LAA 73 - Kathara Bible (BSI)

LAIRIK - III ( Laa 73—89 ) Varewui Mashun-Makhui

¹ Kachangkhat eina ningkhangatar kala ningkathar athumli Vare phālaka.

² Kha iva phei ngaphoknaikhaya, iwui pheikār nganaithuinaikhaya.

³ Kaja makaphābingwui mataikasang chi theilaga, ina athumwui langkaso chili mikpaishiya,

⁴ kaja athum kakhanang kachot maleimana; athumwui phasā tāngpat nganaiyokhai.

⁵ Kateiwui thāda athum kakhanang mavaimana; mi katei thāda athum kakhanang kakazā maleimana.

⁶ Chiwui vang eina lāngkasona athumwui chā sai khangashaona kachon thāda fakhama.

⁷ Thaonāhaida athumwui mikla mazoshoka, athumwui ning mangkhama̱na puitinghai.

⁸ Athumna mana̱shiya kala sāshida matuiya, lāngsosor eina rekakharek tui hāngmachitzata.

⁹ Athumna kazingramli makhamayā matuiya, okathui vāpeida male sosor hāngzata.

¹⁰ Chiwui vang mibingna ngareiungda athumli sochikata; kala athumwui khayon matheimana.

¹¹ Kala athumna “Varena kathāda theira, Juikhamataiya chili theikashap leila?” da hānga.

¹² Yanglu, hi makhayābingna; atam kachida leiyāsorhai, athum shāngsanga.

¹³ Ining tharzā kahai, ipāng khalāng ot makasā saikora aremana.

¹⁴ Kaja langpongda ining chotchānga, ngathor kachida ili hāngmachina.

¹⁵ “Chithāda Ina matuira” da ina hānghaisaakha nawui naomayarawui thotli ina kahatna.

¹⁶ Kha ina hi kathāda theikhuirakhala da kaphaning tharan hi khananglāk kahai otna,

¹⁷ Varewui kathara shimli mazangranglakha eina tangda athumwui akatanga matheimara.

¹⁸ Kachangkhat eina nana athumli khanganai pamli haimi, athumli konglui ngasakta shimān ngasaka.

¹⁹ Hunkhawui alungli khangachee khangachā eina, athumli kathāda shimān ngasakchaohaokhala!

²⁰ Athum chiya khamathuk tharan mangshong thai, khamathuk tharan athumwui amāhā chili nana ningkachai.

²¹ Iningli khajir kahai tharan, iningli kashātna kharung thākahai tharan,

²² I mangma̱tot eina matheithangkhamei, nawui mangāli I sāyur thāhaowa.

²³ Chithālala ina nali shurzatchingda lei, iwui yāpang nana singmi.

²⁴ Nana hāngkachithei eina ngasoda ili thānmi, kala naoda nana tekhamatei eina ili samphangra.

²⁵ Na maningla kazingramli iwui vang khipā leikhala? Okathuili na maningla ina kakahao khangatei maleimana.

²⁶ Iphasā eina imanglā ngazanlapai, kha Vare iningwui yāng kala katang makhavai iwui yarna.

²⁷ Kaja yanglu, nawui eina tāda khaleibing shimānserra; nali kachipatbingli nana tangngasakhaora.

²⁸ Kha iwui vanga Vareli khanganai phāshuna, Proho VAREli iwui ngayin khavai sāhaira, chiya ina nawui otsak saikorawui pongli hāngra.