LAA 79 - Kathara Bible (BSI)

Yurli Kankhui khavai Seihā

¹ O Varivara, mashitkasangbing nawui ngaleili rāzanghaira; athumna nawui kathara khorumshim sākhamānghaira, athumna Jerusalem sākathānhaira.

² Athumna naraobingwui phasā khamasaili khayonga vānaobingli chishaihaira, nawui katharabingwui asā okathuiwui ramsābingli chishaihaira.

³ Athumwui ashee athumna tara̱ thāda Jerusalem kuimareida heishokhaira, kala athumli chizan khavai akhala maleisāmana.

⁴ Ithum khongnainaowui zeikhavai ngasāhaira, ithumli kuimareida khaleibingna zeikharuida mana̱shiya.

⁵ O Proho, na karankha malungvātfarakhala? Nawui yuikashiwui lungvat mei thāda chuirala?

⁶ Nali makathei miyurbingwuitungli nawui malungkhavāt heirorlu, kala namingli makhangakao wungrambingli!

⁷ Kaja athumna Jacobli shaihaira, kala awui pamkhavaila sākathānmihaira.

⁸ Ishāvā ngarāwui khayonkhamāng chi ithumwuitungli maphaningshānmialu; nawui lukhamashan ithumli thākta tāshung ngasakmilu, kaja ithum kachihān shimānchaohaira.

⁹ Ithumli khangachon milu, O ithumwui huikhame Varivara, namingwui tekhamateiwui vang; ithumli kanmilu, kala ithumwui morei pheomilu, nawui mingwui vang.

¹⁰ “Athumwui Vare kali leikhala” da miyurbingna khisāda hangrakhala? Naraobingwui ashee tākhangasakwui vang athut kakhui chi miyurbingli theikhangasak chi ithumwui mikna theiranu.

¹¹ Narkahaibingwui ringkhangā chi nawui mangāli rāshungranu; thihaokida khalei athumli nawui pangshap kharei eina phārimilu!

¹² O Proho, khongnainaobingna nali zeikakharui chi shini shida athut hāngsangmilu!

¹³ Chieina seihomphungli khalei nawui mibing ithumna nali mashimānda ningkashi mira; thot kachida ithumna nawui masot shānkhuira.