LAA 85 - Kathara Bible (BSI)

Yurrinwui vang Seihā

¹ Proho nawui ngaleili nana ngahānngaiya, Jacobwui lan nana hanmiluishita.

² Nawui mibingwui khayonkhamāng nana pheomi; nana athumwui morei saikora pheomi.

³ Nana nawui malungkhavāt saikora khuithuimihaowa; nawui malung kasāwui eina ngareithuimihai.

⁴ O ithumwui huikhame Vare, ithumli khuisangmiluilu, kala ithumwui eina nawui malungkhavāt khuithuimihaolu!

⁵ Ithumli malungvātchinghaorala? Nawui malungvāt thot-thot vāfarala?

⁶ Nawui mibing nawuili mathān khavai Ithumli mamathuk ngasakluimarala?

⁷ O Proho, nawui makhangachei leikashi ithumli chitheimilu, kala ithumli nawui huikhami milu.

⁸ Vare Prohona khi hāngrakhala da ina nganāka, kaja awui mibingli ana chingri kahai tui hāngra, awui katharabingli, ning ngateida latkhaungbing chili.

⁹ Kachangkhatta, ali khangacheebingwui vanga huikhami nganailakhaira, kaja tekhamatei chi ithumwui ngaleili leira.

¹⁰ Makhangachei leikashi eina ningkatong leirumra, khangarong eina chingri kahai akha eina akha pāngkhumra.

¹¹ Ngaleiwui eina ningkatong shokra, kala khangarongana kazing eina yangtāra.

¹² Mha, Prohona kaphā chi mira, ithumwui ngalei mataisangra.

¹³ Khamashung khangarongna ali rida zatra, kala awui pheikārna apong sāmira.