LAA 84 - Kathara Bible (BSI)

Varewui Shimwui vang Kahon

¹ Nawui pamkhavai kayākha leishikhala, O saikorawui Proho!

² Prohowui shimwui vang; imanglāna malungchāngda vānhaira; imanglā eina iphasāna kharinga Vareli mathānda laa sai.

³ Konghinao eina tangdala athip samphanga, kala yāngyaola khalattawui athip lei, chili anaobing sha̱khui, nawui hanphutpamli, O saikorawui Proho, iwui Awunga kala iwui Vare.

⁴ Nawui shimli pamda nawui masotlaa sāching kajebing sokhamina.

⁵ Nawuili yang khalei athum chi sokhamina, athumwui wuklungli Zionwui chanrei lei.

⁶ Athumna Bacawui tampākli zatvāmamānda athumna chi ura̱wok pam sāngasaka; zingrot rokharenala tara̱ puingasaka.

⁷ Athum pangshaptungli pangshap eina muivai; Zionli varebingwui Vareli theira.

⁸ O Proho ashangva̱wui Vare, iwui seihā kashāmilu; khanganāmilu, O Jacobwui Vare!

⁹ O Varivara; yanglu, ithumwui chāngvei; nawui thao neomi kahaia awui mai khayangmilu!

¹⁰ Kaja khangatei apamli zimiksho thingkhale nawui shimli thangkha phamei. Makhayāwui shimli pamki kajile Varewui khāmong khamayona sāngaimei.

¹¹ Kaja Proho Vare hiya zimik kala changveina; ngahānkhangai eina khayākakā ana mi. Mashungrik eina kazatbingwui vang kapha otli ana makhāmhailakmana.

¹² O saikorawui Proho, nali shitkasanga mi chi sokhamina.