LAA 75 - Kathara Bible (BSI)

Vare Bicharwo

¹ O Vare, ithumna nali ningkashi mili, ithumna nali ningkashi mili; namingli ithumna ngakaowa kala nawui matakhak kahai otsak shānkhuiluishita.

² Ina kapangsang kahai atam chili mashun eina ina bichar sāra.

³ Okathuila, chili khalaleila khanganuk tharan, pākra̱ mangatha̱ khangasak chi ina.

⁴ Langkasobingli ina hānga, “Malangsolu” kala makhayābingli hānga, “Nawui talla̱ makhāngkālu;

⁵ nawui talla̱ kajuili makhāngkālu, lah kahungla kharekta mamatuilu.”

⁶ Kaja zingtun einala, zingsho einala, lamhāng einala masot kharā maningmana;

⁷ kha Vare china bichar sāda akhali nemngasaka, akhali juingasaka.

⁸ Kaja Prohowui pāngli mathāda manāt kahai amalao kakā zam tengkot akha lei; ana chiwui eina heikatā tharan, okathuili khalei makhayābing saikorana akhan eina tangda mangra.

⁹ Kha Ina mathānchingra, ina Jacobwui Vareli masotlaa sāra.

¹⁰ Makhayābingwui pangshap ana katathaora, kha khangarongabingwui pangshap khāngchikatra.