira. Ina mayāmshok khavai ili tuknarhaira;

⁹ kakhanangna imikla māmāchahaira. O Proho thangkachida ina nali ngakaowa; Nali ina ipāng khangkāda seiha sai.

¹⁰ Kathebingwui vang nana matakhak kahai ot kasāla? Khaya̱na ngakarthuida nali masot mila?

¹¹ Nawui makhangachei leikashi chikhurli phongmila, maningakha nawui ningkatong Abaddonli chitheila?

¹² Nawui matakhak kahai tangkhamang lungli theila, lah nawui huikhamiwui ngachonkhami malaikazarpamli phaningungla?

¹³ Kha, O Proho, ina nali vaoli, ngathorshong iwui seihā nawui mangāli sai.

¹⁴ O Proho, ili khisāda horhaokhala? Khisāda namai iwui eina thumhaokhala?

¹⁵ Yaronlakha eina thuida kachotna thinanaichinga, Ina nawui khangachee khānga; I khikha masāthukthura.

¹⁶ Nawui malungkhavāt iwuitungli phanrāhaira; nawui khangachee hukkachihāna ili yuihaira.

¹⁷ Tara̱ kaphong thāda ili langpongda kuimareiya; athumna ngarumda ili kuinamhaowa.

¹⁸ Ngasotnaola, leikashibingla ili mangayur khavai nana khāmmihaowa; iwui ngasotabing tangkhamanglungli lei.