LAA 86 - Kathara Bible (BSI)

Ngachonmi khavai Seihā

¹ Nāshungmida khangahānkāmilu, O Proho, kaja iva khangazana khavāta mina.

² Iva varekathei mina, imanglā phārimihailu, nali shitkasanga naraoli kahuimilu. Na iwui Varena;

³ ili khalumashanmilu, O Proho, kaja ina nali langpongda ngakaowa.

⁴ Naraowui manglā mathān ngasakmilu, kaja imanglāna nali yangkai, O Proho.

⁵ Kaja nava, O Proho, kaphā kala pheokhamena nali khangakaobingli makhangachei leikashi pemting eina mi.

⁶ O Proho, iwui seihā kasā hi khanganāmilu, iwui kapowui khavaokhon kakhuisangmilu.

⁷ Iwui kakhanang tharan nali ngakaowa, kaja nana ili ngahānkāmi.

⁸ Nakathā Vare varebingwui alungli maleimana O Proho, nawui otsak kathāla maleimana.

⁹ Nana sākahai miyur saikora nawui mangāli rāda rākhorumra, O Proho, kala naming sochikatra.

¹⁰ Kaja nava reimatailaka kala matakhak kahai ot sai, Vare chi namānga.

¹¹ Nawui apong tamchitheimilu, O Proho, chithāda ina nawui khamashung chili zatra; namingli ngacheethei khavai iningli ngarum ngasakmilu.

¹² Ining tongtingda nali ina ningshi, O Proho iwui Varivara, kala ina namingli katang maleila sochikatra.

¹³ Kaja nawui makhangachei leikashi iwui vang hakmahālaka; Kathewui ramwui kathuk eina nana imanglā ngatangkhuimihaira.

¹⁴ O Proho, mashātkhangaibingna ili mamayāthura; sākashebingna imanglā khuikida sai, nalila athumna matheimimana.

¹⁵ Kha O Proho, nava lukhamashan leikashi Varena, malung mavatkazāra kala makhangachei leishikatha ningkatong Varena.

¹⁶ Ngareiungda ili khalumashanmilu, naraoli nawui yāng sangmilu, kala narao sha̱naowui naomayarali kahuimilu.

¹⁷ Nawui ngahānkhangai khamachut ili chitheimilu, chieina ili ningkakachaibingna chi theilaga khayakranu khikhalajila Proho, nana ili ngachonmida ninglum ngasakhaira.