LAA 83 - Kathara Bible (BSI)

Israelwui Yangkashebingli Yuikhavai Seihā

¹ O Varivara, kasaikha mapammihaialu; chingri va̱ri eina mathāmihaialu, O Vare!

² Kaja yanglu, nawui yangkashebing ngurngurhaira, nali yangkakharingbing athumwui kui khāngphokhaira.

³ Athumna nawui mibingli khangathum arek sai; nana ngākkhammi kahaibingli mamayāmada athum ngasanngaruma.

⁴ Athumna, “Rālu, yur akha khangasā hi shimit khavai sāsa; Israel kaho ming maphaningungluiranu” da hānga.

⁵ Mha, athum mijang khoma; nawuitungli mamayāla tuingashit sai—

⁶ Edom kala Ishmaelnaobing, Moab eina Hagrinaobing.

⁷ Gebal eina Ammon kala Amalek Philistia kala Tyreli khalei saikorala zanga;

⁸ Assyriala athumli zanghaira; athum chiya Lotwui naongarāwui ngachaili kapanga chi ashina.

⁹ Nana Midianaoli kasā thāda, Kishon kongli Sisera eina Jabinli sākhami thāda sāmilu,

¹⁰ Endorli shaothatta ngaleipar sathui kahai thāda athumlila sāmihaolu.

¹¹ Athumwui khangamabingli Oreb eina Zeebwui thāngasaklu, kala athumwui wungnaobing saikora Zeban eina Zalmunna thāda,

¹² “Varewui seihomphung ithumna khalattawui vang khuisa” da kahāngabingli sākhami thāda sāmilu.

¹³ O iwui Vare, athumli sur kakhaning chifa thāda, masiwui mangāli māhik thāda sāmilu.

¹⁴ Ngahong meina chuikatā thāda phungrei meiwonna kachui thāda,

¹⁵ nawui siphan zingrot eina kharomilu, kala nawui sur kakhaning eina athumli sāmachitmilu!

¹⁶ Athumwui mai kakhayakna chipemmilu, chithāda athumna, O Proho, namingli phāranu.

¹⁷ Athumli khayak ngasakta ning chotchingranu, athum maishida shimānranu.

¹⁸ Proho kaho na okathui katongali Juikhamataiyana kaji chi athumli theiranu.