LAA 81 - Kathara Bible (BSI)

Phanitwui Laa

¹ Ithumli ngākkhame Vareli khamathānwui vang vaolu, Jacobwui Vareli masotlaa sālu.

² Laa sāda timbrel shaolu; leishiri lyre eina ngasoda tingteilā khonglu.

³ Phanitwui vang talla̱ khonglu, kachāngna khawok kala khangani tharan.

⁴ Kaja hi Israelwui vang ainna, Jacobwui Varewui shiyana.

⁵ Ana Josephli hukhum sārum kahaina, ana Egypt ngalei makānkhavā tharan. Ina makathei akhon akha shai:

⁶ “Nayartuiwui kharitphun na ngavātāmihaira; sopkaiwui eina napāng masaimihaira.

⁷ Kakhanang alungli nana ngakaowa, kala ina nali khāngkhuimi; khangathuma langpar katāk atamli ina nali ngahānkāmi; Meribahwui tara̱li ina nali tamyanga.

⁸ Ina nathumli hāngmachinlakha nganālu, O iwui mibing! O Israel, nathumna ili nganāsi kaje chāng!

⁹ Nathumwui ngachaili makathei varebing maleisāmara; yur kateiwui vareli makhorummara.

¹⁰ I nathumwui Vare Prohona, Egypt ngaleiwui eina thānshokkhame china. Nathum khamor mashāda makālu, chieina ina chipemmira.

¹¹ “Kha iwui mibingna iwui khon manganāmana; Israelna ili akhala makhuisangmana.

¹² Chiwui vang ina athumwui ngakaishitingting kahai ning eina vaingasaka, athum khalattawui hāngkachithei shurkhavai.

¹³ Iyavo, iwui mibingna iwui kahāng nganāsasi kaje, Israelna iwui apongli zatsāsi kaje!

¹⁴ Athumwui yangkashebingli ina ngalāngda hamsang ngasakra, kala ipāng athumwui yangkashebingwuitungli parra.

¹⁵ Proholi yangkakharingbing chi awui mangāli ngayuma; kala athum chithāda leichinghaora.

¹⁶ Ina nathumli mathāmeikap kaja zāt mizāra, kala lunghārwui khuira̱ eina nathumli ningyāng ungngasakra.”